റിയാദ്: (KVARTHA) റഫായ ജംഷിയിൽ ജോലി ചെയ്തുകൊണ്ടിരിക്കെ പ്രവാസി മലയാളി കുഴഞ്ഞുവീണ് മരിച്ചു. കൊല്ലം, പാരിപ്പള്ളി കല്ലുവാതുക്കൽ പാമ്പുറത്തെ പരേതരായ നടരാജൻ - സതീദേവി ദമ്പതികളുടെ മകൻ തേജസ്സിൽ അനിൽ നടരാജൻ (57) ആണ് മരിച്ചത്. റിയാദിൽ ഇലക്ട്രിക്കൽ പ്ലംബിംഗ് ജോലികൾ ചെയ്ത് വരികയായിരുന്ന  അനിലിന് കഴിഞ്ഞ പത്ത് ദിവസമായി സ്പോൺസറുടെ റഫായയിലുള്ള വീട്ടിലായിരുന്നു ജോലി. 

ജോലിക്കിടയിൽ കുഴഞ്ഞുവീണ അദ്ദേഹത്തെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. ഹൃദയാഘാതം സംഭവിച്ചതാണെന്നാണ് നിഗമനം. റഫായ ജനറൽ ആശുപത്രിയിൽ സൂക്ഷിച്ചിരിക്കുന്ന മൃതദേഹം നാട്ടിലേക്ക് കൊണ്ടുപോകുന്നതിനുള്ള ശ്രമങ്ങൾ പുരോഗമിക്കുന്നതായി  ഇക്കാര്യത്തിൽ രംഗത്തുള്ള റഫായ ജംഷിയിലെ സാമൂഹ്യ പ്രവർത്തകൻ സലിം കൂട്ടായി അറിയിച്ചു.   

കേളി ദവാദമി യൂണിറ്റ് പ്രവർത്തകരും കേന്ദ്ര ജീവകാരുണ്യ കമ്മിറ്റിയുടെ നേതൃത്വത്തിൽ മുസാമിയ ഏരിയ പ്രവർത്തകരും സഹായിക്കുന്നുണ്ട്. അനിതയാണ് അനിലിന്റെ ഭാര്യ. ഏകമകൾ അശ്വതി.

 #SaudiArabia #Malayali #Death #HeartAttack #Migrants #Kerala