സംസ്ഥാന ഭരണം ലീഗ് ഹൈജാക്ക് ചെയ്തുവെന്ന് ബിജെപി നേതാവ് കെ കെ വിനോദ് കുമാര്‍

കണ്ണൂർ: (KVARTHA) കേരളത്തിലെ യുഡിഎഫ് ഭരണം മുസ്ലിം ലീഗ് ഹൈജാക്ക് ചെയ്തുവെന്ന് ബിജെപി കണ്ണൂര്‍ നോര്‍ത്ത് ജില്ലാ പ്രസിഡന്റ് കെ.കെ. വിനോദ് കുമാര്‍ ആരോപിച്ചു. കണ്ണൂർ മാരാർജി ഭവനിൽ നടത്തിയ വാര്‍ത്താസമ്മേളനത്തിലാണ് അദ്ദേഹം യുഡിഎഫിനും സിപിഎമ്മിനുമെതിരെ രൂക്ഷവിമർശനം ഉന്നയിച്ചത്.

ഭരണത്തിൽ ലീഗ് ഇടപെടൽ; ഉദ്യോഗസ്ഥർക്ക് ഭീഷണി

ലീഗിന്റെ നിർദേശത്തിനനുസരിച്ചാണ് കേരളത്തില്‍ ഭരണം നടക്കുന്നതെന്ന് വിനോദ് കുമാർ പറഞ്ഞു. കെ.എം. ഷാജിയെ പോലുള്ള മന്ത്രിമാര്‍ ചട്ടം ലംഘിച്ച് മുന്നോട്ട് പോകുന്നത് കാണാൻ സാധിക്കും. ഉദ്യോഗസ്ഥരെ ഭീഷണിപ്പെടുത്തുന്ന നിലപാട് അതീവ ഗൗരവതരമാണ്. ഇതിനൊപ്പം കണ്ണൂരിൽ മതഭീകരവാദ പ്രവർത്തനങ്ങൾ ശക്തമാവുകയാണെന്നും അദ്ദേഹം ആരോപിച്ചു.

എസ്ഡിപിഐ, പിഡിപി തുടങ്ങിയ സംഘടനകളുടെ പ്രവർത്തനം ജില്ലയിൽ വ്യാപകമാണ്. മതഭീകരവാദികൾക്ക് കഴിഞ്ഞ 10 വർഷം ഇടത് സർക്കാർ നൽകിയ അതേ സഹായം യുഡിഎഫ് സർക്കാരും നൽകുന്നുണ്ടെന്ന് അദ്ദേഹം കുറ്റപ്പെടുത്തി.

അനധികൃത കുടിയേറ്റക്കാരും സുരക്ഷാ വീഴ്ചയും

കണ്ണൂരിൽ അനധികൃതമായി താമസിക്കുന്ന പാക് പൗരന്മാരുണ്ടെന്നും അവർക്കെതിരെ നടപടി സ്വീകരിക്കണമെന്നും ആവശ്യപ്പെട്ട് 2025-ൽ ബിജെപി ജില്ലാ കളക്ടർക്ക് പരാതി നൽകിയിരുന്നു. അത്തരത്തിൽ ആരും താമസിക്കുന്നില്ലെന്നായിരുന്നു കളക്ടറുടെ മറുപടി. എന്നാൽ രണ്ട് ദിവസത്തിനകം കണ്ണാടിപ്പറമ്പിൽ രണ്ടുപേർ അറസ്റ്റിലായി.

ബിജെപി കൃത്യമായ തെളിവുകളുടെ അടിസ്ഥാനത്തിൽ നൽകിയ പരാതി ഭരണകൂടം ഗൗരവമായി കണ്ടില്ല. രാജ്യത്ത് നിയമം ലംഘിച്ച് നിരവധി പേർ താമസിക്കുന്നുണ്ടെന്നും അവരെ കണ്ടെത്തുന്നതിൽ പൊലീസ് പൂർണമായും പരാജയപ്പെട്ടുവെന്നും ഇത് വ്യക്തമാക്കുന്നു. രേഖകളൊന്നുമില്ലാതെ കണ്ണൂരിൽ നാല് ബംഗ്ലാദേശികൾ കഴിഞ്ഞ ദിവസം അറസ്റ്റിലായിരുന്നു. ഇതര സംസ്ഥാന തൊഴിലാളികൾ മോഷണത്തിനായി കേരളത്തെയാണ് തെരഞ്ഞെടുക്കുന്നതെന്നും വിനോദ് കുമാർ കൂട്ടിച്ചേർത്തു.

സിപിഎം നേതാക്കൾക്ക് മാഫിയാ ബന്ധം

സിപിഎം നേതാക്കളിൽ ഒരു വിഭാഗം അഴിമതിക്കാരും അക്രമത്തിന് നേതൃത്വം കൊടുക്കുന്നവരുമായി മാറിയിരിക്കുന്നു. സിപിഎം അധാർമികതയിലും അപചയത്തിലും കൂപ്പുകുത്തിയിരിക്കുകയാണ്. ഭൂമാഫിയ, ലഹരിമാഫിയ, മണൽ മാഫിയ എന്നിവരുമായി നേതാക്കൾക്കുള്ള ബന്ധം ഇതിനകം വെളിവാക്കപ്പെട്ടിട്ടുണ്ട്.

ആത്മാർഥതയുള്ള സിപിഎമ്മുകാർ സീറോ ആവുകയും അഴിമതിക്കാരായ നേതാക്കൾ ഹീറോ ആവുകയും ചെയ്യുന്ന രാഷ്ട്രീയ സാഹചര്യമാണ് നിലവിലുള്ളത്. രക്തസാക്ഷി ഫണ്ട് തട്ടിപ്പ് ഒരു ഒറ്റപ്പെട്ട സംഭവമല്ലാതായി മാറിയെന്നും വിനോദ് കുമാർ പറഞ്ഞു. ജില്ലാ ജനറൽ സെക്രട്ടറി ടി.സി. മനോജ്, ട്രഷറർ പി.കെ. ശ്രീകുമാർ എന്നിവരും വാർത്താസമ്മേളനത്തിൽ പങ്കെടുത്തു.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്.

Article Summary: BJP leader alleges Muslim League hijacked UDF govt; slams CPM's mafia links.

#BJPKerala #KannurNews #KeralaPolitics #KKVinodKumar #MalayalamNews #CPMKerala #UDF #Kvartha #AnjanaNews