ആലക്കോട് മരം മുറിക്കുന്നതിനിടെ അപകടം; തലയിൽ മരം വീണ് തൊഴിലാളിക്ക് ദാരുണാന്ത്യം

തളിപ്പറമ്പ്: (KVARTHA) ആലക്കോട് മൂന്നാംതോടിൽ മരം മുറിക്കുന്നതിനിടെ മരം തലയിൽ വീണ് തൊഴിലാളിക്ക് ദാരുണാന്ത്യം. ഉദയഗിരി പഞ്ചായത്തിലെ ലഡാക്ക് സ്വദേശി പുതുശ്ശേരി മോഹനൻ (54) ആണ് മരിച്ചത്. മൂന്നാംതോടില്‍ ഒരു സ്വകാര്യ വ്യക്തിയുടെ പറമ്പില്‍ മരം മുറിക്കുന്നതിനിടെയാണ് അപ്രതീക്ഷിതമായി മരം തലയിലേക്ക് വീണത്.

ഞായറാഴ്ച രാവിലെ 11 മണിയോടെയായിരുന്നു നാടിനെ നടുക്കിയ അപകടം നടന്നത്. ഗുരുതരമായി പരിക്കേറ്റ മോഹനനെ ഉടൻ തന്നെ ആശുപത്രിയിലെത്തിക്കാൻ ശ്രമിച്ചെങ്കിലും ജീവൻ രക്ഷിക്കാനായില്ല.

പോസ്റ്റ്മോർട്ടവും സംസ്കാരവും

വിവരമറിഞ്ഞെത്തിയ ആലക്കോട് പൊലീസ് ഇൻക്വസ്റ്റ് നടപടികൾ പൂർത്തിയാക്കി. തുടർന്ന് മൃതദേഹം പോസ്റ്റ്മോർട്ടത്തിനായി പരിയാരത്തെ കണ്ണൂർ ഗവ. മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റി. മോഹനൻ്റെ അപ്രതീക്ഷിത വിയോഗം കുടുംബത്തെയും നാട്ടുകാരെയും കടുത്ത ദുഃഖത്തിലാഴ്ത്തി.

ചെമ്മരൻ്റെയും നാരായണിയുടെയും മകനാണ് മരിച്ച മോഹനൻ. മിനിയാണ് ഭാര്യ. മക്കൾ: സ്നേഹ, സേതു. സഹോദരങ്ങൾ: കൃഷ്ണൻ, വിജയൻ. മോഹനൻ്റെ സംസ്കാരം തിങ്കളാഴ്ച പകൽ 12-ന് വീട്ടുവളപ്പിൽ വെച്ച് നടത്തുമെന്ന് ബന്ധുക്കൾ അറിയിച്ചു.

 പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: A 54-year-old worker, Puthusseri Mohanan, died after a tree fell on his head in Alakode.

#AlakodeNews #Taliparamba #KannurNews #WorkerDeath #TragicAccident #KeralaNews #Moonnamthode #AmmuNews