ആസ്റ്റർ ഡി എം ഹെൽത്ത് കെയർ മെഡിക്കൽ ഡയറക്ടർ ഡോ നാസർ മൂപ്പൻ അന്തരിച്ചു

ദുബൈ: (KVARTHA) ഖത്തറിലെ ആസ്റ്റർ ഡി.എം ഹെൽത്ത് കെയറിന്റെ മെഡിക്കൽ ഡയറക്ടറും പ്രമുഖ ഇ.എൻ.ടി കൺസൾട്ടന്റുമായ ഡോ. മുഹമ്മദ് നാസർ മൂപ്പൻ (69) ദുബായിൽ അന്തരിച്ചു. ഇ.എൻ.ടി രംഗത്ത് ഖത്തറിലും മറ്റ് ഗൾഫ് രാജ്യങ്ങളിലും ശ്രദ്ധേയമായ സേവനം അനുഷ്ഠിച്ച വ്യക്തിത്വമായിരുന്നു അദ്ദേഹം.

കോഴിക്കോട് മെഡിക്കൽ കോളേജ്, ജെ.ജെ.എം മെഡിക്കൽ കോളേജ് മൈസൂർ എന്നിവിടങ്ങളിൽ നിന്ന് വിദ്യാഭ്യാസം പൂർത്തിയാക്കിയ ഡോ. നാസർ, 2002-ലാണ് ആസ്റ്റർ ഡി.എം ഹെൽത്ത് കെയറിൽ ചേർന്നത്. സ്ഥാപനത്തിന്റെ വളർച്ചയിൽ നിർണായകമായ പങ്കുവഹിച്ച വ്യക്തികൂടിയാണ് അദ്ദേഹം. ആസ്റ്റർ ഡി.എം ഹെൽത്ത് കെയറിന്റെ സ്ഥാപകനും ചെയർമാനുമായ ഡോ. ആസാദ് മൂപ്പന്റെ സഹോദരിയുടെ മകനാണ് ഡോ. മുഹമ്മദ് നാസർ മൂപ്പൻ.

പരേതരായ ഡോ. സൈനുദ്ദീൻ മൂപ്പനും സുലൈഖയുമാണ് മാതാപിതാക്കൾ. ഭാര്യ വാഹിദ. നദ (ദുബൈ), നിമ്മി (ദുബൈ), സൈൻ (ഓസ്‌ട്രേലിയ) എന്നിവരാണ് മക്കൾ. ഹാനി, ദർവീഷ്, നഹീദ എന്നിവർ മരുമക്കളാണ്.

ആസ്റ്റർ ഖത്തറിലെ മെഡിക്കൽ ഡയറക്ടർ ഡോ. നാസർ മൂപ്പന്റെ നിര്യാണം: ആരോഗ്യരംഗത്തിന് തീരാനഷ്ടം: ഡോ. ആസാദ് മൂപ്പൻ

ദോഹ: ആസ്റ്റർ ഖത്തറിലെ മെഡിക്കൽ ഡയറക്ടറും പ്രമുഖ ഇ.എൻ.ടി. കൺസൾട്ടന്റുമായിരുന്ന ഡോ. നാസർ മൂപ്പന്റെ വിയോഗം ആരോഗ്യരംഗത്തിനും പൊതുസമൂഹത്തിനും അഗാധമായ ദുഃഖവും നികത്താനാവാത്ത നഷ്ടവുമാണ് സമ്മാനിച്ചിരിക്കുന്നതെന്ന് ഡോ. ആസാദ് മൂപ്പൻ അനുശോചിച്ചു..

ഡോ. നാസർ, ഖത്തറിലെ വൈദ്യസമൂഹത്തിലെ ഒരു പ്രധാന വ്യക്തിത്വമായിരുന്നു. ഒപ്പം, കരുണയും പ്രതിബദ്ധതയുമുള്ള ഡോക്ടറായും മികച്ച ഒരു നേതൃത്വമായും ആസ്റ്റർ കുടുംബത്തിലെ അനേകം പേർക്ക് പ്രിയപ്പെട്ട സഹപ്രവർത്തകനായും അദ്ദേഹം ഓർമ്മിക്കപ്പെടുന്നു. വർഷങ്ങളോളം, വിശ്വാസ്യത, മികവ്, സഹാനുഭൂതി തുടങ്ങിയ മൂല്യങ്ങൾ മുറുകെ പിടിച്ച് മറ്റുള്ളവരുടെ സേവനത്തിനായി ഡോ. നാസർ തന്റെ ജീവിതം സമർപ്പിച്ചു.

ഖത്തറിലെ ആരോഗ്യസംരക്ഷണ മേഖലയ്ക്ക് അദ്ദേഹം നൽകിയ സംഭാവനകൾ എന്നും നിലനിൽക്കുന്നവയാണ്. അദ്ദേഹത്തിൻ്റെ പരിചരണത്തിലൂടെയും പിന്തുണയിലൂടെയും ആശ്വാസം കണ്ടെത്തിയ അനേകം ജീവിതങ്ങളിലൂടെ ഡോ. നാസറിൻ്റെ ഓർമ്മകൾ സജീവമായി നിലകൊള്ളും. ആസ്റ്റർ ഡി.എം. ഹെൽത്ത്കെയർ കുടുംബവും ഞാനും അദ്ദേഹത്തിൻ്റെ കുടുംബത്തിനും പ്രിയപ്പെട്ടവർക്കും സഹപ്രവർത്തകർക്കും, അതുപോലെ അദ്ദേഹത്തെ പരിചയപ്പെട്ട ഓരോ വ്യക്തിക്കും ഹൃദയം നിറഞ്ഞ അനുശോചനം രേഖപ്പെടുത്തുന്നു. അദ്ദേഹത്തിൻ്റെ ആത്മാവിന് നിത്യശാന്തി ലഭിക്കാൻ പ്രാർത്ഥിക്കുന്നു.

ഈ ദുഃഖവാർത്ത നിങ്ങളുടെ സുഹൃത്തുക്കളുമായി പങ്കുവെക്കുക.

Article Summary: Dr. Mohammed Nazar Moopan, Aster DM Healthcare medical director, passed away in Dubai.

#DrNazarMoopan #AsterHealthcare #ENTSpecialist #Duba #Qatar #MedicalNews