സ്കൂൾ പടി കാണും മുൻപേ വിധി; ഓടയിലെ ഒഴുക്കിൽപ്പെട്ട് നാലര വയസ്സുകാരിക്ക് ദാരുണാന്ത്യം

കൊല്ലം: (KVARTHA) ജില്ലയിലെ ചവറയിൽ ദാരുണ സംഭവം. അവധിക്കാലം ആഘോഷിക്കാൻ അപ്പൂപ്പന്റെ വീട്ടിലെത്തിയ നാലര വയസ്സുകാരി ഒഴുക്കിൽപ്പെട്ട് മരിച്ചു. 

കൊട്ടാരക്കര പള്ളിക്കൽ പാലവിളയിൽ വീട്ടിൽ അനീഷിന്റെയും രശ്മിയുടെയും മകൾ അക്ഷിക (കല്യാണി) ആണ് മരിച്ചത്. പള്ളിക്കൽ എൻഎസ്എസ് എൽപി സ്കൂളിൽ ഈ വർഷം എൽകെജിയിൽ പ്രവേശനം ലഭിച്ച അക്ഷിക, തിങ്കളാഴ്ച സ്കൂളിൽ ആദ്യമായി പോകാനിരിക്കുകയായിരുന്നു.

ഏകദേശം ഒന്നര മാസം മുൻപാണ് അക്ഷിക ചവറ പന്മന വടുതല തളിയാഴ്ച വീട്ടിലെ അപ്പൂപ്പൻ്റെയും അമ്മൂമ്മയുടെയും അടുത്തെത്തിയത്. ഞായറാഴ്ച വൈകുന്നേരം കൂട്ടുകാരുമൊത്ത് വീടിന് സമീപത്തുള്ള ഓടയുടെ സ്ലാബിലൂടെ സൈക്കിൾ ഉരുട്ടുകയായിരുന്നു കുട്ടി. സ്ലാബ് ഇല്ലാത്ത ഒരിടത്തുവെച്ച് കാൽവഴുതി അക്ഷിക ഓടയിലേക്ക് വീണു, ശക്തമായ ഒഴുക്കിൽ പെട്ടെന്ന് ഒഴുകിപ്പോവുകയായിരുന്നു.

അപകടം ശ്രദ്ധയിൽപ്പെട്ട ഉടൻതന്നെ നാട്ടുകാർ ഓടയിലിറങ്ങി കുട്ടിക്കായി തിരച്ചിൽ ആരംഭിച്ചു. ഏകദേശം മുന്നൂറ് മീറ്റർ അകലെ അബോധാവസ്ഥയിൽ കുട്ടിയെ കണ്ടെത്താനായി. ഉടൻതന്നെ കരുനാഗപ്പള്ളി താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. 

മൃതദേഹം നിലവിൽ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. തിങ്കളാഴ്ച സ്കൂളിൽ പോകാനിരുന്ന ഒരു കുരുന്നിന്റെ അപ്രതീക്ഷിതമായ വിയോഗം നാടിനെ ദുഃഖത്തിലാഴ്ത്തി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.
 

Summary: A 4.5-year-old girl, Aksika, drowned after falling into an open drain in Chavara, Kollam, just days before her first day of LKG, sparking grief in the community.
 

 #Kollam #Tragedy #ChildSafety #DrainAccident #KeralaNews #Chavara