വിപ്ലവ നക്ഷത്രം അസ്തമിച്ചു; മുൻ മുഖ്യമന്ത്രി വി എസ് അച്യുതാനന്ദൻ ഓർമ്മയായി

തിരുവനന്തപുരം: (KVARTHA) കേരള രാഷ്ട്രീയത്തിലെ അതികായനും മുൻ മുഖ്യമന്ത്രിയും മുതിർന്ന സിപിഎം നേതാവുമായിരുന്ന വി.എസ്. അച്യുതാനന്ദൻ (101) അന്തരിച്ചു. ഹൃദയാഘാതത്തെ തുടർന്ന് തിരുവനന്തപുരത്തെ ഒരു സ്വകാര്യ ആശുപത്രിയിൽ ചികിത്സയിലിരിക്കെയായിരുന്നു അന്ത്യം. കേരളത്തിന്റെ സാമൂഹിക-രാഷ്ട്രീയ ചരിത്രത്തോട് ഇഴചേർന്നതായിരുന്നു വിഎസിന്റെ ജീവിതം.

വി.എസ്. അച്യുതാനന്ദൻ: ഒരു വിപ്ലവ ജീവിതം

1923 ഒക്ടോബർ 20-ന് ആലപ്പുഴയിലെ വെന്തലത്തറ വീട്ടിൽ ശങ്കരന്റെയും അക്കാമ്മയുടെയും മകനായാണ് വേലിക്കകത്ത് ശങ്കരൻ അച്യുതാനന്ദൻ എന്ന വി.എസ്. അച്യുതാനന്ദൻ ജനിച്ചത്. 

നാലാം വയസ്സിൽ അമ്മയെയും പതിനൊന്നാം വയസ്സിൽ അച്ഛനെയും നഷ്ടപ്പെട്ടതോടെ അനാഥത്വവും ദാരിദ്ര്യവും അദ്ദേഹത്തിന്റെ ബാല്യത്തെ കാർന്നുതിന്നു. എന്നാൽ, പഠിക്കാനുള്ള മോഹം വിഎസ് ഒരിക്കലും ഉപേക്ഷിച്ചില്ല. 

ജാതി വ്യവസ്ഥ രൂക്ഷമായിരുന്ന അക്കാലത്ത്, സവർണ്ണ കുട്ടികൾ "ചോവച്ചെറുക്കൻ" എന്ന് വിളിച്ച് ആക്ഷേപിച്ചപ്പോൾ പ്രതികരിക്കാൻ അദ്ദേഹത്തിന് മടിയുണ്ടായിരുന്നില്ല. അന്നുമുതൽ വ്യവസ്ഥിതിയോടുള്ള കലഹം വിഎസിന്റെ ജീവിതത്തിന്റെ ഭാഗമായി മാറി. ഒരു നേരത്തെ ആഹാരത്തിനുപോലും വകയില്ലാതായതോടെ ഏഴാം ക്ലാസ്സിൽ വെച്ച് പഠനം അവസാനിപ്പിക്കേണ്ടി വന്നു.

പോരാട്ടങ്ങളുടെ തുടക്കം

ജ്യേഷ്ഠന്റെ തയ്യൽക്കടയിലെ ചെറിയ വരുമാനം കൊണ്ട് വീട്ടിലെ വിശപ്പടക്കാൻ കഴിയാതെ വന്നപ്പോൾ, പതിനഞ്ചാം വയസ്സിൽ ആസ്പിൻവാൾ കമ്പനിയിൽ ജോലിക്കു കയറി. നടുവൊടിക്കുന്ന ജോലിയും കുറഞ്ഞ കൂലിയും മോശമായ തൊഴിൽ സാഹചര്യങ്ങളും അവിടെയും അദ്ദേഹത്തെ കലഹിക്കാൻ പ്രേരിപ്പിച്ചു. 

തൊഴിലാളികളുടെ അവകാശങ്ങൾക്കായി നിരന്തരം ശബ്ദമുയർത്തിയ ആ പതിനാറുകാരൻ ഒരു വർഷത്തിനുള്ളിൽ തൊഴിലാളികളുടെ പ്രിയങ്കരനും മുതലാളിമാരുടെ കണ്ണിലെ കരടുമായി മാറി. 

പതിനേഴാം വയസ്സിൽ കമ്യൂണിസ്റ്റ് പാർട്ടി അംഗത്വം ലഭിച്ച വി.എസ്., 1943-ലെ പാർട്ടി സമ്മേളനത്തിൽ പ്രതിനിധിയായി പങ്കെടുത്തു. അതൊരു യുവനേതാവിന്റെ ഉദയമായിരുന്നു.

ദുരിതജീവിതം മാത്രം അറിഞ്ഞിരുന്ന തൊഴിലാളികൾക്ക് നിശ്ചയദാർഢ്യത്തിന്റെ കരുത്തും പ്രതീക്ഷയുമായി അദ്ദേഹം വളർന്നു. അദ്ദേഹത്തിന്റെ നേതൃത്വത്തിലുള്ള സംഘം പിന്നീട് കുട്ടനാട്ടിലെ കർഷകത്തൊഴിലാളികൾക്കിടയിലേക്കിറങ്ങി. 

പതിറ്റാണ്ടുകളായി ജന്മിമാർക്കുമുന്നിൽ ഓച്ഛാനിച്ച് നിന്നിരുന്ന തൊഴിലാളികൾ കൂലി വർദ്ധന ആവശ്യപ്പെട്ട് സമരം തുടങ്ങി. ‘ഇൻക്വിലാബിന്റെ’ ഇടിമുഴക്കം കുട്ടനാടിന്റെ വയലേലകളിൽ കൊടുങ്കാറ്റായി. ‘അച്യുതാനന്ദൻ എന്ന കമ്മ്യൂണിസ്റ്റ് തെമ്മാടിയെ വെട്ടിനുറുക്കി കൊല്ലാൻ’ ജന്മിമാർ ഉത്തരവിട്ടു. 

കൊടിയ മർദ്ദനങ്ങളും ചെറുത്തുനിൽപ്പുകളും പ്രതിഷേധങ്ങളും, പിന്നീട് ഐതിഹാസികമായ പുന്നപ്ര-വയലാർ സമരം എന്നിവയെല്ലാം അദ്ദേഹത്തിന്റെ ജീവിതത്തിലെ നിർണ്ണായക അധ്യായങ്ങളായി. 

ഒളിവുജീവിതവും അറസ്റ്റും ദിവസങ്ങൾ നീണ്ട പോലീസ് മർദ്ദനവും വിഎസ് അനുഭവിച്ചു. മരിച്ചെന്ന് കരുതി കാട്ടിലേക്ക് വലിച്ചെറിഞ്ഞിടത്തുനിന്നാണ് അദ്ദേഹം ജീവിതത്തിലേക്ക് തിരിച്ചു വന്നത്.

കേരള രാഷ്ട്രീയത്തിലെ അച്യുതാനന്ദൻ

1957-ൽ ആദ്യ കമ്യൂണിസ്റ്റ് സർക്കാർ അധികാരത്തിൽ വന്നതോടെ അച്യുതാനന്ദൻ സംസ്ഥാന നേതൃനിരയിലെ പ്രമുഖനായി. 1964-ലെ പാർട്ടി പിളർപ്പും നയവ്യതിയാനങ്ങൾക്കെതിരെയുള്ള പോരാട്ടങ്ങളും കടുത്ത വിഭാഗീയ പോരാട്ടങ്ങളും അദ്ദേഹത്തിന്റെ രാഷ്ട്രീയ ജീവിതത്തെ നിർവചിച്ചു. 

‘വെട്ടിപ്പിടിക്കലുകളും വെട്ടിനിരത്തലുകളും’ എന്ന പ്രയോഗങ്ങൾ അദ്ദേഹത്തിന്റെ തീവ്രമായ നിലപാടുകളെ അടയാളപ്പെടുത്തുന്നു. മാരാരിക്കുളത്തെ തോൽവി ഉൾപ്പെടെയുള്ള പ്രതിസന്ധികളെ അതിജീവിച്ച്, കേരള രാഷ്ട്രീയം ആ മനുഷ്യനൊപ്പം നിലകൊണ്ടു. 

‘വിഎസ്’ എന്ന രണ്ടക്ഷരം ലക്ഷക്കണക്കിന് ജനങ്ങൾക്ക് പ്രതീക്ഷയുടെ വെള്ളിവെളിച്ചമായി. ഇന്ത്യൻ കമ്യൂണിസ്റ്റ് പ്രസ്ഥാനത്തിന്റെ കാരണവരായി അദ്ദേഹം മാറി.

സീറ്റ് നിഷേധിച്ചവരോടും പരിഹസിച്ചവരോടും ഒറ്റപ്പെടുത്തിയവരോടുമൊക്കെ അദ്ദേഹം ‘വെടിയുണ്ടയുടെയും തൂക്കുമരത്തിന്റെയും വാരിക്കുന്തത്തിന്റെയും രക്തമിറ്റുന്ന കഥകൾ’ പറഞ്ഞ് പ്രതികരിച്ചു. ചെഞ്ചോര നിറമുള്ള ആ വിപ്ലവ ജീവിതം വിട പറയുമ്പോൾ, പതിനായിരങ്ങൾ ഇന്നും ‘കണ്ണേ... കരളേ.... എസ്സേ..’ എന്ന് ആവേശപൂർവ്വം ഏറ്റുവിളിക്കുന്നു.

വി.എസ്. അച്യുതാനന്ദൻ എന്ന നേതാവിനെക്കുറിച്ച്നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Former Kerala CM V.S. Achuthanandan (101) passed away.

#VSAchuthanandan #KeralaPolitics #CPIM #FormerCM #MalayalamNews #Kerala