വി കെ നിഷാദിന്റെ പരോൾ ചട്ടലംഘനം: റദ്ദാക്കണമെന്ന് ബിജെപി കണ്ണൂർ നോർത്ത് ജില്ലാ പ്രസിഡന്റ് കെ കെ വിനോദ് കുമാർ

കണ്ണൂർ: (KVARTHA) പോലീസിനെ ബോംബെറിഞ്ഞ് വധിക്കാൻ ശ്രമിച്ച കേസിൽ ശിക്ഷിക്കപ്പെട്ട് ജയിലിൽ കഴിയുന്ന സിപിഎം പയ്യന്നൂർ ഏരിയാ കമ്മിറ്റി അംഗം വി കെ നിഷാദിന് ജയിൽ വകുപ്പ് പരോൾ അനുവദിച്ചത് ചട്ടങ്ങൾ ലംഘിച്ചാണെന്നും ഇത് റദ്ദാക്കാൻ അധികൃതർ തയ്യാറാകണമെന്നും ബിജെപി കണ്ണൂർ നോർത്ത് ജില്ലാ പ്രസിഡന്റ് കെ കെ വിനോദ് കുമാർ ആവശ്യപ്പെട്ടു. ശനിയാഴ്ച കണ്ണൂരിൽ വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം.

ഇരുപത് വർഷത്തേക്ക് ശിക്ഷിക്കപ്പെട്ട നിഷാദ് ഒരു മാസം തികയും മുൻപേ പരോളിൽ ഇറങ്ങിയത് ദുരൂഹമാണ്. നിരവധി വീടുകൾ ആക്രമിച്ചതും പൊതുമുതൽ നശിപ്പിച്ചതും ഉൾപ്പെടെ പതിനെട്ട് ക്രിമിനൽ കേസുകളിൽ പ്രതിയാണ് നിഷാദ്. ഇതിൽ രാഷ്ട്രീയ എതിരാളികളെ മാത്രമല്ല, സ്വന്തം പാർട്ടിയിലുള്ളവരെ ആക്രമിച്ച കേസിലും ഇയാൾ പ്രതിയാണെന്ന് വിനോദ് കുമാർ ചൂണ്ടിക്കാട്ടി.

പിതാവിന്റെ കാൽമുട്ടിനുള്ള ശസ്ത്രക്രിയയ്ക്ക് വേണ്ടിയെന്ന് ആവശ്യപ്പെട്ടാണ് പരോൾ നേടിയതെങ്കിലും ഇത് വസ്തുതാവിരുദ്ധമാണ്. മൂന്നാഴ്ച മുൻപേ പിതാവിന്റെ ശസ്ത്രക്രിയ കഴിഞ്ഞതാണ്. 

തെറ്റായ വിവരം നൽകി ജയിൽ വകുപ്പിനെ തെറ്റിദ്ധരിപ്പിച്ച് നിഷാദ് പരോൾ നേടിയത് ജനപ്രതിനിധിയെന്ന നിലയിൽ സത്യപ്രതിജ്ഞ ചെയ്യാനാണെന്ന് വിനോദ് കുമാർ ആരോപിച്ചു. ലോക്കൽ പോലീസും കണ്ണൂർ റൂറൽ എസ്പിയും ജയിൽ വകുപ്പും എന്ത് അടിസ്ഥാനത്തിലാണ് ക്ലിയറൻസ് റിപ്പോർട്ട് നൽകിയതെന്ന് പരിശോധിക്കണമെന്നും അദ്ദേഹം ആവശ്യപ്പെട്ടു.

കഴിഞ്ഞ ഒരു മാസത്തിനിടെ അധികൃതർ എന്ത് വിലയിരുത്തലാണ് നടത്തിയിട്ടുള്ളത്. പരോൾ അനുവദിക്കുന്നതിന് എല്ലാ ചട്ടങ്ങളും ലംഘിക്കപ്പെട്ടുവെന്ന് വ്യക്തമാണ്. ഇത്തരത്തിൽ അനധികൃത പരോൾ നൽകിയാൽ അത് കേസിന്റെ തുടർനടപടികളെ സ്വാധീനിക്കാൻ ഇടയാക്കും. 

പരോളിന്റെ മറവിൽ നിഷാദ് സാക്ഷികളെ ഭീഷണിപ്പെടുത്തിയതായി ഇപ്പോൾ തന്നെ വിവരങ്ങൾ ലഭിച്ചിട്ടുണ്ട്. ഉദ്യോഗസ്ഥർ പരോളിനായി കൈക്കൂലി വാങ്ങിയതായി ഏതാനും ദിവസം മുൻപേ വാർത്തകൾ വന്നിരുന്നു. കൊടി സുനിയെപ്പോലുള്ളവരാണ് ഇപ്പോൾ ജയിൽ നിയന്ത്രിക്കുന്നതെന്നും അദ്ദേഹം കുറ്റപ്പെടുത്തി.

നിയമവിധേയമല്ലാതെ പരോളിന്റെ മറവിൽ സത്യപ്രതിജ്ഞ ചെയ്യാൻ അധികൃതർ കൂട്ടുനിൽക്കുകയാണെന്നും ഇത് തടയാൻ ബന്ധപ്പെട്ടവർ തയ്യാറാകണമെന്നും വിനോദ് കുമാർ ആവശ്യപ്പെട്ടു. 

അനധികൃതമായി പരോൾ നൽകിയ ഉദ്യോഗസ്ഥർക്കെതിരെ നടപടി സ്വീകരിക്കണമെന്നും അദ്ദേഹം പറഞ്ഞു. ബിജെപി ജില്ലാ ജനറൽ സെക്രട്ടറി ടി സി മനോജ്, ജില്ലാ സെക്രട്ടറി എം അനീഷ് കുമാർ എന്നിവരും വാർത്താസമ്മേളനത്തിൽ പങ്കെടുത്തു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം താഴെ രേഖപ്പെടുത്തൂ. 

Article Summary: BJP Kannur North district president KK Vinod Kumar demands cancellation of CPM leader VK Nishad's parole alleging rule violations.

#VKnishad #KannurNews #BJP #CPM #ParoleControversy #KeralaPolitics