കുമ്പള ടോൾ പൂട്ടൽ: ബിജെപിയിലും ക്രെഡിറ്റ് പോരോ?; ഒളിയമ്പുമായി എം എൽ അശ്വിനി

കാസർകോട്: (KVARTHA) കുമ്പള ആരിക്കാടി ടോൾ പ്ലാസ എന്നെന്നേക്കുമായി അടച്ചുപൂട്ടാനുള്ള കേന്ദ്ര സർക്കാരിന്റെ ചരിത്രപരമായ തീരുമാനത്തിന് പിന്നാലെ ബിജെപിക്കുള്ളിൽ ക്രെഡിറ്റ് പോരെന്ന് വിലയിരുത്തൽ. ടോൾ പൂട്ടാൻ നിർണ്ണായക ഇടപെടൽ നടത്തിയത് ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖറും ജില്ലാ നേതൃത്വവുമാണെന്ന് അവകാശപ്പെട്ടുകൊണ്ട് കാസർകോട് ജില്ലാ അധ്യക്ഷ എം എൽ അശ്വിനി രംഗത്തെത്തി. മുൻ സംസ്ഥാന പ്രസിഡന്റ് കെ സുരേന്ദ്രൻ ചൊവ്വാഴ്ച സോഷ്യൽ മീഡിയയിലൂടെ നടത്തിയ അവകാശവാദങ്ങളെ തള്ളിക്കൊണ്ടായിരുന്നു അശ്വിനിയുടെ ഈ പുതിയ വെളിപ്പെടുത്തൽ. കാസർകോട് ബി ജെ പി ജില്ലാ കമ്മിറ്റി ഓഫീസിൽ നടത്തിയ വാർത്താസമ്മേളത്തിൽ സംസാരിക്കുകയായിരുന്നു അവർ. 

രാജീവ് ചന്ദ്രശേഖറിന്റെ ഇടപെടൽ

കുമ്പളയിലെ ടോൾ പ്ലാസ ഫയൽ അവസാനിപ്പിച്ചതായി കേന്ദ്ര ഉപരിതല ഗതാഗത-ഹൈവേ മന്ത്രി നിതിൻ ഗഡ്കരിയുടെ ഓഫീസ് സംസ്ഥാന അധ്യക്ഷൻ രാജീവ് ചന്ദ്രശേഖറിനെ നേരിട്ട് വിളിച്ച് അറിയിച്ചതായി എം എൽ അശ്വിനി പറഞ്ഞു. കഴിഞ്ഞ വർഷം മെയ് മാസം മുതൽ ബിജെപി ജില്ലാ കമ്മിറ്റി ഈ വിഷയത്തിൽ കേന്ദ്രവുമായി നിരന്തര ബന്ധം പുലർത്തിയിരുന്നു. സെപ്റ്റംബർ മാസത്തിൽ രാജീവ് ചന്ദ്രശേഖർ നിതിൻ ഗഡ്കരിക്ക് കത്ത് നൽകുകയും അതിന്റെ അടിസ്ഥാനത്തിലാണ് ഇപ്പോൾ നടപടി ഉണ്ടായിരിക്കുന്നതെന്നും അവർ വിശദീകരിച്ചു. കാസർകോട് ജില്ലാ കമ്മിറ്റിയുടെ അപേക്ഷ കേന്ദ്രത്തിന് മുന്നിലെത്തിക്കാൻ ഇടപെട്ട രാജീവ് ചന്ദ്രശേഖറിന് അവർ പ്രത്യേകമായി നന്ദി അറിയിച്ചു.

കെ സുരേന്ദ്രനെതിരെ ഒളിയമ്പ്

കുമ്പള ടോൾ പൂട്ടാനുള്ള തീരുമാനം പുറത്തുവന്നതിന് പിന്നാലെ നിതിൻ ഗഡ്കരിക്കും പ്രധാനമന്ത്രി നരേന്ദ്ര മോദിക്കും നന്ദി പറഞ്ഞുകൊണ്ട് കെ സുരേന്ദ്രൻ രംഗത്തെത്തിയിരുന്നു. മഞ്ചേശ്വരത്തെ ജനങ്ങളുടെ പേരിൽ അദ്ദേഹം ഈ വിജയത്തെ തന്റെ ഫേസ്ബുക്ക് പോസ്റ്റിലൂടെ ആഘോഷമാക്കി. എന്നാൽ, ജില്ലാ നേതൃത്വത്തിന്റെയോ നിലവിലെ സംസ്ഥാന പ്രസിഡന്റിന്റെയോ പേര് പരാമർശിക്കാതെ സുരേന്ദ്രൻ ക്രെഡിറ്റ് സ്വന്തമാക്കാൻ ശ്രമിക്കുന്നു എന്ന സൂചനയാണ് എം എൽ അശ്വിനിയുടെ വാക്കുകളിൽ പ്രകടമായത്. മറ്റുള്ളവർ ചെയ്ത പ്രവർത്തനത്തിന്റെ ക്രെഡിറ്റ് ഏറ്റെടുക്കാൻ ചിലർ നാടകം കളിക്കുകയാണെന്നായിരുന്നു അശ്വിനിയുടെ വിമർശനം. അതേസമയം സുരേന്ദ്രൻ്റെ പരാമർശങ്ങളെ കുറിച്ചുള്ള ചോദ്യങ്ങൾക്ക് ഞങ്ങൾ എല്ലാം ഒന്നാണെന്ന മറുപടിയാണ് അവർ നൽകിയത്. സുരേന്ദ്രൻ ഇവിടെ വാർത്താസമ്മേളനത്തിൽ എത്തേണ്ടിരുന്നുവെന്നും ചില അസൗകര്യങ്ങളാൽ സാധിച്ചില്ലെന്നും അശ്വനി കൂട്ടിച്ചേർത്തു. 

ആക്ഷൻ കമ്മിറ്റിക്ക് എതിരെയും വിമർശനം

ടോൾ വിരുദ്ധ പോരാട്ടത്തിന് നേതൃത്വം നൽകിയ എ കെ എം അഷ്റഫ് എംഎൽഎയുടെ നേതൃത്വത്തിലുള്ള ആക്ഷൻ കമ്മിറ്റിയുടെ നീക്കങ്ങളെയും അശ്വിനി നിശിതമായി വിമർശിച്ചു. ആക്ഷൻ കമ്മിറ്റി നടത്തിയത് വെറും നാടകമായിരുന്നുവെന്നും ജനകീയ പ്രശ്നങ്ങളിൽ ബിജെപി എപ്പോഴും ജനപക്ഷത്താണെന്നും അവർ അവകാശപ്പെട്ടു. വരാനിരിക്കുന്ന നിയമസഭാ തിരഞ്ഞെടുപ്പിൽ മഞ്ചേശ്വരം മണ്ഡലത്തിൽ സജീവമാകാൻ ഒരുങ്ങുന്ന കെ സുരേന്ദ്രനും ജില്ലാ നേതൃത്വവും തമ്മിലുള്ള ഈ തർക്കം വരും ദിവസങ്ങളിൽ ബിജെപിയിൽ കൂടുതൽ കലുഷിതമായ സാഹചര്യം സൃഷ്ടിക്കാൻ ഇടയുണ്ട്.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്തുമല്ലോ.

Article Summary: BJP District President ML Ashwini attributes the Kumbala toll closure to Rajeev Chandrasekhar's efforts, leading to an internal credit war with K Surendran.

#KumbalaTollPlaza #KasaragodBJP #RajeevChandrasekhar #MLAshwini #KSurendran #NitinGadkari #KeralaPolitics #ManjeshwarNews #KasaragodNews