വിപ്ലവ വേദികളിൽ ആവേശം പകർന്ന, കമ്യൂണിസ്റ്റ് പാട്ടുകളുടെ ഗായിക പൗളി ടീച്ചർ 93-ാം വയസ്സിൽ അന്തരിച്ചു

കണ്ണൂർ: (KVARTHA) വടക്കൻ മലബാറിലെ വിപ്ലവ ഗാനങ്ങളിലൂടെ കമ്യൂണിസ്റ്റ് വേദികളിൽ ആവേശം നിറച്ച ഗായിക പൗളി ടീച്ചർ (93) അന്തരിച്ചു. തലശ്ശേരി കാവുംഭാഗം തയ്യിൽ സ്കൂളിന് സമീപമുള്ള സ്വവസതിയിലായിരുന്നു അന്ത്യം. 1932 നവംബർ അഞ്ചിനാണ് ജനനം. ഗായകനും മൃദംഗം, തബല നിർമാണ വിദഗ്ധനുമായ എം.എൽ. തമ്പിയാണ് പിതാവ്.

മാഹി പള്ളൂർ ഗവൺമെന്റ് ഗേൾസ് ഹൈസ്കൂളിൽ സംഗീത അധ്യാപികയായി സേവനമനുഷ്ഠിച്ച് വിരമിച്ച പൗളി ടീച്ചർ, പേരാവൂർ തുണ്ടിയിൽ സെന്റ് ആന്റണീസ് സ്കൂളിലാണ് അധ്യാപന ജീവിതം ആരംഭിച്ചത്. പ്രശസ്തമായ തലശ്ശേരി എം.എൽ. ബ്രദേഴ്സ് മ്യൂസിക്കിലെ പ്രധാന ഗായികയായിരുന്നു. ആകാശവാണിയിലും സംഗീത പരിപാടികൾ അവതരിപ്പിച്ചിട്ടുണ്ട്.

നൂറുകണക്കിന് വേദികളിലാണ് അവർ പാടിയത്. എരഞ്ഞോളി ഗ്രാമീണ കലാസമിതിയുടെ നാടകങ്ങളിലും അഭിനയിച്ചിരുന്നു. സംഗീതത്തിൽ ബിരുദാനന്തര ബിരുദം നേടിയിട്ടുണ്ട്. 2022-ൽ തൃശൂർ സമതയുടെ രണഗീതി പുരസ്കാരം ലഭിച്ചു.

ഭർത്താവ്: പരേതനായ എം. ഗോവിന്ദൻ. മക്കൾ: സംഗീത്, റാഹി, ബീന, റാണി. മരുമകൻ: എൻ. രാജേന്ദ്രൻ.

സംസ്കാരം ഞായറാഴ്ച കുണ്ടുചിറ വാതക ശ്മശാനത്തിൽ നടന്നു.

പൗളി ടീച്ചറെപ്പോലുള്ള കലാകാരന്മാരുടെ സംഭാവനകളെക്കുറിച്ച് നിങ്ങളുടെ കാഴ്ചപ്പാട് എന്താണ്? ഈ വാർത്ത സുഹൃത്തുക്കളുമായി പങ്കിടൂ.

Article Summary: Pauly Teacher, communist songs singer, passes away at 93.

#PaulyTeacher #KannurNews #CommunistSongs #Obituary #Kerala #Kannur