Found Dead | തനിച്ച് താമസിച്ചിരുന്ന ബി എസ് എന്‍ എല്‍ മുന്‍ ഉദ്യോഗസ്ഥയെ വീട്ടില്‍ മരിച്ച നിലയില്‍ കണ്ടെത്തി

തലശേരി: (www.kvartha.com) തനിച്ച് താമസിച്ചിരുന്ന  ബി എസ് എന്‍ എല്‍ മുന്‍  ഉദ്യോഗസ്ഥയെ വീട്ടില്‍ മരിച്ച നിലയില്‍ കണ്ടെത്തി. ചിറക്കര കുഴിപ്പങ്ങാട്ടെ കളത്തില്‍ വീട്ടില്‍ കെ പ്രഭാവതിയെയാണ് (74) വീട്ടിനകത്ത് മരിച്ച നിലയില്‍ കാണപ്പെട്ടത്. അവിവാഹിതയാണ്. സമീപത്ത് തന്നെ ബന്ധുക്കള്‍ ഉണ്ടെങ്കിലും ആരുമായും ഇവര്‍ ബന്ധം പുലര്‍ത്താറില്ലെന്നാണ് സമീപവാസികള്‍ പറയുന്നത്.

ബന്ധുവായ സ്ത്രീ പല തവണ ഫോണില്‍ വിളിച്ചെങ്കിലും മറുപടി ലഭിക്കാത്തതിനെ തുടര്‍ന്ന് ഇവരുടെ സഹോദരന്റെ മകനെ വിളിച്ച് വിവരം പറയുകയായിരുന്നു. തുടര്‍ന്ന് വ്യാഴാഴ്ച ഉച്ചയോടെ വീട്ടിലെത്തിയപ്പോഴാണ് വീടിന്റെ നടുത്തളത്തില്‍ ഇവരെ മരിച്ച നിലയില്‍ കാണുന്നത്.

തലശ്ശേരി പൊലീസില്‍ വിവരം അറിയിച്ചതിനെ തുടര്‍ന്ന് സ്ഥലത്തെത്തി പരിശോധന നടത്തി. മൃതദേഹത്തിന് രണ്ട് ദിവസമെങ്കിലും പഴക്കമുണ്ടെന്ന് കരുതുന്നതായി പൊലീസ് അറിയിച്ചു. ഇന്‍ക്വസ്റ്റ് നടത്തിയ മൃതദേഹം പോസ്റ്റ്‌മോര്‍ടത്തിനായി തലശ്ശേരി ജെനറല്‍ ആശുപത്രി മോര്‍ചറിയിലേക്ക് മാറ്റി.


പരേതനായ കുമാരന്റെ മകളാണ്. വീടിന്റെ മുന്‍ വശത്തെ ഗ്രില്‍സ് പൂട്ടിയ നിലയിലായിരുന്നു. ഫോറന്‍സിക്, വിരലടയാളവിദഗ്ധരും സ്ഥലത്ത് പരിശോധന നടത്തി. ആറാം തീയതി മുതലുള്ള ന്യൂസ് പേപറുകള്‍ ഗേറ്റിന് സമീപത്ത് നിന്ന് കണ്ടെത്തിയിട്ടുണ്ട്. ഇവര്‍ അയല്‍ വീട്ടുകാരോടും വലിയ അടുപ്പം സൂക്ഷിച്ചിരുന്നില്ലെന്നാണ് ലഭിക്കുന്ന വിവരം.

പൊലീസ് പരിശോധന പൂര്‍ത്തിയായാല്‍ മാത്രമേ മരണം സംബന്ധിച്ച് കൂടുതല്‍ വ്യക്തത വരികയുള്ളൂ. വീട്ടിലെ സിസിടിവി ദൃശ്യങ്ങളും പൊലീസ് പരിശോധിക്കുന്നുണ്ട്.

Keywords:  Woman Found Dead in House, Thalassery, News, Police, Dead Body, Obituary, Kerala.