പ്രശസ്ത ഗ്രന്ഥകാരൻ വി കെ ഭാസ്കരൻ മാസ്റ്റർ അന്തരിച്ചു

കണ്ണൂർ: (KVARTHA)  പ്രശസ്ത ഗ്രന്ഥകാരനും സാമൂഹിക സാംസ്കാരിക പ്രവർത്തകനുമായ ചൊക്ലി കവിയൂർ വലിയ കനിയിൽ (ഐശ്വര്യ) വി.കെ. ഭാസ്കരൻ മാസ്റ്റർ (82) നിര്യാതനായി. തലശ്ശേരി ഇന്ദിരാഗാന്ധി സഹകരണ ആശുപത്രിയുടെ സ്ഥാപക ഡയറക്ടർ എന്ന നിലയിലും ശ്രദ്ധേയനായ അദ്ദേഹം നിരവധി ഗ്രന്ഥങ്ങളുടെ കർത്താവും മികച്ച പ്രഭാഷകനുമായിരുന്നു.

കവിയൂർ ശ്രീനാരായണ മഠം പ്രസിഡന്റ്, ശ്രീനാരായണ ഗുരുധർമ്മ പ്രചാരണ സഭയുടെ കേന്ദ്ര സമിതി അംഗം, ചൊക്ലി പീപ്പിൾസ് വെൽഫെയർ കോ-ഓപ്പറേറ്റീവ് സൊസൈറ്റി ഡയറക്ടർ, ചൊക്ലിയിലെ കോടിയേരി ബാലകൃഷ്ണൻ ലൈബ്രറി വൈസ് പ്രസിഡന്റ് എന്നീ നിലകളിൽ ഭാസ്കരൻ മാസ്റ്റർ പ്രവർത്തിച്ചിട്ടുണ്ട്. 

ഒളവിലം എൽ.പി. സ്കൂളിലെ പ്രധാനാധ്യാപകൻ എന്ന നിലയിലും ചൊക്ലി വിദ്യാഭവൻ, അക്കാദമിക് കൗൺസിൽ എന്നിവയുടെ മുഖ്യ സംഘാടകൻ എന്ന നിലയിലും വിദ്യാഭ്യാസ മേഖലയിൽ അദ്ദേഹം വലിയ സംഭാവനകൾ നൽകി.

എട്ട് വാള്യങ്ങളുള്ള 'വാത്മീകി രാമായണം' മലയാള പരിഭാഷ, 'മുഹമ്മദ് മഹാനായ പ്രവാചകൻ', 'യേശുദേവൻ', 'ശ്രീനാരായണ ഗുരുദേവൻ' തുടങ്ങിയ ജീവചരിത്ര കാവ്യങ്ങൾ ഉൾപ്പെടെ നിരവധി ശ്രദ്ധേയമായ ഗ്രന്ഥങ്ങൾ അദ്ദേഹത്തിന്റെ തൂലികയിൽ നിന്ന് പിറന്നു. 

സാഹിത്യ സാംസ്കാരിക സംഘടനകളിൽ നിന്ന് അനേകം പുരസ്കാരങ്ങളും ഭാസ്കരൻ മാസ്റ്റർക്ക് ലഭിച്ചിട്ടുണ്ട്. ഇന്ത്യൻ നാഷണൽ കോൺഗ്രസ്സിന്റെ ചൊക്ലി മണ്ഡലം പ്രസിഡന്റായും ജില്ലാ കമ്മിറ്റി ഭാരവാഹിയായും പ്രവർത്തിച്ചിട്ടുണ്ട്.

പരേതയായ സി.കെ. ശാന്തകുമാരി (റിട്ട: എച്ച്.എം., വി.പി.ഒ.എച്ച്.എസ്. ചൊക്ലി) ആണ് ഭാര്യ. ഷർളി ഭാസ്കർ (ബെംഗളൂരു), ഡോ. ഷിംന ഭാസ്കർ എന്നിവരാണ് മക്കൾ. 

മോഹനൻ, ഡോ. ശ്രീ അപ്പറെഡ്ഡി എന്നിവർ മരുമക്കളാണ്. വി.കെ. ശ്രീധരൻ, വി.കെ. പ്രമോദ്, പ്രസന്ന, പരേതരായ രാമചന്ദ്രൻ, രവീന്ദ്രൻ, നിർമ്മല എന്നിവർ സഹോദരങ്ങളുമായിരുന്നു.

വി.കെ. ഭാസ്കരൻ മാസ്റ്ററുടെ സംഭാവനകളെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക, 

Article Summary (English): Renowned author and social worker V.K. Bhaskaran Master passes away at 82 in Kannur.

#VKBhaskaranMaster, #MalayalamLiterature, #Obituary, #KannurNews, #SocialWorker, #Author