ആന്തൂരിൽ യുഡിഎഫ് സ്ഥാനാർത്ഥിക്ക് വേണ്ടി വ്യാജ ഒപ്പിട്ട് പത്രിക നൽകിയെന്ന പരാതി: നിർദേശകനെ ഭീഷണിപ്പെടുത്തിയതിന് 6 പേർക്കെതിരെ കേസ്

കണ്ണൂർ: (KVARTHA) ആന്തൂർ നഗരസഭയിലെ യുഡിഎഫ് സ്ഥാനാർത്ഥികളുടെ പത്രിക തള്ളിയ വിവാദത്തിന് പിന്നാലെ, നാമനിർദേശകനെ ഭീഷണിപ്പെടുത്തിയതിന് യുഡിഎഫ് പ്രവർത്തകർക്കെതിരെ തളിപ്പറമ്പ് പൊലീസ് കേസെടുത്തു. ആറ് പേർക്കെതിരെയാണ് കേസ്. യുഡിഎഫ് സ്ഥാനാർത്ഥിയുടെ പത്രികയിൽ നിർദേശക സ്ഥാനത്ത് പേരുണ്ടായിരുന്ന കെ പി കൃഷ്ണന്റെ പരാതിയിലാണ് പോലീസ് നടപടി.

പത്രികയിലേത് തന്റെ ഒപ്പല്ലെന്ന് സത്യവാങ്മൂലം നൽകിയതിന് തന്നെ ഭീഷണിപ്പെടുത്തി എന്നായിരുന്നു കൃഷ്ണന്റെ പരാതി. പത്രികയിലേത് തൻ്റെ ഒപ്പല്ലെന്ന് കെ പി കൃഷ്ണൻ വ്യക്തമാക്കിയതോടെ യുഡിഎഫ് സ്ഥാനാർത്ഥിയുടെ പത്രിക വരണാധികാരി തള്ളിയിരുന്നു. ഇതിന് പിന്നാലെ നഗരസഭാ ഓഫീസിന് മുന്നിൽ വെച്ച് യുഡിഎഫ് പ്രവർത്തകർ ചീത്തവിളിക്കുകയും ഭീഷണിപ്പെടുത്തുകയും ചെയ്തുവെന്ന് കെ പി കൃഷ്ണൻ പരാതിയിൽ പറയുന്നു.

അതേസമയം, നിർദേശകനെ സിപിഎം പ്രവർത്തകർ ഭീഷണിപ്പെടുത്തിയെന്നായിരുന്നു യുഡിഎഫിന്റെ ആരോപണം. യുഡിഎഫ് സ്ഥാനാർത്ഥിയെ നിർദ്ദേശിക്കുകയോ ഒപ്പിട്ട് നൽകുകയോ ചെയ്തിട്ടില്ലെന്ന് ചൂണ്ടിക്കാട്ടി പറശ്ശിനിക്കടവ് സ്വദേശിയായ കെ പി കൃഷ്ണൻ രണ്ട് ദിവസം മുമ്പാണ് തളിപ്പറമ്പ് പോലീസിൽ പരാതി നൽകിയത്. സ്ഥാനാർത്ഥിയായ ഷമീമയെ തനിക്ക് പരിചയമില്ലെന്നും, സ്ഥാനാർത്ഥിത്വത്തെ നിർദേശിക്കുകയോ ഒപ്പിട്ടുനൽകുകയോ ചെയ്തിട്ടില്ലെന്നും പരാതിയിൽ പറഞ്ഞിരുന്നു.

ആന്തൂരിൽ 'ഏതാണ്ട് കോൺഗ്രസാണെന്ന് തോന്നുന്നവരുടെ' വ്യാജ ഒപ്പിട്ടാണ് പത്രിക നൽകാൻ ശ്രമിക്കുന്നതെന്ന് സിപിഎം കണ്ണൂർ ജില്ലാ സെക്രട്ടറി കെ കെ രാഗേഷ് വിമർശിച്ചിരുന്നു. 'തിരഞ്ഞെടുപ്പ് പ്രക്രിയയെ അട്ടിമറിക്കുന്ന ഗുരുതരമായ നിയമലംഘനമാണ് വ്യാജരേഖ ചമയ്ക്കൽ. ഇതിൽ പങ്കെടുത്ത എല്ലാവരെയും നിയമത്തിൻ്റെയും അന്വേഷണത്തിൻ്റെയും മുന്നിൽ കൊണ്ടുവരേണ്ടതുണ്ടെ'ന്നും കെ കെ രാഗേഷ് ആവശ്യപ്പെട്ടു.

വ്യാജ ഒപ്പിട്ടെന്ന പരാതിയിൽ നിങ്ങളുടെ അഭിപ്രായം കമൻ്റ് ചെയ്യുക. 

Article Summary: Police filed a case against six UDF workers in Anthoor for threatening a proposer after nomination paper rejection over an alleged fake signature.

#Anthoor #UDF #NominationRejection #FakeSignature #KannurPolitics #KeralaElection