തിരുവനന്തപുരം: (KVARTHA) മലയാളികളുടെ പൊന്നോണത്തിന് അവസാനവട്ട ഒരുക്കങ്ങളാണ് നാടെങ്ങും. ഉത്രാടപ്പാച്ചിലിന്റെ ആവേശത്തിലാണ് നാടും നഗരവും. ഓണസദ്യയുടെ വിശിഷ്ട വിഭവങ്ങൾ മുതൽ പുത്തൻ വസ്ത്രങ്ങൾ വരെ, എല്ലാത്തിനും അവസാനവട്ട ഒരുക്കങ്ങളാണ് ഉത്രാടം ദിവസത്തിൽ നടക്കുന്നത്. കേരളത്തിനകത്തും പുറത്തും വിദേശത്തുമായി ലോകമെമ്പാടുമുള്ള മലയാളികൾ ഉത്രാടപ്പാച്ചിലിന്റെ ആഘോഷത്തിൽ മുഴുകിയിരിക്കുകയാണ്.

പച്ചക്കറി, പലചരക്ക് കടകളിൽ അടക്കം സദ്യയ്ക്കുള്ള വിശേഷ വിഭവങ്ങൾ തേടിയെത്തുന്ന ആളുകളാൽ നിറഞ്ഞുകവിഞ്ഞു. ഓണക്കോടി വാങ്ങാൻ തുണിക്കടകളിലും തിരക്കേറി. കൈത്തറി പട്ടുസാരികൾ, കസവു സാരികൾ തുടങ്ങി പരമ്പരാഗത വസ്ത്രങ്ങൾക്ക് ആവശ്യക്കാർ ഏറെയാണ്. ഓണക്കാലത്ത് വില കൂടാറുള്ള ചില സാധനങ്ങളുടെ വിലയിൽ വർധനവുണ്ടായെങ്കിലും മലയാളികൾ ഓണം ആഘോഷിക്കാൻ തയ്യാറാണ്. പ്രധാന കച്ചവട കേന്ദ്രങ്ങളിലെല്ലാം വലിയ തിരക്കാണ് അനുഭവപ്പെടുന്നത്.

ഉത്രാടം നാൾ കേരളത്തിലെ ഓരോ വീട്ടിലും ആഘോഷത്തിന്റെ നിറക്കൂട്ടാണ്. ഓണസദ്യയ്ക്കുള്ള വിഭവങ്ങൾ തയ്യാറാക്കുന്ന തിരക്കിലാണ് വീട്ടമ്മമാർ. പുളി ഇഞ്ചി, ഉപ്പേരി, അച്ചാറുകൾ തുടങ്ങിയവയുടെ നിർമ്മാണം ഉത്രാട ദിവസം പൂർത്തിയാക്കുന്ന പതിവുണ്ട്. ഓണത്തെ അനുസ്മരിപ്പിക്കുന്ന മറ്റൊരു പ്രധാന കാഴ്ചയാണ് പൂക്കളം. അത്തം മുതൽ ഉത്രാടം വരെ ദിവസവും പൂക്കളം വലുതാക്കിക്കൊണ്ടുപോകുന്ന പതിവുണ്ട്. തുമ്പപ്പൂവ്, ചെമ്പകം, മുല്ല എന്നിവയാണ് പൂക്കളത്തിന് സാധാരണയായി ഉപയോഗിക്കുന്നത്. 

സർകാരും വിവിധ സംഘടനകളും ഓണക്കാലത്ത് വിലക്കുറവിൽ സാധനങ്ങൾ ലഭ്യമാക്കുന്നതിന് വിപണിയിൽ ഇടപെട്ടിട്ടുണ്ട്. കൃഷിവകുപ്പ്, സപ്ലൈകോ, കുടുംബശ്രീ തുടങ്ങിയ സർകാർ സ്ഥാപനങ്ങളും വിവിധ സംഘടനകളും ഓണച്ചന്തകൾ ഒരുക്കിയിട്ടുണ്ട്. ഇത്തരം ചന്തകളിൽ വിലക്കുറവിൽ സാധനങ്ങൾ ലഭിക്കുന്നത് സാധാരണക്കാർക്ക് ആശ്വാസമാണ്. ഓണാഘോഷം കേരളത്തിന്റെ സമൃദ്ധിയുടെയും സന്തോഷത്തിന്റെയും പ്രതീകമാണ്. കാണാം വിറ്റും ഓണം ഉണ്ണണമെന്ന പഴമൊഴി അന്വർഥമാക്കുകയാണ് മലയാളികൾ.

#Onam #Kerala #India #festival #OnamSadya #OnamCelebrations #KeralaCulture #IndianFestival