കണ്ണൂർ: (KVARTHA) അവകാശങ്ങൾക്കായി നിരന്തരം പോരാടിയ ഓട്ടോറിക്ഷ ഡ്രൈവർ ചിത്രലേഖ (48) നിര്യാതയായി. പുലർച്ചെ മൂന്നു മണിയോടെ കണ്ണൂർ കമ്പിലെ ആശുപത്രിയിൽ വച്ച് ചികിത്സയിലിരിക്കെയായിരുന്നു അന്ത്യം. പാൻക്രിയാസ് കാൻസർ ബാധിച്ചതിനെ തുടർന്ന് ചികിത്സയിലായിരുന്ന ചിത്രലേഖയ്ക്ക് ശ്വാസതടസ്സം രൂക്ഷമായതിനെ തുടർന്നാണ് മരണം സംഭവിച്ചത്.

ചിത്രലേഖയുടെ ഭൗതിക ശരീരം ഞായറാഴ്ച രാവിലെ 9 മണിക്ക് ആശുപത്രിയിൽ നിന്ന് വീട്ടിലേക്ക് കൊണ്ടുവരും. തുടർന്ന് 10 മണിക്ക് പയ്യാമ്പലം കടപ്പുറത്ത് എത്തിക്കും. അവിടെ വച്ച് സംസ്കാര ചടങ്ങുകൾ നടക്കും. ഭർത്താവ്: ശ്രീശ്കാന്ത്, മക്കൾ: മനു, ലേഖ.

പയ്യന്നൂർ സ്വദേശിയായ ചിത്രലേഖ സി.പി.എമ്മുമായുള്ള തർക്കം മൂലം വാർത്തകളിൽ നിറഞ്ഞിരുന്നു. ഏതാനും വ​ർ​ഷ​ങ്ങ​ളാ​യി ക​ണ്ണൂ​ർ കാ​ട്ടാ​മ്പ​ള്ളി​യി​ലാ​ണ് താ​മ​സം. കാട്ടാമ്പള്ളിയിലെ വീടിന് മുന്നിൽ പാർക്ക് ചെയ്തിരുന്ന ഓട്ടോറിക്ഷ ക​ഴി​ഞ്ഞ​ വ​ർ​ഷം ആ​ഗ​സ്റ്റ് 25ന് തീയിട്ടതിന് പിന്നിൽ സി.പി.എമ്മുകാരാണെന്ന്  ആരോപിച്ചിരുന്നു. കേ​സും പ്ര​തി​ഷേ​ധ​വും തുടർന്ന് ​വ​രു​ന്ന​തി​നി​ടെ സ​ന്ന​ദ്ധ സം​ഘ​ട​ന​യു​ടെ സ​ഹാ​യം വ​ഴി ഓ​ട്ടോ​റി​ക്ഷ ല​ഭി​ച്ചു. ആ​ഴ്ച​ക​ൾ​ക്ക​ക​മാ​ണ് രോ​ഗം ബാ​ധി​ച്ച് തു​ട​ങ്ങി​യ​ത്.

2002ൽ തീയ സമുദായത്തിൽപ്പെട്ട ശ്രീശ്കാന്തിനെ വിവാഹം ചെയ്തതിനെ തുടർന്ന് ചിത്രലേഖ ജാതി വിവേചനത്തിന് ഇരയായിരുന്നു. നഴ്സായിരുന്ന ചിത്രലേഖ ജോലി ഉപേക്ഷിച്ച് ഭർത്താവിനൊപ്പം ഓട്ടോ ഡ്രൈവറായി. എന്നാൽ, പയ്യന്നൂർ എടാട്ടിലെ ഓട്ടോ സ്റ്റാൻഡിൽ വച്ച് ജാതിയുടെ പേരിൽ അധിക്ഷേപിക്കപ്പെട്ടതായും ആരോപണം ഉയർന്നു.

2005 ഡിസംബറിൽ ഓട്ടോറിക്ഷ കത്തിയ നിലയിൽ കണ്ടെത്തിയ സംഭവത്തിൽ  സി.പി.എമ്മിനെതിരെ പരസ്യമായി രംഗത്തെത്തി. 2013ൽ കാട്ടാമ്പള്ളിയിലേക്ക് മാറി താമസിച്ചെങ്കിലും അവിടെയും അതിക്രമം നേരിട്ടതായി പരാതിപ്പെട്ടിരുന്നു. മാസങ്ങൾക്ക് മുമ്പ് അംആദ്മി പാർട്ടിയുടെ സഹായത്തോടെ പുതിയ ഓട്ടോറിക്ഷ വാങ്ങിയെങ്കിലും പെർമിറ്റ് ലഭിക്കാത്തതിനാൽ ഓടിക്കാൻ കഴിഞ്ഞിരുന്നില്ല. ഇതിനിടെയാണ് രോഗം ബാധിച്ചത്.

 #Chithralekha #AutoDriver #PancreaticCancer #Kannur #CommunitySupport #Obituary