ഷെഫാലി ജരിവാല ഓർമ്മയായി: സിനിമാലോകം ഞെട്ടലിൽ

മുംബൈ: (KVARTHA) പ്രശസ്ത നടിയും മോഡലുമായ ഷെഫാലി ജരിവാല (42) അന്തരിച്ചു. ഹൃദയാഘാതത്തെ തുടർന്നാണ് മരണമെന്നാണ് റിപ്പോർട്ട്. വെള്ളിയാഴ്ച രാത്രി ദേഹാസ്വാസ്ഥ്യമുണ്ടായതിനെത്തുടർന്ന് ഭർത്താവ് പരാഗ് ത്യാഗി ഷെഫാലിയെ മുംബൈയിലെ ബെല്ലെവ്യൂ മൾട്ടി-സ്പെഷ്യാലിറ്റി ആശുപത്രിയിൽ എത്തിച്ചെങ്കിലും ഡോക്ടർമാർ മരണം സ്ഥിരീകരിക്കുകയായിരുന്നു. 

മൃതദേഹം പുലർച്ചെ പന്ത്രണ്ടരയോടെ പോസ്റ്റ്‌മോർട്ടത്തിനായി കൂപ്പർ ഹോസ്പിറ്റലിലേക്ക് മാറ്റി. പോസ്റ്റ്‌മോർട്ടം നടപടികൾ പൂർത്തിയായ ശേഷം മൃതദേഹം ബന്ധുക്കൾക്ക് വിട്ടുനൽകും.

വെള്ളിയാഴ്ച രാത്രി മുംബൈ പോലീസും ഫൊറൻസിക് സംഘവും ഷെഫാലിയുടെ വസതിയിലെത്തി പരിശോധന നടത്തിയിരുന്നു. 2002-ൽ പുറത്തിറങ്ങിയ 'കാന്ത ലാഗ' എന്ന മ്യൂസിക് ആൽബത്തിലൂടെയാണ് ഷെഫാലി പ്രേക്ഷക ശ്രദ്ധ നേടിയത്. ഈ ആൽബത്തിലെ ഗാനം അവരെ 'കാന്ത ലാഗ ഗേൾ' എന്ന പേരിൽ പ്രശസ്തയാക്കി. 

തുടർന്ന് സൽമാൻ ഖാൻ നായകനായ 'മുജ്‌സേ ഷാദി കരോഗി' എന്ന ചിത്രത്തിലും അഭിനയിച്ചു. പിന്നീട് നിരവധി റിയാലിറ്റി ഷോകളിലും ഡാൻസ് ഷോകളിലും ഷെഫാലി സജീവ സാന്നിധ്യമായിരുന്നു.

ഷെഫാലിയും പങ്കാളി പരാഗ് ത്യാഗിയും ഒന്നിച്ച് ഡാൻസ് റിയാലിറ്റി ഷോകളായ 'നാച്ച് ബലിയേ 5', 'നാച്ച് ബലിയേ 7' എന്നിവയിൽ പങ്കെടുത്തിരുന്നു. ബിഗ് ബോസ് ഹിന്ദി പതിപ്പിന്റെ 13-ാം സീസണിലെ മത്സരാർത്ഥിയായും ഷെഫാലി എത്തി. 2019-ൽ വെബ് സീരീസായ 'ബേബി കം നായി'ലിലും അവർ അഭിനയിച്ചിട്ടുണ്ട്. ഷെഫാലിയുടെ അകാല വിയോഗത്തിൽ സിനിമാ ലോകവും ആരാധകരും ഞെട്ടലിലാണ്.

ഈ വാർത്തയെക്കുറിച്ചുള്ള  നിങ്ങളുടെ അഭിപ്രായങ്ങൾ പങ്കുവെക്കുക 

Article Summary: Actress Shefali Jariwala, 42, passed away due to heart attack.

#ShefaliJariwala #RIPShefaliJariwala #KantaLagaGirl #Bollywood #Actress #Demise