പയ്യന്നൂരിൽ കൗൺസിലിങ്ങിനിടെ ഇറങ്ങിപ്പോയ പ്രതിശ്രുത വധു പുഴയിൽ മരിച്ച നിലയിൽ

പയ്യന്നൂർ: (KVARTHA) കാണാതായ പ്രതിശ്രുത വധുവിനെ പുഴയിൽ മരിച്ച നിലയിൽ കണ്ടെത്തി. പയ്യന്നൂർ കോറോം കാനായി മുക്കൂട് സ്വദേശിനി സി. ശ്രുതിയുടെ (24) മൃതദേഹമാണ് ചൊവ്വാഴ്ച (ഒക്ടോബർ 13) പുഴയിൽ നിന്ന് കണ്ടെടുത്തത്.

വിവാഹത്തിന് മുന്നോടിയായി കൗൺസിലിങ്ങിനെത്തിയ യുവതി പെട്ടെന്ന് പ്രകോപിതയായി ഇറങ്ങിപ്പോവുകയും പിന്നീട് പുഴയിൽ മരിച്ച നിലയിൽ കണ്ടെത്തുകയുമായിരുന്നുവെന്നത് നാട്ടുകാരിലും ബന്ധുക്കളിലും വലിയ ഞെട്ടലാണ് ഉണ്ടാക്കിയിരിക്കുന്നത്.

അപ്രതീക്ഷിതമായി ഇറങ്ങിപ്പോയി

ഒക്ടോബർ 12 വൈകുന്നേരം നാലുമണിയോടെയാണ് സംഭവങ്ങളുടെ തുടക്കം. കോറോം കൂർക്കരയിൽ പ്രവർത്തിക്കുന്ന കൗൺസിലിങ് കേന്ദ്രത്തിൽ അമ്മായി സുലേഖ, വിവാഹം നിശ്ചയിച്ച അഖിൽ, അഖിലിന്റെ അമ്മാവൻ സുരേഷ് എന്നിവർക്കൊപ്പമാണ് ശ്രുതി എത്തിയത്.

കൗൺസിലറുമായി സംസാരിച്ചുകൊണ്ടിരിക്കെ യുവതി പെട്ടെന്ന് പ്രകോപിതയാവുകയും ആരോടും പറയാതെ പുറത്തിറങ്ങി തന്റെ സ്‌കൂട്ടർ ഓടിച്ചു പോവുകയുമായിരുന്നു. രാത്രിയായിട്ടും യുവതി വീട്ടിൽ തിരിച്ചെത്തിയില്ല. തുടർന്ന് അമ്മാവൻ എം. ശ്രീധരൻ പൊലീസിൽ പരാതി നൽകി.

പുഴയോരത്ത് സ്കൂട്ടറും ചെരിപ്പും

പരാതിയുടെ അടിസ്ഥാനത്തിൽ കേസെടുത്ത പൊലീസ് അന്വേഷണം ഊർജിതമാക്കി. ഇതിനിടെ തിങ്കളാഴ്ച രാത്രിയോടെ പെരുമ്പ ചിറ്റാരി കൊവ്വൽ റോട്ടറി ക്ലബ്ബ് റോഡിൽ തണൽ ഇക്കോ പാർക്കിനു സമീപം യുവതിയുടെ സ്‌കൂട്ടർ ഉപേക്ഷിച്ച നിലയിൽ കണ്ടെത്തി.

ഇവിടെ നിന്ന് യുവതിയുടെ ചെരിപ്പും ലഭിച്ചു.

ഇതോടെ ശ്രുതി പുഴയിൽ വീണതാകാമെന്ന നിഗമനത്തിൽ പയ്യന്നൂർ ഫയർ സ്റ്റേഷൻ ഓഫീസർ സി.പി. രാജേഷിന്റെ നേതൃത്വത്തിൽ തിങ്കളാഴ്ച രാത്രി തിരച്ചിൽ നടത്തിയിരുന്നു. 

ചൊവ്വാഴ്ച രാവിലെയോടെ സ്കൂബ ടീമിന്റെ സഹായത്തോടെ വീണ്ടും തിരച്ചിൽ പുനരാരംഭിച്ചു. തുടർന്ന് രാവിലെ 11.15 ഓടെ തണൽ ഇക്കോ പാർക്കിന് സമീപം പുഴയിൽ നിന്ന് തന്നെ മൃതദേഹം കണ്ടെത്തുകയായിരുന്നു. മാതാപിതാക്കൾ: പരേതനായ ചന്ദ്രൻ, ജാനകി. സഹോദരി: ശ്രീലക്ഷ്മി.

അന്വേഷണം ഊർജിതം

പയ്യന്നൂർ പൊലീസ് ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം പോസ്റ്റ്മോർട്ടത്തിനായി പരിയാരത്തെ കണ്ണൂർ ഗവ. മെഡിക്കൽ കോളേജ് മോർച്ചറിയിലേക്ക് മാറ്റി.

ശ്രദ്ധിക്കുക: സ്വയം ജീവനെടുക്കുന്നത് ഒരു പരിഹാരമല്ല. മാനസിക സമ്മർദ്ദമോ നിരാശയോ അനുഭവപ്പെടുന്നവർ സഹായം തേടണം. ദിശ ഹെൽപ്പ്‌ലൈൻ: 1056 / 0471-2552056 ടെലിമാനസ്: 14416

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്. 

Article Summary: Missing bride-to-be Shruthi was found dead in a Payyanur river today.

#PayyanurNews #KannurNews #KeralaNews #LocalNewsKerala #CrimeNewsKerala #PayyanurPolice #AnjanaNews