സമസ്ത ഉപാധ്യക്ഷൻ യു എം അബ്ദുറഹ്‌മാൻ മൗലവി അന്തരിച്ചു; ഖബറടക്കം വൈകുന്നേരം മൊഗ്രാലിൽ

കാസർകോട്: (KVARTHA) സമസ്ത കേരള ജംഇയ്യത്തുൽ ഉലമ ഉപാധ്യക്ഷനും ചട്ടഞ്ചൽ മലബാർ ഇസ്ലാമിക് കോംപ്ലക്സ് ജനറൽ സെക്രട്ടറിയുമായ പ്രമുഖ മതപണ്ഡിതൻ മൊഗ്രാൽ കടവത്ത് ദാറുസ്സലാമിൽ യു.എം അബ്ദുറഹ്‌മാൻ മൗലവി അന്തരിച്ചു. 86 വയസ്സായിരുന്നു. 

വാർദ്ധക്യസഹജമായ അസുഖങ്ങളെ തുടർന്ന് ഒരാഴ്ചയായി കാസർകോട്ടെ സ്വകാര്യ ആശുപത്രിയിൽ ചികിത്സയിലായിരുന്നു. ആരോഗ്യനില മെച്ചപ്പെടാത്തതിനെ തുടർന്ന് ശനിയാഴ്ച വസതിയിലേക്ക് മാറ്റിയിരുന്നു. 2026 ജനുവരി 12 തിങ്കളാഴ്ച രാവിലെ 9.15 ഓടെയായിരുന്നു അന്ത്യം.

അബ്ദുൽഖാദിറിന്റെയും ഖദീജയുടെയും മകനായി 1939 നവംബർ രണ്ടിനായിരുന്നു ജനനം. സ്കൂൾ വിദ്യാഭ്യാസത്തിന് ശേഷം മതപഠന രംഗത്ത് സജീവമായ അദ്ദേഹം മൗലവി ഫാളിൽ ബാഖവി ബിരുദം കരസ്ഥമാക്കി. 

മംഗളൂരു പറങ്കിപേട്ട ജുമാമസ്ജിദ്, മംഗളൂരു അസ്ഹരിയ്യ കോളജ്, കരുവൻതിരുത്തി, പടന്ന ജുമാമസ്ജിദ്, കൊണ്ടോട്ടി പഴയങ്ങാടി ജുമാമസ്ജിദ്, വെല്ലൂർ ബാഖിയാത്തുസ്വാലിഹാത്ത് എന്നിവിടങ്ങളിലായിരുന്നു ഉന്നത പഠനം നടത്തിയത്. മൊഗ്രാൽ അബ്ദുറഹ്‌മാൻ മുസ്ലിയാർ, കുറ്റിപ്പുറം അബ്ദുൽഹസൻ, കെ. അബ്ദുല്ല മുസ്ലിയാർ തുടങ്ങി നിരവധി പ്രഗത്ഭ പണ്ഡിതന്മാർ ഇദ്ദേഹത്തിന്റെ ഗുരുനാഥന്മാരാണ്.

സംസ്ഥാനത്തെ മത-വിദ്യാഭ്യാസ രംഗത്ത് നിർണ്ണായക സ്വാധീനം ചെലുത്തിയ വ്യക്തിത്വമായിരുന്നു യു.എം അബ്ദുറഹ്‌മാൻ മൗലവി. 1992 ലാണ് അദ്ദേഹം സമസ്ത കേരള ജംഇയ്യത്തുൽ ഉലമയുടെ കേന്ദ്ര മുശാവറയിൽ അംഗമായത്. തുടർന്ന് സമസ്തയുടെ വിവിധ ഘടകങ്ങളിൽ പ്രധാന ചുമതലകൾ വഹിച്ചു. 

സമസ്ത കേരള ഇസ്ലാം മത വിദ്യാഭ്യാസ ബോർഡ് അംഗം, സമസ്ത കാസർകോട് ജില്ലാ ജനറൽ സെക്രട്ടറി, എസ്.വൈ.എസ് സംസ്ഥാന കൗൺസിൽ അംഗം തുടങ്ങിയ നിലകളിൽ ദീർഘകാലം പ്രവർത്തിച്ചു. നിലവിൽ ബദിയടുക്ക കണ്ണിയത്ത് അക്കാദമി പ്രസിഡന്റ്, ചെമ്മാട് ദാറുൽ ഹുദാ ഇസ്ലാമിക് സർവ്വകലാശാല സെനറ്റ് അംഗം എന്നീ സ്ഥാനങ്ങളും വഹിച്ചു വരികയായിരുന്നു.

കരിയറിലുടനീളം വിവിധ മഹല്ലുകളിൽ ദർസ് (മതപഠന ശാല) നടത്തിയിട്ടുള്ള അദ്ദേഹം വിപുലമായ ഒരു ശിഷ്യസമ്പത്തിന് ഉടമയായിരുന്നു. കുമ്പള ജുമാമസ്ജിദ്, ഇച്ചിലങ്കോട് ജുമാമസ്ജിദ്, മൊഗ്രാൽ ജുമാമസ്ജിദ്, തൃക്കരിപ്പൂർ ബീരിച്ചേരി ജുമാമസ്ജിദ്, പുതിയങ്ങാടി ജുമാമസ്ജിദ്, കളനാട് ഹൈദ്രോസ് ജുമാമസ്ജിദ് എന്നിവിടങ്ങളിൽ മുദരിസായി സേവനമനുഷ്ഠിച്ചിട്ടുണ്ട്. ചട്ടഞ്ചൽ മലബാർ ഇസ്ലാമിക് കോംപ്ലക്സിന്റെ വളർച്ചയിൽ അദ്ദേഹം നൽകിയ സംഭാവനകൾ നിസ്തുലമാണ്.

സകിയ്യയാണ് ഭാര്യ. പരേതയായ മറിയമാണ് മറ്റൊരു ഭാര്യ. മക്കൾ: മുഹമ്മദലി ശിഹാബ്, ഫള്‌ലുറഹ്‌മാൻ, നൂറുൽ അമീൻ, അബ്ദുല്ല ഇർഫാൻ, ഷഹീറലി ശിഹാബ് (എല്ലാവരും ഗൾഫ്), ഖദീജ, മറിയം ഷാഹിന (നാലാം മൈൽ). പരേതരായ മുഹമ്മദ് മുജീബ് റഹ്‌മാൻ, ആയിശത്തുഷാഹിദ എന്നിവർ മറ്റു മക്കളാണ്. 

മരുമക്കൾ: യു.കെ മൊയ്തീൻ കുട്ടി മൗലവി (മൊഗ്രാൽ), സി.എ അബ്ദുൽഖാദർ ഹാജി (സഊദി), ഇ. അഹമ്മദ് ഹാജി (ചേരൂർ), ഖജീദ (ആലംപാടി), മിസ്‌രിയ്യ (കൊടിയമ്മ), സഫീന (തളങ്കര), മിസ്‌രിയ്യ (പേരാൽ കണ്ണൂർ), ജാസിറ (മുട്ടത്തൊടി), ജുമാന (മൊഗ്രാൽ).

ഖബറടക്കം തിങ്കളാഴ്ച വൈകുന്നേരം അഞ്ച് മണിക്ക് മൊഗ്രാൽ കടപ്പുറം വലിയ ജുമാമസ്ജിദ് ഖബർസ്ഥാനിൽ നടക്കും. പണ്ഡിതന്റെ വിയോഗത്തിൽ സമസ്തയുടെ വിവിധ ഘടകങ്ങളും സാമൂഹിക-സാംസ്കാരിക നേതാക്കളും അനുശോചനം രേഖപ്പെടുത്തി.

പ്രമുഖ പണ്ഡിതന്റെ വിയോഗവാർത്ത ഷെയർ ചെയ്യൂ.

Article Summary: Senior scholar and Samastha Vice President UM Abdul Rahman Musliyar passed away in Kasaragod at 86.

#Samastha #UMAbdulRahmanMusliyar #Obituary #KasaragodNews #Mogral #IslamicScholar