വിടവാങ്ങിയത് ദുബൈയുടെ ക്രാന്തദർശിയായ നായകൻ; പൊലീസിന്റെ അമരക്കാരൻ, കായിക മേഖലയുടെ രക്ഷാധികാരി; ഷെയ്ഖ് അഹ്‌മദ് ബിൻ റാഷിദ് ആൽ മക്തൂമിന്റെ വേർപാടിൽ കണ്ണീരണിഞ്ഞ് യു എ ഇ; 10 ദിവസത്തെ ഔദ്യോഗിക ദുഃഖാചരണം

ദുബൈ: (KVARTHA) ദുബൈ പൊലീസിന്റെയും പബ്ലിക് സർവീസിന്റെയും ഡെപ്യൂട്ടി ചെയർമാനും യു എ ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിൻ റാശിദ് ആൽ മക്തുമിന്റെ സഹോദരനുമായ ഷെയ്ഖ് അഹ്‌മദ്‌ ബിൻ റാശിദ് ആൽ മക്തുമിന്റെ നിര്യാണം യു എ ഇയ്ക്ക് നികത്താനാവാത്ത നഷ്ടമാണ് സമ്മാനിച്ചിരിക്കുന്നത്. 76-ാം വയസ്സിൽ തിങ്കളാഴ്ച രാവിലെയാണ് അദ്ദേഹം ലോകത്തോട് വിടപറഞ്ഞത്. 

യു എ ഇയുടെ ചരിത്രത്തിലും വികസന യാത്രയിലും നിർണായക പങ്കുവഹിച്ച പ്രമുഖ ഭരണാധികാരിയുടെ വേർപാടിൽ ദുബൈ ഭരണകൂടം 10 ദിവസത്തെ ഔദ്യോഗിക ദുഃഖാചരണം പ്രഖ്യാപിച്ചു. ദുഃഖാചരണത്തിന്റെ ഭാഗമായി എമിറേറ്റിലുടനീളം ദേശീയ പതാകകൾ പകുതി താഴ്ത്തിക്കെട്ടി.

തന്റെ പ്രിയ സഹോദരന്റെ വേർപാടിൽ കടുത്ത ദുഃഖം രേഖപ്പെടുത്തി ദുബൈ ഭരണാധികാരി ഷെയ്ഖ് മുഹമ്മദ് ബിൻ റാശിദ് ആൽ മക്തും എക്സ് പ്ലാറ്റ്‌ഫോമിൽ വികാരനിർഭരമായ അനുശോചന സന്ദേശം പങ്കുവെച്ചു. 'നിങ്ങൾ ഞങ്ങളുടെ കണ്ണുകളിൽ നിന്ന് അകന്നുപോയെങ്കിലും പ്രാർത്ഥനകളിലും ഹൃദയങ്ങളിലും എപ്പോഴും ഉണ്ടാകും' എന്നായിരുന്നു അദ്ദേഹത്തിന്റെ വാക്കുകൾ. 

യു എ ഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് ആൽ നഹ്യാൻ, ദുബൈ കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ആൽ മക്തും ഉൾപ്പെടെയുള്ള  നേതാക്കളും പ്രമുഖരും ഷെയ്ഖ് അഹ്മദിന്റെ രാജ്യത്തോടുള്ള പ്രതിബദ്ധതയെയും അദ്ദേഹത്തിന്റെ ഓർമ്മകളെയും അനുസ്മരിച്ചു.

സ്ഥാപക പാരമ്പര്യം

ദുബൈയുടെ മുൻ ഭരണാധികാരിയും യു എ ഇയുടെ സ്ഥാപക നേതാക്കളിൽ പ്രമുഖനുമായ അന്തരിച്ച ഷെയ്ഖ് റാശിദ് ബിൻ സയീദ് ആൽ മക്തുമിന്റെ നാലാമത്തെയും ഏറ്റവും ഇളയ മകനായിരുന്നു ഷെയ്ഖ് അഹ്‌മദ്‌ ബിൻ റാശിദ് അൽ മക്തും. ദുബൈയെ ഇന്നത്തെ ആധുനിക നഗരമാക്കി മാറ്റുന്നതിൽ വലിയ പങ്ക് വഹിച്ച ആൽ മക്തും കുടുംബത്തിലെ പ്രധാന കണ്ണിയായിരുന്നു അദ്ദേഹം. 

ഭരണരംഗത്തും സൈനികരംഗത്തും കായിക മേഖലയിലും ഒരുപോലെ വ്യക്തിമുദ്ര പതിപ്പിച്ച അദ്ദേഹത്തിന്റെ വേർപാട് എമിറേറ്റിന് വലിയൊരു ശൂന്യതയാണ് സൃഷ്ടിച്ചിരിക്കുന്നത്.

യുകെയിലെ പ്രശസ്തമായ റോയൽ മിലിട്ടറി അക്കാദമി സാൻഡ്‌ഹേർസ്റ്റിൽ നിന്ന് സൈനിക ബിരുദം നേടിയ ശേഷം ഷെയ്ഖ് അഹ്‌മദ് ദുബൈയുടെ സെൻട്രൽ മിലിട്ടറി റീജിയണിൽ ചേരുകയും പിന്നീട് അതിന്റെ കമാൻഡർ ഇൻ ചീഫായി ചുമതലയേൽക്കുകയും ചെയ്തു. അദ്ദേഹത്തിന്റെ കാര്യക്ഷമമായ നേതൃത്വത്തിന് കീഴിലാണ് സെൻട്രൽ മിലിട്ടറി റീജിയൺ യു എ ഇയിലെ തന്നെ ഏറ്റവും മികച്ചതും സജ്ജവുമായ സൈനിക താവളങ്ങളിലൊന്നായി ഉയർന്നുവന്നത്. യു.എ.ഇയുടെ സുരക്ഷാ ക്രമീകരണങ്ങൾ ശക്തിപ്പെടുത്തുന്നതിൽ അദ്ദേഹം വഹിച്ച പങ്ക് വളരെ വലുതാണ്.

കായിക വിപ്ലവം

കായിക രംഗത്ത്, പ്രത്യേകിച്ച് ഫുട്ബോളിലും കുതിരപ്പന്തയത്തിലും ദുബൈയെ ആഗോള ഭൂപടത്തിൽ എത്തിക്കുന്നതിൽ ഷെയ്ഖ് അഹ്‌മദ് വഹിച്ച പങ്ക് ചരിത്രപരമാണ്. ദുബൈയിലെ പ്രശസ്തമായ അൽ വസൽ സ്പോർട്സ് ക്ലബ്ബിന്റെ പ്രസിഡന്റായി ഏകദേശം 60 വർഷത്തോളം അദ്ദേഹം സേവനമനുഷ്ഠിച്ചു. 

1960-ൽ സ്ഥാപിതമായ ഈ ക്ലബ്ബിന്റെ ആദ്യ ഭരണസമിതി രൂപീകരിക്കുന്നതിൽ പ്രധാന പങ്കുവഹിച്ച അദ്ദേഹം, ക്ലബ്ബിനെ രാജ്യത്തെ ഏറ്റവും വലിയ കായിക പ്രസ്ഥാനങ്ങളിലൊന്നാക്കി വളർത്തിയെടുത്തു.

അന്താരാഷ്ട്ര തലത്തിൽ കുതിരപ്പന്തയ രംഗത്ത് യുഎഇയുടെ സാന്നിധ്യം ശക്തമാക്കിയ വ്യക്തി കൂടിയാണ് ഷെയ്ഖ് അഹ്‌മദ്. പ്രശസ്തമായ ജബൽ അലി റേസ് കോഴ്‌സ് സ്ഥാപിച്ചത് അദ്ദേഹമാണ്. ഇതിനുപുറമെ അൽ അദിയാത്ത്, ദുബൈ ഹോഴ്സ് റേസിംഗ് സെന്റർ എന്നിവയ്ക്ക് തുടക്കമിട്ടതും അദ്ദേഹത്തിന്റെ ദീർഘവീക്ഷണത്തിന്റെ ഫലമായാണ്. 

അദ്ദേഹത്തിന്റെ ഉടമസ്ഥതയിലുള്ള 'എംട്ടോട്ടോ' ഉൾപ്പെടെയുള്ള കുതിരകൾ അയർലൻഡിലും യുകെയിലും നടന്ന പ്രശസ്തമായ നിരവധി അന്താരാഷ്ട്ര മത്സരങ്ങളിൽ കിരീടം ചൂടിയിട്ടുണ്ട്.

സമുദ്ര കായിക വിനോദങ്ങളെ പ്രോത്സാഹിപ്പിക്കുന്നതിനായി 1988-ൽ സ്ഥാപിതമായ ദുബൈ ഇന്റർനാഷണൽ മറൈൻ ക്ലബ്ബിന്റെ (DIMC) ആദ്യ ചെയർമാൻ ഷെയ്ഖ് അഹമ്മദായിരുന്നു. മിഡിൽ ഈസ്റ്റിൽ നിന്നും ആഫ്രിക്കയിൽ നിന്നും ഇന്റർനാഷണൽ പവർബോട്ടിംഗ് യൂണിയനിൽ (UIM) അംഗത്വം നേടുന്ന ആദ്യ ക്ലബ്ബായി ഇത് മാറിയത് അദ്ദേഹത്തിന്റെ ശ്രമഫലമായാണ്. 

1989-ൽ വിക്ടറി ടീം രൂപീകരിക്കുന്നതിലും അദ്ദേഹം നിർണായക പങ്കുവഹിച്ചു.

സാമ്പത്തിക വളർച്ച

ഭരണ, കായിക രംഗങ്ങൾക്ക് പുറമെ ദുബൈയുടെ റിയൽ എസ്റ്റേറ്റ്, ഇൻവെസ്റ്റ്‌മെന്റ് മേഖലകളിലും അദ്ദേഹം വലിയ സംഭാവനകൾ നൽകി. 1991-ൽ സ്ഥാപിച്ച ദുബൈ റിയൽ എസ്റ്റേറ്റ് സെന്റർ (DREC), പിന്നീട് അദ്ദേഹം രൂപീകരിച്ച എആർഎം ഹോൾഡിംഗ്  എന്നിവയിലൂടെ ആയിരക്കണക്കിന് പാർപ്പിട, വാണിജ്യ സമുച്ചയങ്ങളും അന്താരാഷ്ട്ര നിക്ഷേപങ്ങളും ദുബൈയിലേക്ക് ആകർഷിക്കാൻ അദ്ദേഹത്തിന് സാധിച്ചു. 

റിയൽ എസ്റ്റേറ്റ്, വിഭ്യാഭ്യാസം, ഹോസ്പിറ്റാലിറ്റി, ടെലികോം മേഖലകളിൽ ദുബൈ കൈവരിച്ച നേട്ടങ്ങൾക്ക് പിന്നിൽ അദ്ദേഹത്തിന്റെ ബിസിനസ് ഗ്രൂപ്പിന്റെ പിന്തുണ വലുതായിരുന്നു.

ജനപ്രിയ നായകൻ

സദാ പുഞ്ചിരിക്കുന്ന മുഖത്തോടെ ജനങ്ങളെ ചേർത്തുപിടിച്ച ഷെയ്ഖ് അഹ്‌മദ്, ഭരണാധികാരി എന്നതിലുപരി ദുബൈയിലെ സാധാരണക്കാരുടെയും കായിക പ്രേമികളുടെയും പ്രിയപ്പെട്ട നേതാവായിരുന്നു. ദുബൈ പൊലീസിന്റെ നവീകരണത്തിലും പൊതുജന സുരക്ഷ ഉറപ്പാക്കുന്നതിലും അദ്ദേഹം കാണിച്ച താല്പര്യം ഭരണനിർവ്വഹണത്തിലെ അദ്ദേഹത്തിന്റെ മികവിന് ഉദാഹരണമാണ്. അദ്ദേഹത്തിന്റെ നിര്യാണം യുഎഇ എന്ന രാജ്യത്തിനും ദുബൈ നഗരത്തിനും നികത്താനാവാത്ത നഷ്ടമാണ്.

പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Sheikh Ahmed bin Rashid Al Maktoum, Deputy Chairman of Dubai Police and Public Security and brother of the Dubai Ruler, passed away at the age of 76 on Monday morning, prompting Dubai to announce a 10-day mourning period.

#Kvartha #DubaiNews #SheikhAhmedBinRashid #UAENews #DubaiPolice #GulfNews #MalayalamNews #AmmuNews