കയ്പ്പമംഗലം ദുരന്തത്തിൻ്റെ ഞെട്ടൽ മാറുംമുൻപേ തൃശൂരിൽ വീണ്ടും വാഹനാപകടം; ബൈക്കിൽ കാറിടിച്ച് കുഞ്ഞടക്കം 3 പേർ മരിച്ചു

കുന്നംകുളം: (KVARTHA) കയ്പ്പമംഗലത്ത് എട്ട് എൻജിനീയറിങ് വിദ്യാർഥികളുടെ ജീവനെടുത്ത ദുരന്തത്തിൻ്റെ ആഘാതം മാറും മുൻപേ തൃശൂരിൽ വീണ്ടും വാഹനാപകടം. കുന്നംകുളത്ത് നിർത്തിയിട്ടിരുന്ന ബൈക്കിലേക്ക് നിയന്ത്രണം വിട്ട കാർ ഇടിച്ചുകയറി ദമ്പതികളും  മൂന്ന് വയസ്സുകാരനായ കുട്ടിയും മരിച്ചു. 

ചാവക്കാട് എടക്കഴിയൂർ പഞ്ചവടി ഖാദരിയ്യ പള്ളിക്കുസമീപം താഴത്തുവീട്ടിൽ മുനീർ (33), ഭാര്യ ഷിഫ (26), മൂന്ന് വയസ്സുകാരനായ കുട്ടി എമിൽ ഐബക്ക് എന്നിവരാണ് മരിച്ചത്. ഗുരുവായൂർ-കുന്നംകുളം പാതയിൽ കുറുക്കൻപാറ സെൻ്ററിൽ ശനിയാഴ്ച (സെപ്റ്റംബർ 5) രാത്രി 11.45-ഓടെയായിരുന്നു അപകടം സംഭവിച്ചത്.

അപകട കാരണം മദ്യലഹരിയും അമിതവേഗതയും

കാറിൻ്റെ അമിതവേഗതയും ഡ്രൈവറുടെ മദ്യലഹരിയുമാണ് അപകടത്തിന് കാരണമായതെന്നാണ് വിവരം. അർത്താറ്റ് സ്വദേശി ബെന്നിയാണ് മദ്യലഹരിയിൽ കാറോടിച്ചിരുന്നത്. കുന്നംകുളത്തു നിന്ന് ചാവക്കാട് ഭാഗത്തേക്ക് പോവുകയായിരുന്ന മുനീറും കുടുംബവും വിവാഹച്ചടങ്ങിൽ പങ്കെടുത്ത ശേഷം വീട്ടിലേക്ക് മടങ്ങുകയായിരുന്നു. ഇതിനിടെ ഫോൺ വന്നതിനെ തുടർന്ന് ബൈക്ക് റോഡിൻ്റെ വശത്ത് നിർത്തി സംസാരിക്കുന്നതിനിടെയാണ് അതേ ദിശയിൽ അമിതവേഗതയിലെത്തിയ കാർ നിയന്ത്രണം വിട്ട് ഇവരെ ഇടിച്ചുതെറിപ്പിച്ചത്. 

ഇടിയുടെ ആഘാതത്തിൽ ബൈക്കിലുണ്ടായിരുന്നവർ 50 മീറ്ററോളം ദൂരേക്ക് തെറിച്ചുവീണു. മുനീർ റോഡിന് സമീപമുള്ള പറമ്പിലേക്കാണ് തെറിച്ചു വീണത്. അപകടത്തിൽപ്പെട്ടവരെ ഉടൻ തന്നെ സമീപത്തെ സ്വകാര്യ ആശുപത്രികളിൽ എത്തിച്ചെങ്കിലും ജീവൻ രക്ഷിക്കാനായില്ല. അപകടത്തിൽ ബൈക്ക് പൂർണമായും തകർന്നു.

പ്രതി ഒളിവിൽ; 3 പേർ കസ്റ്റഡിയിൽ

അപകടം നടന്നതിന് പിന്നാലെ സംഭവസ്ഥലത്തുനിന്നും ഓടിരക്ഷപ്പെട്ട ഡ്രൈവർ ബെന്നിക്കായി പൊലീസ് അന്വേഷണം ഊർജിതമാക്കി. ഇയാൾക്കൊപ്പമുണ്ടായിരുന്ന മറ്റ് മൂന്ന് സുഹൃത്തുക്കളെ പൊലീസ് കസ്റ്റഡിയിലെടുത്തു. നാല് പേരും മദ്യപിച്ചിരുന്നുവെന്നാണ് പൊലീസ് നൽകുന്ന വിവരം. കുന്നംകുളത്തെ സ്വകാര്യ ബാറിൽ നിന്ന് മദ്യപിച്ച ശേഷം സംഘം കാർ ഓടിച്ചുവരുമ്പോഴാണ് അപകടമുണ്ടായത്. 

ബൈക്കും കാറും സമീപത്തെ കെഎസ്ഇബി ട്രാൻസ്ഫോർമറിലേക്കും പോസ്റ്റിലേക്കും ഇടിച്ചുകയറിയതോടെ പോസ്റ്റ് ഒടിഞ്ഞുനുറുങ്ങി. വൈദ്യുതി ലൈൻ പൊട്ടിവീഴുകയും ചെയ്തത് ആദ്യഘട്ടത്തിൽ രക്ഷാപ്രവർത്തനത്തെ ബാധിച്ചു. 

വൈദ്യുത പോസ്റ്റുകൾ തകർന്നതിനാൽ മേഖലയിൽ ഏറെ നേരം ഗതാഗതം തടസ്സപ്പെട്ടു. കുന്നംകുളം പൊലീസും അഗ്നിരക്ഷാസേനയും കെഎസ്ഇബി ജീവനക്കാരും സ്ഥലത്തെത്തി മേൽനടപടികൾ സ്വീകരിച്ച് ഗതാഗതം പുനഃസ്ഥാപിച്ചു.

പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Following the Kaippamangalam tragedy, another fatal road accident occurred in Kunnamkulam, Thrissur, on September 5, 2026. A speeding car, allegedly driven by a drunk man, rammed into a parked bike, killing a family of three, including a 3-year-old child. The accused driver is absconding, while three of his friends are in police custody.

#Kvartha #KunnamkulamAccident #ThrissurNews #KeralaRoadSafety #DrunkDriving #MalayalamNews #LocalNews #KSEB #KeralaPolice #AmmuNews