ചാമ്പിയത് ആര്? കുറച്ചത് ആര്? 28% ഓട്ടോറിക്ഷാ നികുതി ചുമത്തിയതിൻ്റെ 'കറുത്ത അദ്ധ്യായം' എൻഡിഎ മറക്കുന്നു; 'ഇവരോട് ആര് പറയുമീ സത്യങ്ങൾ'; ബിജെപി പോസ്റ്റിനെതിരെ വിമർശനങ്ങൾ

കോഴിക്കോട്: (KVARTHA) 2014-ന് ശേഷമുള്ള 11 വർഷത്തെ ചരിത്രം സൗകര്യപൂർവം മറക്കുകയും, സ്വന്തം ഭരണകാലത്തെ തെറ്റുകൾ വിദഗ്ദ്ധമായി ഒളിച്ചുവെക്കുകയും ചെയ്യുന്നതായി ബി.ജെ.പി.യുടെ ഫേസ്ബുക്ക് പോസ്റ്റിനെതിരെ സോഷ്യൽ മീഡിയയിൽ ചിരി പടർത്തുന്ന വിമർശനങ്ങൾ. കേരള ബി.ജെ.പി.യുടെ ഔദ്യോഗിക ഫേസ്ബുക്ക് പേജിൽ പ്രത്യക്ഷപ്പെട്ട ഒരു പോസ്റ്റാണ് രാഷ്ട്രീയ നിരീക്ഷകർക്കിടയിൽ ചർച്ചാവിഷയമായിരിക്കുന്നത്. ‘മുച്ചക്ര വാഹനങ്ങളുടെ ജിഎസ്ടി 18% ആക്കി കേന്ദ്ര സർക്കാർ. 2014 മുമ്പ് 28% ആയിരുന്നു നികുതി നിരക്ക്. സാധാരണക്കാരന്റെ വാഹനമായ ഓട്ടോറിക്ഷയ്ക്കടക്കം ഇനി വിലകുറയും’ എന്നായിരുന്നു പോസ്റ്റ്.

പ്രധാനമന്ത്രിയുടെ 11 വർഷത്തെ ഭരണകാലം അവരുടെ കലണ്ടറിൽ നിന്ന് ഒഴിവാക്കിയാണ് ബി.ജെ.പി. ഈ 'പുതിയ ചരിത്രം' മെനഞ്ഞെടുത്തതെന്നാണ് വിമർശകരുടെ പരിഹാസം. 2014-ൽ കേന്ദ്രത്തിൽ അധികാരത്തിൽ വന്ന എൻ.ഡി.എ. സർക്കാർ, ചരക്ക് സേവന നികുതി (GST ) എന്ന സമ്പ്രദായം രാജ്യത്ത് കൊണ്ടുവരുന്നത് 2017 ജൂലൈ ഒന്നിനാണ് എന്ന അടിസ്ഥാനപരമായ സത്യം ബോധപൂർവം വിസ്മരിക്കുന്നു. അതായത്, 2014-നും 2017-നും ഇടയിൽ ജിഎസ്ടി നിലവിലില്ലായിരുന്നു. 2017-ൽ ജിഎസ്ടി നടപ്പിലാക്കിയപ്പോൾ ഓട്ടോറിക്ഷ പോലുള്ള മുച്ചക്ര വാഹനങ്ങൾക്ക് 28% നികുതി ചുമത്തിയത് ഈ സർക്കാർ തന്നെയായിരുന്നു എന്ന യാഥാർത്ഥ്യമാണ് വിമർശകർ ചൂണ്ടിക്കാട്ടുന്നത്.

നികുതിയുടെ 'ഗോൾഡൻ ഇയേഴ്സ്': 28% ആരാണ് ചുമത്തിയത്?

2014-ന് മുമ്പ് നിലവിലുണ്ടായിരുന്നത് വാറ്റ് (VAT), എക്സൈസ് ഡ്യൂട്ടി, സി.എസ്.ടി. (CST) തുടങ്ങിയ വിവിധ നികുതി ഘടനകളായിരുന്നു. അന്നത്തെ നികുതി നിരക്ക് 28% ആയിരുന്നില്ല എന്നുള്ളത് ഒരു തുറന്ന സത്യമാണ്. 'ഓട്ടോറിക്ഷയ്ക്ക് 28% ജിഎസ്ടി' എന്ന ഭീകര നികുതി ചുമത്തി അത് പിന്നീട് പത്ത് വർഷത്തെ ഭരണത്തിന് ശേഷം 18% ആയി കുറച്ചതിൻ്റെ 'ക്രെഡിറ്റ്' സ്വന്തമാക്കാനുള്ള ശ്രമമാണ് ഈ പോസ്റ്റിലൂടെ നടത്തുന്നതെന്നാണ് വിമർശനം.

‘ഓട്ടോറിക്ഷാ തൊഴിലാളികളെയും സാധാരണക്കാരെയും കൊള്ളയടിച്ചുകൊണ്ട് 28% നികുതി ചുമത്തിയതും അത് 11 വർഷത്തോളം തുടർന്നതും ആരായിരുന്നു? ഇപ്പോൾ കുറച്ചിട്ട് അതിന്റെ വീരഗാഥ പാടുന്നതിനെയാണ് 'രാഷ്ട്രീയ മറവിരോഗം' എന്ന് പറയുന്നത്,’ എന്ന് സോഷ്യൽ മീഡിയ കമൻ്റുകളിൽ ഒരാൾ വിമർശിച്ചു. 2014-2025 കാലഘട്ടം ബി.ജെ.പി.യുടെ കലണ്ടറിൽ നിന്ന് അപ്രത്യക്ഷമായെന്നും, 2014-ൽ നിന്ന് നേരെ 2025-ലേക്ക് (ജിഎസ്ടി കുറച്ച വർഷം) ചാടാനാണ് ബിജെപി സുഹൃത്തുക്കൾ ശ്രമിക്കുന്നതെന്നും പരിഹാസമുയരുന്നു.

ഈ നീക്കം വഴി ഓട്ടോറിക്ഷക്ക് അടക്കം 'ഇനി വില കുറയും' എന്ന പോസ്റ്റിലെ അവകാശവാദത്തെയും കമൻ്റ് ബോക്‌സിലെ പ്രതികരണങ്ങൾ ചോദ്യം ചെയ്യുന്നുണ്ട്. 28% നികുതി ചുമത്തി വില വർദ്ധിപ്പിച്ചതിൻ്റെ ഉത്തരവാദിത്തം മറച്ചുവെച്ചുകൊണ്ട്, ഇപ്പോൾ 10% കുറച്ചതിൻ്റെ മാത്രം പ്രയോജനം പറയാനുള്ള ശ്രമം ജനങ്ങൾക്കിടയിൽ വിലപ്പോവില്ലെന്നാണ് പൊതുവിലയിരുത്തൽ.

പ്രതികരണങ്ങൾ: 'ഇന്ത്യയുടെ ജി.എസ്.ടി. പിരിച്ചതാര്?'; പെട്രോൾ വിലയും ചർച്ചാവിഷയം

ഫേസ്ബുക്ക് പോസ്റ്റിന് താഴെ നിരവധി ചോദ്യങ്ങളും വിമർശനങ്ങളുമാണ് നിറഞ്ഞത്. ബി.ജെ.പി.യുടെ ഭരണകാലത്ത് രാജ്യത്ത് പെട്രോളിനും ഡീസലിനും ഉണ്ടായ വിലവർദ്ധനവ് ചൂണ്ടിക്കാട്ടി ഒരാളുടെ പ്രതികരണം ശ്രദ്ധേയമായിരുന്നു. 'ഒരു കൈത്താങ്ങും വേണ്ട, പെട്രോൾ ഡീസൽ വില കുറച്ച് ജനങ്ങളെ സഹായിച്ചാൽ മതി. 60 രൂപ പെട്രോൾ നിങ്ങൾ 120 ആക്കി, അത് കുറച്ചാൽ മതി,' എന്നായിരുന്നു ആ കമന്റ്.

ജിഎസ്ടി നിലവിൽ വന്നതിനെക്കുറിച്ചുള്ള വസ്തുതകളും കമൻ്റുകളിൽ ചർച്ചയായി. 'ഇന്ത്യയിൽ ചരക്ക് സേവന നികുതി 2017 ജൂലൈ 1-നാണ് നിലവിൽ വന്നത്. കേന്ദ്ര-സംസ്ഥാന സർക്കാരുകൾ ചുമത്തിയിരുന്ന നിരവധി പരോക്ഷ നികുതികൾക്ക് പകരമായി ഒരു ഏകീകൃത നികുതി സംവിധാനം കൊണ്ടുവരിക എന്ന ലക്ഷ്യത്തോടെയാണ് ഇത് നടപ്പാക്കിയത്. അന്ന് ഇന്ത്യയുടെ പ്രധാനമന്ത്രി നരേന്ദ്രമോദി ആയിരുന്നു,' എന്ന് ഒരു ഉപയോക്താവ് കുറിച്ചു.

മറ്റൊരാൾ കൂടുതൽ വിമർശനമുന്നയിച്ചു. 'അടുത്ത ഉടായിപ്പ്. മോദി സർക്കാർ അധികാരത്തിൽ വന്നത് 2014 മെയ് മാസത്തിൽ. പുതുക്കിയ GST വന്നത് ഈ മാസം. 2014 മുതൽ ഇന്ന് വരെയുള്ള GST വാങ്ങിയത് മൻമോഹൻ സിംഗ് ആണോ?' എന്നും ചോദ്യമുയർന്നു. 'ഒരു കളവ് 100 പ്രാവശ്യം പറഞ്ഞാലും അത് സത്യം ആവാതിരിക്കില്ല' എന്ന വിമർശനവും പോസ്റ്റിന് താഴെ വന്നു. മണിക്കൂറുകൾ നീണ്ട ഈ ട്രോളിങ്ങിനും പ്രതികൂല പ്രതികരണങ്ങൾക്കും പിന്നാലെ ബി.ജെ.പി. കേരളം ഈ പോസ്റ്റ് പിൻവലിച്ച് തടിയൂരി. എന്നാൽ ഇതിന്റെ സ്ക്രീൻഷോർട് സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.

ബി.ജെ.പി.യുടെ പോസ്റ്റും അതിനെതിരെ ഉയർന്ന വിമർശനങ്ങളെയും കുറിച്ചുള്ള നിങ്ങളുടെ അഭിപ്രായം എന്താണ്? 

Article Summary: BJP faced online criticism for claiming credit for reducing auto-rickshaw GST from 28% to 18%, as the 28% rate was introduced during their own rule.

#GSTControversy #BJPKerala #AutoTax #PoliticalAmnesia #SocialMediaTroll #GST