ആൺസുഹൃത്തിൻ്റെ മർദനമേറ്റെന്ന പരാതി; അസ്വാഭാവിക സാഹചര്യത്തിൽ കണ്ടെത്തിയ യുവതി ചികിത്സയിലിരിക്കെ മരിച്ചു

തലശേരി: (KVARTHA) ആൺസുഹൃത്തിൻ്റെ മർദനമേറ്റതിലുള്ള മനോവിഷമം കാരണം യുവതി ജീവനൊടുക്കിയതാണെന്ന ബന്ധുക്കളുടെ പരാതിയിൽ പോലീസ് കേസെടുത്തു. പാനൂർ വളളങ്ങാട് സ്വദേശി ആദിത്യ അനിൽകുമാറാണ് അസ്വാഭാവിക സാഹചര്യത്തിൽ ചികിത്സയിലിരിക്കെ മരിച്ചത്. ആദിത്യയുടെ അമ്മയുടെ മൊഴിയുടെ അടിസ്ഥാനത്തിൽ പാനൂർ പോലീസ് കേസ് രജിസ്റ്റർ ചെയ്ത് വിശദമായ അന്വേഷണം ആരംഭിച്ചിട്ടുണ്ട്.

ജൂൺ 14 ഞായറാഴ്ചയാണ് ആദിത്യയെ അസ്വാഭാവിക സാഹചര്യത്തിൽ വീട്ടിൽ കണ്ടെത്തിയത്. അവശനിലയിലായിരുന്ന യുവതിയെ ആദ്യം തലശേരി ഇന്ദിരാഗാന്ധി സഹകരണ ആശുപത്രിയിലാണ് പ്രവേശിപ്പിച്ചത്. പിന്നീട് ആരോഗ്യസ്ഥിതി വഷളായതോടെ കണ്ണൂർ മിംസ് ആശുപത്രിയിലേക്ക് മാറ്റുകയായിരുന്നു. ഇവിടെ തീവ്രപരിചരണ വിഭാഗത്തിൽ ചികിത്സയിൽ കഴിയവെ ജൂൺ 18 വ്യാഴാഴ്ചയാണ് മരണം സംഭവിച്ചത്. ആദിത്യയുടെ ശരീരത്തിൽ മർദനമേറ്റതിൻ്റെ പാടുകൾ ഉണ്ടായിരുന്നുവെന്ന് ബന്ധുക്കൾ പോലീസിനോട് ആരോപിച്ചു.

ജൂൺ എട്ടിന് തലശേരി പുതിയ ബസ് സ്റ്റാൻഡ് പരിസരത്തുവെച്ച് മനേക്കര സ്വദേശിയായ ആൺസുഹൃത്ത് ആദിത്യയെ മർദിച്ചിരുന്നുവെന്നാണ് കുടുംബം പരാതിയിൽ പറയുന്നത്. ഇക്കാര്യം ആദിത്യ വീട്ടിലെത്തി അമ്മയോടും ബന്ധുക്കളോടും പറഞ്ഞിരുന്നു. ആൺസുഹൃത്ത് മർദിച്ചത് വലിയ മാനസിക ബുദ്ധിമുട്ടുണ്ടാക്കിയെന്നും അതാണ് കടുത്ത തീരുമാനത്തിലേക്ക് നയിച്ചതെന്നും ആദിത്യ ചികിത്സയിലിരിക്കെ തന്നോട് പറഞ്ഞിരുന്നതായി അമ്മ പോലീസിന് നൽകിയ മൊഴിയിൽ വ്യക്തമാക്കുന്നു.

സംഭവത്തിൽ അസ്വാഭാവിക മരണമെന്ന നിലയിലാണ് പാനൂർ പോലീസ് നിലവിൽ കേസെടുത്തിരിക്കുന്നത്. കണ്ണൂർ മിംസ് ആശുപത്രിയിൽ സൂക്ഷിച്ചിരിക്കുന്ന മൃതദേഹം ജൂൺ 19 വെള്ളിയാഴ്ച പരിയാരം ഗവ. മെഡിക്കൽ കോളജിലേക്ക് മാറ്റും. ഇവിടെയായിരിക്കും പോസ്റ്റ്‌മോർട്ടം നടപടികൾ നടക്കുക. പോസ്റ്റ്‌മോർട്ടം റിപ്പോർട്ട് ലഭിച്ചതിന് ശേഷം മാത്രമേ മരണകാരണത്തിലും മർദനമേറ്റതിലും കൂടുതൽ വ്യക്തത വരികയുള്ളൂവെന്നും, ഇതിന് ശേഷം തുടർനടപടികൾ സ്വീകരിക്കുമെന്നും പാനൂർ പോലീസ് അറിയിച്ചു.

ശ്രദ്ധിക്കുക: സ്വയം ജീവനെടുക്കുന്നത് ഒരു പരിഹാരമല്ല. മാനസിക സമ്മർദ്ദമോ നിരാശയോ അനുഭവപ്പെടുന്നവർ സഹായം തേടണം. ദിശ ഹെൽപ്പ്‌ലൈൻ: 1056 / 0471-2552056 ടെലിമാനസ്: 14416

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: A young woman from Panoor died under unnatural circumstances at a hospital following allegations by her family that she took the extreme step due to physical assault by a male friend.

#ThalasseryNews #PanoorPolice #KannurCrimeNews #KeralaNews #LocalNewsMalayalam #CrimeNews #AnjanaNews