Sudden Death | സ്‌കൂൾ പൂട്ടിക്കഴിഞ്ഞ് പുറപ്പെടാനൊരുങ്ങവേ പ്രിൻസിപ്പാൾ തളർന്ന് വീണ് മരിച്ചു; ആരുടേയും ശ്രദ്ധയിൽപ്പെടാതെ കിടന്നത് അര മണിക്കൂർ നേരം
● മൃതദേഹം എടപ്പാള്‍ ഹോസ്പിറ്റല്‍ മോര്‍ച്ചറിയിൽ
● പരിസരവാസികൾ ശ്രദ്ധിച്ചത് മുതൽ ആശുപത്രിയിൽ എത്തിച്ചെങ്കിലും രക്ഷിക്കാനായില്ല
എടപ്പാള്‍: (KVARTHA) കലോത്സവത്തിന് പോകാൻ സ്‌കൂളിൽ നിന്ന് സ്‌കൂട്ടറിൽ കയറിയ എടപ്പാൾ കണ്ടനകം ദാറുൽ ഹിദായ സെക്കണ്ടറി സ്‌കൂളിന്റെ പ്രിൻസിപ്പാളും പൊന്നാനി സ്വദേശിയുമായ എൻ. അബ്ദുൽ ഖയ്യും (55) തളർന്ന് വീണുമരിച്ചു. ബുധനാഴ്ച ഉച്ചതിരിഞ്ഞ് മൂന്ന് മണിയോടെയാണ് ഈ ദൗർഭാഗ്യകരമായ സംഭവം.
സ്‌കൂൾ കഴിഞ്ഞ് പോട്ടൂർ മോഡേൺ ഹയർ സെക്കണ്ടറി സ്‌കൂളിൽ നടക്കുന്ന എടപ്പാൾ ഉപജില്ലാ കലോത്സവത്തിലേക്ക് പോകാനായി സ്‌കൂട്ടറിൽ കയറിയ ഉടൻ തന്നെ അബ്ദുൽ ഖയ്യും തളർന്ന് വീഴുകയായിരുന്നു. അര മണിക്കൂർ സമയം സംഭവം ആരുടേയും ശ്രദ്ധയിൽപ്പെടാതെ കിടന്നു. പരിസരവാസികൾ ശ്രദ്ധയിൽപ്പെട്ടതിനെത്തുടർന്ന് അദ്ദേഹത്തെ ഉടൻ തന്നെ എടപ്പാൾ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.
എടപ്പാള്‍ ഹോസ്പിറ്റല്‍ മോര്‍ച്ചറിയിലുള്ള മൃതദേഹം പൊന്നാനി, ബിയ്യം ഭാഗത്തുള്ള വീട്ടിലേക്ക് കൊണ്ടുപോകും.
ഭാര്യ: മുനീറ.
മക്കള്‍: ഫസ്ഹ, ഫര്‍ഷ, ഫൈഹ.
#Edappal #PrincipalDeath #Kalotsavam #KeralaNews #TragicIncident
