Olympic Dream | പാരിസിൽ പുത്തൻ വെല്ലുവിളിയിലേക്ക് നീരജ് ചോപ്രയും കിഷോർ കുമാർ ജാനും

പാരിസ്: (KVARTHA) ഒളിമ്പിക്‌സ് ജാവലിൻ ത്രോയിലെ (Javelin Throw) യോഗ്യതാ റൗണ്ടിൽ (Qualification Round) ഇന്ത്യയുടെ പ്രതീക്ഷയായ നീരജ് ചോപ്ര ചൊവ്വാഴ്ച അരങ്ങേറുന്നു. നിലവിലെ ഒളിമ്പിക് ചാമ്പ്യനും ലോക ചാമ്പ്യനും ഏഷ്യൻ ഗെയിംസ് ചാമ്പ്യനുമായ (Asian Games Champion) നീരജിന്റെ പ്രകടനത്തെയാണ് ഇന്ത്യ മുഴുവൻ കാത്തിരിക്കുന്നത്. തുടയിലെ പേശി പിടുത്തം (Muscle Injury) കാരണം സീസണിലെ പല മത്സരങ്ങളും നഷ്ടമായെങ്കിലും, ആവശ്യത്തിന് വിശ്രമം എടുത്ത് പൂർണ തയ്യാറെടുപ്പോടെ 26-കാരനായ നീരജ് മത്സരത്തിനിറങ്ങുമ്പോൾ രാജ്യം വലിയ പ്രതീക്ഷയിലാണ്..

ഏഷ്യൻ ഗെയിംസിൽ വെള്ളി നേടിയ കിഷോർ കുമാർ ജാനും (Kishore Kumar Jena) ഇന്ത്യയുടെ പ്രതീക്ഷയാണ്. 2021-ലെ ടോക്കിയോ ഒളിമ്പിക്സിൽ (Tokyo Olympics) ഓഗസ്റ്റ് ഏഴിനായിരുന്നു നീരജ് സ്വർണം നേടിയത്. ഇത്തവണ ഓഗസ്റ്റ് എട്ടിനാണ്  നീരജിന് ഫൈനൽ മത്സരം.

കഴിഞ്ഞ മേയിൽ ദോഹ ഡയമണ്ട് ലീഗിൽ (Doha Diamond League) 88.36 മീറ്റർ ദൂരം എറിഞ്ഞ് വെള്ളി നേടിയ നീരജ്, തുടർന്ന് പരുക്കേറ്റതിനെതുടർന്ന് ചെക്ക് റിപ്പബ്ലിക്കിലെ ഒസ്ട്രാവ ഗോൾഡൻ സ്പൈക്ക് മീറ്റിൽ നിന്ന് പിൻമാറി. അതിനുശേഷം, ജൂണിൽ ഫിൻലൻഡിൽ നടന്ന പാവോ നൂർമി ഗെയിംസിൽ (Paavo Nurmi Games) 85.97 മീറ്റർ ദൂരം എറിഞ്ഞ് സ്വർണം നേടി തിരിച്ചെത്തി. ഒളിമ്പിക്സിന് മുമ്പ് പാരിസിൽ നടന്ന ഡയമണ്ട് ലീഗിൽ മത്സരിച്ചില്ല. ഏഷ്യൻ ഗെയിംസിൽ 87.54 മീറ്റർ എറിഞ്ഞ് കിഷോർ കുമാർ ജാനും നീരജ് ചോപ്രയും ഒളിമ്പിക് യോഗ്യത നേടിയിരുന്നു.

യോഗ്യതാ റൗണ്ടിൽ 32 താരങ്ങൾ മത്സരിക്കും. ഇവരെ എ, ബി ഗ്രൂപ്പുകളായി തരംതിരിച്ചിരിക്കുന്നു. ഫൈനലിലെത്താൻ 84 മീറ്റർ എറിയണം. ഈ ദൂരം എറിയുന്നവർക്കെല്ലാം യോഗ്യത ലഭിക്കും. അല്ലെങ്കിൽ ഏറ്റവും മികച്ച 12 എറിയലുകൾക്ക് ഫൈനൽ സ്ഥാനം ലഭിക്കും. കിഷോർ കുമാർ ജാൻ ഉൾപ്പെടുന്ന ഗ്രൂപ്പ് എയുടെ മത്സരം ഇന്ത്യൻ സമയം ഉച്ചയ്ക്ക് 1.50-നും, നീരജ് ചോപ്ര ഉൾപ്പെടുന്ന ഗ്രൂപ്പ് ബിയുടെ മത്സരം ഉച്ചയ്ക്ക് 3.20-നും തുടങ്ങും. പാക്കിസ്ഥാന്റെ അർഷാദ് നദീം നീരജിന്റെ ഗ്രൂപ്പിലാണ് മത്സരിക്കുക.