കണ്ണൂർ ജില്ലാ പഞ്ചായത്ത് പ്രസിഡന്റായി അഡ്വ ബിനോയ് കുര്യൻ വൈസ് പ്രസിഡന്റായി ടി ഷബ്ന എന്നിവർ ചുമതലയേറ്റു

കണ്ണൂർ: (KasargodVartha) ജില്ലാ പഞ്ചായത്ത് പ്രസിഡന്റായി അഡ്വ ബിനോയ് കുര്യനും വൈസ് പ്രസിഡന്റായി ടി ഷബ്നയും തെരഞ്ഞെടുക്കപ്പെട്ടു. ഏഴിനെതിരെ 18 വോട്ട് നേടിയാണ് ബിനോയ് കുര്യൻ യുഡിഎഫിലെ ബേബി തോലേനിയെ പരാജയപ്പെടുത്തിയത്. 

എതിരാളികളില്ലാതെയായിരുന്നു ടി ഷബ്നയുടെ വിജയം. യുഡിഎഫിന് ജില്ലാ പഞ്ചായത്തിൽ വനിതാ അംഗങ്ങളില്ലാത്തതിനാൽ വൈസ് പ്രസിഡന്റ് സ്ഥാനത്തേക്ക് ആരെയും മത്സരിപ്പിച്ചിരുന്നില്ല.

സിപിഎം കണ്ണൂർ ജില്ലാ കമ്മിറ്റി അംഗങ്ങളാണ് വിജയിച്ച ഇരുവരും. ഭരണപരവും സംഘടനാപരവുമായി കഴിവുതെളിയിച്ചവരെയാണ് സിപിഎം ഭരണതലത്തിലേക്ക് പരിഗണിച്ചത്. കണ്ണൂർ ജില്ലാ പ്രസിഡന്റായി പ്രവർത്തിച്ച ബിനോയ് കുര്യനും കോട്ടയം ഗ്രാമപഞ്ചായത്ത് പ്രസിഡന്റായി പ്രവർത്തിച്ച ഷബ്നയും മികച്ച അനുഭവ സമ്പത്തുമായാണ് ജില്ലാ പഞ്ചായത്ത് സാരഥ്യത്തിലെത്തുന്നത്.

ജില്ലാ പഞ്ചായത്തിൽ എൽഡിഎഫിന് നിലവിൽ 18 സീറ്റുകളുണ്ട്. കഴിഞ്ഞ തവണ 17 ഡിവിഷനുകളിൽ വിജയം നേടിയ എൽഡിഎഫ് ഇത്തവണ സീറ്റ് നില പതിനെട്ടായി ഉയർത്തി. പെരളശേരി ഡിവിഷനിൽ നിന്നാണ് ബിനോയ് കുര്യൻ വിജയിച്ചത്. പാട്യം ഡിവിഷനിൽ നിന്നാണ് ടി ഷബ്ന തെരഞ്ഞെടുക്കപ്പെട്ടത്.

സംസ്ഥാന തലത്തിൽ തന്നെ വലിയ ചർച്ചകൾക്ക് വഴിവെച്ചതായിരുന്നു കഴിഞ്ഞ എൽഡിഎഫ് ജില്ലാ പഞ്ചായത്ത് ഭരണം. ഭരണപരമായ ഒട്ടേറെ നേട്ടങ്ങൾ ഉയർത്തിക്കാട്ടാനുണ്ടെങ്കിലും എഡിഎം നവീൻ ബാബു മരിച്ച നിലയിൽ കണ്ടെത്തിയ സംഭവവും, ആത്മഹത്യ പ്രേരണാ കുറ്റത്തിന് അന്നത്തെ ജില്ലാ പഞ്ചായത്ത് പ്രസിഡന്റ് പി പി ദിവ്യ പ്രതിയായി റിമാൻഡിലായതും സിപിഎമ്മിന് കടുത്ത പ്രതിസന്ധി സൃഷ്ടിച്ചിരുന്നു. ഈ പ്രതിസന്ധികളെല്ലാം തരണം ചെയ്തുകൊണ്ടാണ് കണ്ണൂർ ജില്ലാ പഞ്ചായത്തിൽ എൽഡിഎഫ് മികച്ച വിജയം നേടിയത്.

കണ്ണൂർ ജില്ലാ പഞ്ചായത്തിന്റെ പുതിയ നേതൃത്വത്തെ കുറിച്ചുള്ള ഈ വാർത്ത ഷെയർ ചെയ്യൂ. 

Article Summary: Adv Binoy Kurian and T Shabna elected as the new leaders of Kannur District Panchayat.

#Kannur #DistrictPanchayat #LDF #BinoyKurian #Shabna #KeralaPolitics