മരുന്ന് വ്യവസായത്തിൽ സ്വന്തം മുദ്ര പതിപ്പിച്ച സാമൂതിരി രാജ പി കെ കേരളവർമയ്ക്ക് വിട

കോഴിക്കോട്: (KVARTHA) കോഴിക്കോട് സാമൂതിരി രാജ പി.കെ. കേരളവർമ (90) അന്തരിച്ചു. പ്രമുഖ ഫാർമക്കോളജി വിദഗ്ദ്ധനും നാർണ്യാട്ട് ഫാർമസ്യൂട്ടിക്കൽസ് സ്ഥാപകനുമായ അദ്ദേഹം ഫാർമസി എക്സ്പോർട്ട് രംഗത്തെ മികവിന് കേന്ദ്ര-സംസ്ഥാന സർക്കാരുകളുടെ നിരവധി അവാർഡുകൾ നേടിയിട്ടുണ്ട്. തിരുവണ്ണൂർ പുതിയകോവിലകത്ത് തെക്കെകെട്ട് താവഴി അംഗമാണ്.

സ്വാതന്ത്ര്യസമര പാരമ്പര്യവും വിദ്യാഭ്യാസവും

ഗാന്ധിജിയുടെ കോഴിക്കോട് സന്ദർശനവേളയിൽ കൈയിലെ സ്വർണവള ഊരിനൽകി സ്വാതന്ത്ര്യസമരത്തിന്റെ ഭാഗമായ മുൻ അമ്പാടി കോവിലകം ശ്രീദേവിവർമയുടെയും തിരുവല്ല നെടുമ്പ്രത്ത് കൊട്ടാരത്തിലെ ബാലരാമവർമയുടെയും മകനായി 1936 സെപ്റ്റംബർ മൂന്നിനാണ് അദ്ദേഹത്തിന്റെ ജനനം.

സാമൂതിരി കോളജിൽ നിന്ന് ഇന്റർമീഡിയറ്റും അഹ്‌മദാബാദിലെ എൽ.എം. ഫാർമസി കോളജിൽ നിന്ന് ഫാർമസി ബിരുദവും നേടി. മുംബൈയിൽ ജർമൻ റെമഡീസിന്റെ ഫാക്ടറിയിൽ ജോലി ചെയ്ത ശേഷം കോഴിക്കോട് മെഡിക്കൽ കോളജിലെ ഫാർമസി വിഭാഗത്തിൽ നോൺ മെഡിക്കൽ ട്യൂട്ടറായി പ്രവർത്തിച്ചു.

ഫാർമസി മേഖലയിലെ സംഭാവനകൾ

വെസ്റ്റ്ഹിൽ വ്യവസായ എസ്റ്റേറ്റിൽ ആരംഭിച്ച 'നാർണ്യാട്ട് ഫാർമസ്യൂട്ടിക്കൽസ്' പിന്നീട് ബേപ്പൂർ നടുവട്ടത്തേക്ക് മാറ്റിസ്ഥാപിച്ചു. ആന്റിബയോട്ടിക്കുകൾ ഉൾപ്പെടെ ഒട്ടേറെ മരുന്നുകളുടെ ഉത്പാദനത്തിലൂടെയും കയറ്റുമതിയിലൂടെയും ഈ സ്ഥാപനം ശ്രദ്ധേയമായി.

ലക്ഷദ്വീപിൽ മന്തുരോഗവ്യാപനം തടയാൻ ഫൈലേറിയാസിസ് റിസർച്ച് സെന്ററുമായി ചേർന്ന് മരുന്ന് കലർത്തിയ കറിയുപ്പ് വിതരണം ചെയ്ത് മാതൃകാ പദ്ധതി തയ്യാറാക്കിയ സംഘത്തിൽ അംഗമായിരുന്നു. കോട്ടക്കൽ ആര്യവൈദ്യശാല, ഔഷധി, വൈദ്യമഠം എന്നീ സ്ഥാപനങ്ങളുടെ ഫാർമക്കോളജി ഉപദേശകനായും പ്രവർത്തിച്ചിട്ടുണ്ട്.

ഓസ്ട്രേലിയ ഉൾപ്പെടെ ഒൻപത് രാജ്യങ്ങളിലേക്ക് വ്യവസായ വികസനസാധ്യതകൾ പരിശോധിക്കാൻ കേന്ദ്ര എക്സ്പോർട്ട് പ്രൊമോഷൻ കൗൺസിൽ നിശ്ചയിച്ച സമിതിയിൽ അംഗമായിരുന്നു.

കുടുംബവും സംസ്കാരച്ചടങ്ങുകളും

തിരുവല്ല നെടുമ്പ്രം കൊട്ടാരത്തിലെ ജയശ്രീവർമയാണ് ഭാര്യ. വിവർത്തകയും ബുക്ക് എഡിറ്ററുമായ സുനീതി രാജ (ഡൽഹി), നാഷണൽ കോളജ് ഓഫ് ഫാർമസി പ്രിൻസിപ്പൽ ഡോ. കെ. സുജിത്ത് വർമ എന്നിവർ മക്കളാണ്. കെ.സി. രവീന്ദ്രൻ രാജ, ആർ. ദിവ്യ എന്നിവർ മരുമക്കളും ഇന്ദിര രവിവർമ, സരസ്വതിവർമ എന്നിവർ സഹോദരങ്ങളുമാണ്.

ഭൗതികശരീരം ചൊവ്വാഴ്ച രാവിലെ 10 മണിക്ക് ചിന്താവളപ്പിലെ സ്വവസതിയിൽ പൊതുദർശനത്തിന് എത്തിക്കും. സംസ്‌കാരം ചൊവ്വാഴ്ച വൈകീട്ട് 6.30-ന് മാവൂർ റോഡ് സ്മൃതി പഥം ശ്മശാനത്തിൽ നടക്കും. സഞ്ചയനം വെള്ളിയാഴ്ച.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്.

Article Summary: Kozhikode Samoothiri Raja PK Kerala Varma passed away at 90.

#Kozhikode #SamoothiriRaja #PKKeralaVarma #MalayalamNews #Obituary #Kvartha #AnjanaNews