നീറ്റ് പരിശീലനത്തിനിടെ സഹോദരി മരിച്ച സംഭവത്തിന് പിന്നാലെ സഹോദരനെയും ലോഡ്ജിൽ മരിച്ച നിലയിൽ കണ്ടെത്തി

കാസർകോട്: (KVARTHA) നീറ്റ് പുനഃപരീക്ഷയ്ക്കുള്ള പരിശീലനത്തിനിടെയുണ്ടായ മാനസിക സമ്മർദം കാരണം കോച്ചിങ് സെന്ററിൽ സഹോദരി ജീവനൊടുക്കിയതിന് പിന്നാലെ, ഗൾഫിൽ നിന്നും നാട്ടിലെത്തിയ സഹോദരനെയും മംഗ്ളൂരിലെ ലോഡ്ജിൽ മരിച്ച നിലയിൽ കണ്ടെത്തി. ബേക്കൽ പള്ളിക്കര മുക്കൂട് സ്വദേശിയായ മഹേഷിൻ്റെ മകൻ അർജുൻ മഹേഷിനെയാണ് (24) മരിച്ച നിലയിൽ കണ്ടെത്തിയത്. 

മംഗ്ളൂരു ബജ്‌പെ പൊലീസ് സ്റ്റേഷൻ പരിധിയിലെ മറവൂർ എന്ന സ്ഥലത്തെ ലോഡ്ജിൽ തിങ്കളാഴ്ച ഉച്ചയോടെയാണ് അർജുനെ മരിച്ച നിലയിൽ കണ്ടെത്തിയത്. ലോഡ്ജ് മുറിയിൽ തൂങ്ങിയ നിലയിലായിരുന്നു മൃതദേഹം കണ്ടെത്തിയതെന്ന് പൊലീസ് അറിയിച്ചു.

സഹോദരിയുടെ വിയോഗവും ആത്മഹത്യയും

അർജുൻ്റെ സഹോദരി ഐജ ആർ മഹേഷ് കഴിഞ്ഞ ജൂൺ മാസം നീറ്റ് ചോദ്യപേപ്പർ ചോർച്ചയെ തുടർന്ന് വീണ്ടും പരീക്ഷാ പരിശീലനത്തിനായി പാലയിലെ പരിശീലന കേന്ദ്രത്തിൻ്റെ ഹോസ്റ്റലിൽ ജീവനൊടുക്കിയിരുന്നു. ജൂൺ 21-ന് നടന്ന നീറ്റ് പുനഃപരീക്ഷയ്ക്കുള്ള ഒരുക്കങ്ങൾക്കിടെയായിരുന്നു ഐജയുടെ മരണം. 

പരീക്ഷയുമായി ബന്ധപ്പെട്ട കടുത്ത മാനസിക സമ്മർദമാണ് ഇതിന് കാരണമെന്ന് അന്ന് പ്രാഥമികമായി വിലയിരുത്തിയിരുന്നു. സഹോദരിയുടെ മരണത്തിന് ശേഷം അർജുൻ ഗൾഫിൽ നിന്നും നാട്ടിലെത്തിയിരുന്നുവെങ്കിലും പിന്നീട് ഗൾഫിലേക്ക് തിരിച്ചുപോയിരുന്നു.

യാത്രാവിവരങ്ങളും പൊലീസിന്റെ അന്വേഷണവും

ഞായറാഴ്ച നാട്ടിലേക്ക് പോകുകയാണെന്ന് അർജുൻ അടുത്ത സുഹൃത്തുക്കളോട് പറഞ്ഞിരുന്നതായാണ് വിവരം. തുടർന്ന് മംഗ്ളൂരുവിലേക്കുള്ള വിമാനത്തിൽ യാത്ര ചെയ്യുകയായിരുന്നു. ഞായറാഴ്ച ഉച്ചയ്ക്ക് ഒരു മണിയോടെ അർജുൻ മാതാവിനെ ഫോണിൽ വിളിച്ച് സംസാരിച്ചിരുന്നെങ്കിലും, നാട്ടിലേക്ക് മടങ്ങിയെത്തുന്ന കാര്യം മാതാവിനോട് പറഞ്ഞിരുന്നില്ലെന്ന് ബന്ധുക്കൾ വ്യക്തമാക്കുന്നു. ഉച്ചയ്ക്കുശേഷം അർജുൻ്റെ സുഹൃത്തുക്കൾ വീട്ടിലേക്ക് വിളിച്ച് അർജുൻ നാട്ടിലേക്ക് തിരിച്ചതായി അറിയിച്ചതോടെയാണ് വീട്ടുകാർ വിവരം അറിയുന്നത്.

തുടർന്ന് അർജുനെ ഫോണിൽ ബന്ധപ്പെടാൻ വീട്ടുകാർ ശ്രമിച്ചെങ്കിലും പ്രതികരണമുണ്ടായില്ല. പിന്നീട് ഫോൺ സ്വിച്ച് ഓഫ് ആകുകയായിരുന്നു. ആശങ്കയിലായ ബന്ധുക്കളും നാട്ടുകാരും ഞായറാഴ്ച തന്നെ മംഗ്ളൂരിൽ എത്തി വിവിധ സ്ഥലങ്ങളിൽ അന്വേഷണം നടത്തിയെങ്കിലും കണ്ടെത്താനായില്ല. 

തുടർന്ന് തിങ്കളാഴ്ച ഉച്ചയോടെയാണ് മറവൂരിലെ ലോഡ്ജിൽ അർജുനെ മരിച്ച നിലയിൽ കണ്ടെത്തിയത്. വിവരമറിഞ്ഞ് ബജ്‌പെ പൊലീസ് സ്ഥലത്തെത്തി തുടർനടപടികൾ സ്വീകരിച്ചു. മരണത്തിന് പിന്നിലെ കാരണം സംബന്ധിച്ച് പൊലീസ് സമഗ്രമായ അന്വേഷണം ആരംഭിച്ചിട്ടുണ്ട്. മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി.

ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. മാനസിക ബുദ്ധിമുട്ടുകൾ ഉണ്ടായാൽ ഉടൻ വിദഗ്ധ സഹായം തേടുക. ടോൾ ഫ്രീ നമ്പർ: 1056, 14416

പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: A 24-year-old youth from Bekal, whose sister was previously found dead during her NEET coaching, was found dead in a lodge in Mangaluru after returning from the Gulf.

#Mangaluru #Bekal #Kasargod #KeralaPolice #UnnaturalDeath #KeralaNews #NEET #MentalHealthAwareness #MalayalamNews #AmmuNews