ബെന്‍ഗ്ലൂറുവില്‍ ബൈകുകള്‍ കൂട്ടിയിടിച്ച് മലയാളി യുവാക്കള്‍ക്ക് ദാരുണാന്ത്യം

വയനാട് മാനന്തവാടി തലപ്പുഴ കാട്ടാംക്കോട്ടില്‍ കെ യു ജോസിന്റെ മകന്‍ ജിതിന്‍ ജോസ് (27), കോട്ടയം വലകമറ്റം സോണി ജേകബിന്റെ മകന്‍ സോനു സോണി (27) എന്നിവരാണ് മരിച്ചത്.

നഹുസ്‌കൂര്‍ ഗേറ്റിലെ താമസസ്ഥലത്തേക്കു മടങ്ങുമ്പോള്‍ എതിരെ വന്ന ബൈകുമായി കൂട്ടിയിടിച്ചാണ് അപകടം. സോനു തല്‍ക്ഷണം തന്നെ മരിച്ചു. ജിതിനെ ഹെബഗോഡിയിലെ ആശുപത്രിയിലെത്തിച്ചെങ്കിലും ചികിത്സയ്ക്കിടെ മരണം സംഭവിച്ചു. സിസിടിവി സെര്‍വീസ് സെന്റര്‍ ഉടമയാണ് ജിതിന്‍. ജിതിന്റെ മൃതദേഹം സെന്റ് ജോണ്‍സ് മെഡികല്‍ കോളജ് ആശുപത്രിയില്‍ പോസ്റ്റ്‌മോര്‍ടെത്തിനു ശേഷം കര്‍ണാടക പ്രവാസി കോണ്‍ഗ്രസ് പ്രവര്‍ത്തകരുടെ സഹായത്തോടെ നാട്ടിലേക്കു കൊണ്ടുപോയി.

മാതാവ്: ആനി. സഹോദരി: ജിജി. ജിതിന്റെ സംസ്‌കാരം ചൊവ്വാഴ്ച രാവിലെ 10.30നു മാനന്തവാടി പുതിയിടം ചെറുപുഷ്പം പള്ളിയില്‍ നടക്കുമെന്ന് ബന്ധുക്കള്‍ അറിയിച്ചു. സ്വകാര്യ സ്ഥാപനത്തിലെ ജീവനക്കാരനാണ് മരിച്ച സോനു. മാതാവ്: മിനി. സഹോദരങ്ങള്‍: മിനു, സിനു.

Keywords:  Two youths died in bike accident, Bangalore, News, Local News, Accidental Death, Malayalees, Obituary, Dead, National.