നാടകരംഗത്തെ നിറസാന്നിധ്യത്തിന് വിട; മൂന്ന് സംസ്ഥാന പുരസ്കാരങ്ങൾ സ്വന്തമാക്കിയ രാധൻ കണ്ണപുരം അന്തരിച്ചു

കണ്ണൂർ: (KVARTHA) പ്രശസ്ത നാടകപ്രവർത്തകൻ രാധൻ കണ്ണപുരം അന്തരിച്ചു. കെ രാധാകൃഷ്ണൻ എന്നാണ് അദ്ദേഹത്തിന്റെ യഥാർഥ പേര്. രാധൻ കണ്ണപുരത്തിന് 58 വയസ്സായിരുന്നു. അസുഖ ബാധിതനായി ചാലയിലെ സ്വകാര്യ ആശുപത്രിയിൽ ചികിത്സയിലിരിക്കെയാണ് അന്ത്യം സംഭവിച്ചത്. കണ്ണൂർ ജില്ലയിലെ കണ്ണപുരം കുന്നുമ്മൽ വീട്ടിൽ ചന്ദ്രമതിയുടെയും പരേതനായ ചുള്ളേരി വീട്ടിൽ കൃഷ്ണന്റെയും മകനാണ്.

നാടകരംഗത്ത് 40 വർഷത്തോളമായി അദ്ദേഹം സജീവമാണ്. മൂന്ന് സംസ്ഥാന പുരസ്കാരങ്ങൾ ഉൾപ്പെടെ നാടകാഭിനയത്തിനും സംവിധാനത്തിനും ഒട്ടേറെ ബഹുമതികളും അംഗീകാരങ്ങളും രാധൻ കണ്ണപുരത്തിന് ലഭിച്ചിട്ടുണ്ട്. പെരുന്തച്ചൻ, തീപ്പൊട്ടൻ, നവരസനായകൻ, കോടീശ്വരൻ, കിനാവിലൊരു കളിവീട്, ഉള്ളത് പറഞ്ഞാൽ തുടങ്ങിയവ അദ്ദേഹം പ്രധാന വേഷത്തിൽ എത്തിയ വിഖ്യാത നാടകങ്ങളിൽ ചിലതാണ്. കോഴിക്കോട് ചിരന്തന, വള്ളുവനാട് നാദം, കൊല്ലം കാളിദാസ കലാകേന്ദ്രം, തിരുവനന്തപുരം സോപാനം, കോഴിക്കോട് സങ്കീർത്തന തുടങ്ങി കേരളത്തിൽ അങ്ങോളമിങ്ങോളമുള്ള പല പ്രമുഖ സമിതികളിലും അദ്ദേഹം പ്രവർത്തിച്ചിട്ടുണ്ട്.

നാടകപ്രവർത്തനത്തിന് ഒപ്പം രാഷ്ട്രീയത്തിലും സജീവമായിരുന്ന അദ്ദേഹം യൂത്ത് കോൺഗ്രസിന്റെ മണ്ഡലം പ്രസിഡന്റ് പദവി വഹിച്ചിട്ടുണ്ട്. നാടകാഭിനയത്തിനും സംവിധാനത്തിനും പുറമേ ആകാശവാണിയിൽ ആർട്ടിസ്റ്റായും ഏതാനും സിനിമകളിൽ ഡബ്ബിങ് ആർട്ടിസ്റ്റായും പ്രവർത്തിച്ചു. സംസ്ഥാന പുരസ്കാര ജേതാവും നാടക, സിനിമാ രംഗങ്ങളിൽ സജീവ സാന്നിധ്യവുമായ മിനി രാധൻ ആണ് ഭാര്യ. ആർട്ടിസ്റ്റായ ആതിരയും യുകെയിൽ നഴ്സായ ആരതിയുമാണ് മക്കൾ. ബാലരമ ഡെസ്ക് എഡിറ്റർ വിവേക് ആണ് മരുമകൻ. ഗിരിജ, ജിഷ, രജനി തുടങ്ങിയവർ സഹോദരങ്ങളാണ്. ഭൗതികശരീരം ചെറുകുന്ന് മിഷൻ ആശുപത്രി മോർച്ചറിയിലേക്ക് മാറ്റിയിരിക്കുകയാണ്. സംസ്കാരം പിന്നീട് നടക്കും.

നാട്ടിലെ വാർത്തകളും വിവരങ്ങളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്.

Article Summary: Famous theater artist and director Radhan Kannapuram (K. Radhakrishnan), aged 58, passed away while undergoing treatment at a private hospital in Chala. With a career spanning nearly 40 years, he won three state awards and contributed significantly to Malayalam drama and various prominent theater groups.

#RadhanKannapuram #TheaterArtist #MalayalamDrama #Obituary #KannurNews #KeralaNews #AnjanaNews