വയനാട്: (KVARTHA) വയനാട് ലോക്‌സഭാ മണ്ഡലത്തിൽ നിന്ന് കോൺഗ്രസ് നേതാവ് പ്രിയങ്ക ഗാന്ധിയെ നേരിടാൻ ബിജെപി തമിഴ്‌നാട് ഘടകത്തിന്റെ പ്രമുഖ നേതാവും നടിയുമായ ഖുശ്ബു സുന്ദറിനെ സ്ഥാനാർത്ഥിയാക്കാനുള്ള നീക്കത്തിലാണ് ബിജെപി. ബിജെപിയുടെ അന്തിമപട്ടികയിൽ താരവും ഇടം പിടിച്ചിട്ടുണ്ട്. താരത്തെ പരിഗണിക്കുന്ന കാര്യത്തിൽ കേന്ദ്രനേതൃത്വം സംസ്ഥാന ഘടകത്തോട് അഭിപ്രായം തേടി.

പരമ്പരാഗതമായി കോൺഗ്രസിന്റെ കോട്ടയായി കണക്കാക്കപ്പെടുന്ന വയനാട് ലോക്‌സഭാ മണ്ഡലത്തിൽ ബിജെപിക്ക് ശക്തമായ ഒരു സാന്നിധ്യം ഉണ്ടാക്കാനാണ് പാർട്ടി ലക്ഷ്യമിടുന്നത്. ഈ ലക്ഷ്യത്തിനായി, തമിഴ്നാട്, കേരളം എന്നീ സംസ്ഥാനങ്ങളിൽ ജനപ്രിയയായ ഖുശ്ബുവിനെ മത്സരിപ്പിക്കുന്നത് വലിയൊരു തന്ത്രമായി ബിജെപി കണക്കാക്കുന്നു.

സിനിമാ താരം കൂടിയായ സുരേഷ് ഗോപിയുടെ തൃശൂരിലെ വിജയം ബിജെപിയെ പ്രചോദിപ്പിച്ചിട്ടുണ്ട്. സമാനമായ ഒരു തന്ത്രം വയനാട്ടിലും പരീക്ഷിക്കുന്നതിലൂടെ, വോട്ടർമാരിൽ വലിയ സ്വാധീനം ചെലുത്താൻ ബിജെപിക്ക് കഴിയുമെന്നാണ് കണക്കുകൂട്ടൽ.

നാലുവർഷം മുമ്പ് കോൺഗ്രസ് വിട്ട് ബിജെപിയിൽ ചേർന്ന ഖുശ്ബു സുന്ദർ, തമിഴ്‌നാട് ബിജെപിയിൽ സജീവമായി പ്രവർത്തകയാണ്. കേരളത്തിലെ വോട്ടർമാർക്കിടയിലും ഖുശ്ബുവിന് വലിയ ആരാധകവൃന്ദമുണ്ട്.