Criticism | കായംകുളം സംഭവം: പൊലീസുകാര്ക്കെതിരെ നടപടിയെടുക്കണം; സിപിഎം ഗുണ്ടാ സംഘമായി പൊലീസ് മാറി: വി ഡി സതീശൻ
തിരുവനന്തപുരം: (KVARTHA) കായംകുളത്ത് ഉയരപ്പാത നിർമാണത്തിനായി സമരം ചെയ്ത യൂത്ത് കോൺഗ്രസ് നേതാക്കളുടെ വീടുകൾ ആക്രമിച്ച സംഭവത്തിൽ പൊലീസിനെതിരെ പ്രതിപക്ഷ നേതാവ് വി.ഡി. സതീശൻ കടുത്ത വിമർശനവുമായി രംഗത്ത്. പുലർച്ചെ രണ്ട് മണിയോടെ ഗുണ്ടാ സംഘങ്ങളെപ്പോലെ പൊലീസ് യൂത്ത് കോൺഗ്രസ് നേതാക്കളുടെ വീടുകളിലെത്തിയെന്നും, അവരെ അനധികൃതമായി അറസ്റ്റ് ചെയ്തെന്നും സതീശൻ ആരോപിച്ചു.
‘ജനകീയ ആവശ്യത്തിനായി സമരം ചെയ്തവരെ പൊലീസ് അക്രമിച്ചു, അവർക്കെതിരെ വ്യാജക്കേസുകൾ ചുമത്തി. ജനാധിപത്യ രാജ്യത്ത് സമരം ചെയ്യാനുള്ള അവകാശം എല്ലാവർക്കുമുണ്ടെന്നും, സമരങ്ങളെ അടിച്ചമർത്താൻ പൊലീസിന് അധികാരമില്ലെന്നും അദ്ദേഹം വ്യക്തമാക്കി.
സിപിഎം നേതാക്കളുടെ നിർദ്ദേശപ്രകാരമാണ് പൊലീസ് ഈ അതിക്രമം നടത്തിയതെന്ന സംശയം സതീശൻ പ്രകടിപ്പിച്ചു. കേരളത്തിലെ പൊലീസ് സിപിഎം ഗുണ്ടാ സംഘമായി മാറിയെന്നും, ഇത്തരം ക്രിമിനൽ പ്രവർത്തനങ്ങൾ നടത്തുന്ന പൊലീസുകാരെ നിയന്ത്രിക്കാൻ സർക്കാർ പരാജയപ്പെട്ടെന്നും അദ്ദേഹം ആരോപിച്ചു.
കായംകുളത്തെ അക്രമണത്തിന് പിന്നിലുള്ള പൊലീസ് ഉദ്യോഗസ്ഥർക്കെതിരെ കർശന നടപടിയെടുക്കണമെന്നും, മുഖ്യമന്ത്രി ഇടപെട്ട് സംഭവത്തിൽ അന്വേഷണം നടത്തണമെന്നും സതീശൻ ആവശ്യപ്പെട്ടു.
