കണ്ണൂർ നിരത്തുകളിൽ വീണ്ടും സ്വകാര്യ ബസുകളുടെ മരണപ്പാച്ചിൽ; സരസൻ്റെ വിയോഗത്തിൽ നടുങ്ങി നാട്

കണ്ണൂർ: (KVARTHA) രാവിലെയുള്ള തിരക്കിട്ട യാത്രകൾക്കിടയിൽ കണ്ണൂരിലെ നിരത്തുകളിൽ പൊലിയുന്ന ജീവനുകളുടെ പട്ടികയിലേക്ക് സങ്കടകരമായ മറ്റൊരു പേര് കൂടി. സ്വകാര്യ ബസിടിച്ച് സ്കൂട്ടർ യാത്രികൻ മരിച്ച സംഭവത്തിൽ ബസ് ഡ്രൈവർക്കെതിരെ എടക്കാട് പൊലീസ് മനഃപൂർവമല്ലാത്ത നരഹത്യയ്ക്ക് കേസെടുത്ത് അന്വേഷണം ആരംഭിച്ചു. കണ്ണൂർ പിള്ളയാർ കോവിലിലെ ജീവനക്കാരനും, മാവിലായി മുണ്ടയോട് ശ്രേയസ്സിൽ പരേതരായ കെ വി കൃഷ്ണൻ - രുഗ്മിണി ദമ്പതികളുടെ മകനുമായ പി സരസൻ (58) ആണ് വാഹനാപകടത്തിൽ മരിച്ചത്. മുൻ മുഖ്യമന്ത്രിയുടെ പൊളിറ്റിക്കൽ സെക്രട്ടറിയും സിപിഎം സംസ്ഥാന കമ്മിറ്റി അംഗവുമായ അഡ്വ. പി ശശിയുടെ സഹോദരനാണ് മരിച്ച സരസൻ. വ്യാഴാഴ്ച രാവിലെയാണ് അപകടം.

മത്സരയോട്ടം ജീവനെടുത്തു; തകർന്നടിഞ്ഞ് വഴിവിളക്കുകൾ

കണ്ണൂർ - കൂത്തുപറമ്പ് റോഡിലോടുന്ന നബീൽ എന്ന സ്വകാര്യ ബസാണ് അപകടമുണ്ടാക്കിയത്. സമയക്രമം പാലിക്കാനായി മത്സരയോട്ടം നടത്തിയ ബസ്, മുന്നിൽ പോവുകയായിരുന്ന സ്കൂട്ടർ യാത്രികനെ ഇടിച്ചു തെറിപ്പിക്കുകയായിരുന്നുവെന്ന് ദൃക്സാക്ഷികൾ പറയുന്നു. ആടൂർ പാലത്തിനടുത്തുള്ള പെട്രോൾ പമ്പിന് മുൻപിൽ സൗന്ദര്യവൽക്കരണത്തിൻ്റെ ഭാഗമായി സ്ഥാപിച്ചിരുന്ന ഇരുമ്പുകമ്പികളും വിളക്കുതൂണും പൂർണ്ണമായും തകർത്താണ് ബസ് നിന്നത്. ഇടിയുടെ ആഘാതത്തിൽ സ്‌കൂട്ടറിൻ്റെ ഒരു ഭാഗം ബസിൻ്റെ മുൻവശത്തെ ടയറിൻ്റെ ഭാഗത്തേക്ക് കയറിയിരുന്നു. കണ്ണൂർ-കൂത്തുപറമ്പ് റൂട്ടിൽ സ്വകാര്യ ബസുകൾ നടത്തുന്ന ഇത്തരം മത്സരയോട്ടങ്ങൾ വലിയ അപകടങ്ങൾക്ക് കാരണമാകുന്നുണ്ടെന്ന് യാത്രക്കാർ നിരന്തരം പരാതിപ്പെടുന്നതാണ്. പലപ്പോഴും സമയക്രമം പാലിക്കാനുള്ള ബസ് ജീവനക്കാരുടെ നെട്ടോട്ടമാണ് റോഡിൽ മറ്റ് യാത്രക്കാരുടെ ജീവനെടുക്കുന്നത്.

രക്ഷാപ്രവർത്തനം വിഫലമായി

അപകടത്തെ തുടർന്ന് റോഡിലേക്ക് തെറിച്ചുവീണ സരസനെ ഓടിക്കൂടിയ നാട്ടുകാർ ചേർന്ന് ഉടൻ തന്നെ രക്ഷിക്കാൻ ശ്രമിച്ചെങ്കിലും തൽക്ഷണം മരണം സംഭവിച്ചിരുന്നു. കർശനമായ ഗതാഗത നിയമങ്ങൾ നിലവിലുണ്ടായിട്ടും നിരത്തുകളിൽ ഇത്തരം ദാരുണ സംഭവങ്ങൾ ആവർത്തിക്കുന്നത് മോട്ടോർ വാഹന വകുപ്പിൻ്റെയും പൊലീസിൻ്റെയും പരിശോധനാ വീഴ്ചയാണെന്ന വിമർശനവും പ്രദേശവാസികൾ ഉന്നയിക്കുന്നുണ്ട്. അമിതവേഗതയിൽ പായുന്ന വാഹനങ്ങൾക്കെതിരെ കർശന നടപടി വേണമെന്ന ജനകീയ ആവശ്യം ഇതോടെ വീണ്ടും ശക്തമാവുകയാണ്.

വൈകുന്നേരം സംസ്കാരം

അനിഷയാണ് മരിച്ച സരസൻ്റെ ഭാര്യ. വിദ്യാർഥിയായ നന്ദന ഏക മകളാണ്. അഡ്വ. പി ശശി, സതീശൻ, ഉഷ, വിരമിച്ച സബ് ഇൻസ്പെക്ടർ വിനോദൻ, ഷീല, ശ്രീജ എന്നിവർ സഹോദരങ്ങളാണ്. കണ്ണൂർ ജില്ലാ ആശുപത്രിയിൽ പോസ്റ്റ്‌മോർട്ടം നടപടികൾ പൂർത്തിയാക്കിയ ശേഷം മൃതദേഹം ബന്ധുക്കൾക്കും പൊതുദർശനത്തിനുമായി വിട്ടുനൽകും. അതിനുശേഷം വൈകുന്നേരം അഞ്ച് മണിക്ക് പെരളശ്ശേരി പഞ്ചായത്ത് കുഴിക്കിലായി സ്‌മൃതി തീരം പൊതുശ്മശാനത്തില്‍ വെച്ചാകും സംസ്കാര ചടങ്ങുകൾ നടക്കുക. 

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക.

#KannurNews #Kuthuparamba #RoadAccident #PSasi #PrivateBusIssue #KeralaPolice #PrathibhaNews

Keywords: Kannur bus accident, P Sasi brother death, Sarasan Mavilayi, Nabeel bus Edakkad, Adoor bridge accident, Pillayar Kovil employee