ചെറുതാഴത്ത് സ്കൂട്ടറിൽ കാട്ടുപന്നിയിടിച്ചു; ചികിത്സയിലായിരുന്ന മധ്യവയസ്കൻ മരിച്ചു

പരിയാരം: (KVARTHA) ചെറുതാഴത്ത് സ്കൂട്ടറിൽ കാട്ടുപന്നിയിടിച്ചു തെറിച്ചു വീണു പരിക്കേറ്റു ചികിത്സയിലായിരുന്ന മധ്യവയസ്കൻ മരിച്ചു. പരിയാരം മുടിക്കാനം കുണ്ടപ്പാറയിലെ ഇടച്ചേരിയൻ തോമസ് (62) ആണ് മരിച്ചത്. വെള്ളിയാഴ്ച രാവിലെ എട്ടിന് ചെറുതാഴം മേലതിയടത്താണ് അപകടം നടന്നത്. 

സ്കൂട്ടറിൽ ഏമ്പേറ്റ് വഴി മാട്ടൂലിലേക്ക് പോകുന്നതിനിടെ മേലതിയടം റോഡിൻ്റെ ഇടതുഭാഗത്തുള്ള കുറ്റിക്കാട്ടിൽ നിന്നും പന്നി ഓടിവന്ന് സ്കൂട്ടറിൽ ഇടിക്കുകയായിരുന്നു. ഇടിയുടെ ആഘാതത്തിൽ ഇരുവരും റോഡിലേക്ക് തെറിച്ചുവീണു. അപകടത്തിൽ തോമസിൻ്റെ മകൻ ഇ ടി ജിനുവിനും (31) പരിക്കേറ്റിരുന്നു. ജിനുവിൻ്റെ തോളെല്ലിനും കൈക്കുമാണ് പരിക്കേറ്റത്.

ആശുപത്രിയിലെ ചികിത്സ

തോമസിന് തലയ്ക്കും നട്ടെല്ലിനുമാണ് ഗുരുതരമായി പരിക്കേറ്റിരുന്നത്. പരിയാരം മെഡിക്കൽ കോളേജ് ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലിരിക്കെ ഞായറാഴ്ച രാവിലെയാണ് തോമസ് അന്തരിച്ചത്. മൃതദേഹം പരിയാരം പൊലീസ് ഇൻക്വസ്റ്റ് നടത്തി പോസ്റ്റ്‌മോർട്ടം നടപടികൾക്കായി ആശുപത്രി മോർച്ചറിയിലേക്ക് മാറ്റി.

കാട്ടുപന്നി ശല്യം അതിരൂക്ഷം

ചെറുതാഴം പ്രദേശത്തെ ജനവാസ കേന്ദ്രങ്ങളിൽ ഇറങ്ങി കൃഷി നശിപ്പിക്കുന്ന കാട്ടുപന്നികളുടെ ശല്യം അതിരൂക്ഷമാണെന്ന് പ്രദേശവാസികൾ പരാതിപ്പെടുന്നു. കൃഷിയിടങ്ങളിലെ വിളനാശത്തിന് പുറമെ, രാത്രിയിൽ വാഹന യാത്രക്കാർക്കും ഇവ വലിയ ഭീഷണിയാണ് ഉയർത്തുന്നത്. അടിയന്തരമായി വനം വകുപ്പ് ഇടപെട്ട് നടപടികൾ സ്വീകരിക്കണമെന്നാണ് നാട്ടുകാരുടെ ആവശ്യം.

പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Idacherian Thomas (62), a resident of Pariyaram, succumbed to his injuries after his scooter was hit by a wild boar in Cheruthazham, Kannur. The accident occurred on Friday, July 10, when the boar suddenly crossed the road from the bushes. 

#Cheruthazham #KannurNews #WildBoarAttack #AccidentalDeath #Pariyaram #KeralaNews #LocalNews #AmmuNews