നിര്‍ത്തിയിട്ടിരുന്ന കാറിന് തീപിടിച്ച് അമ്മയും നാലുവയസുകാരനായ മകനും വെന്തുമരിച്ചു

ബംഗളൂരു: (www.kvartha.com 03.02.2018) ബംഗളൂരുവില്‍ നിര്‍ത്തിയിട്ടിരുന്ന കാറിന് തീപിടിച്ച് അമ്മയും നാലുവയസുകാരനായ മകനും വെന്തുമരിച്ചു. മധ്യപ്രദേശ് ഇന്‍ഡോര്‍ സ്വദേശിനി നേഹ വര്‍മ(30), നാലുവയസുകാരനായ മകന്‍ പരം എന്നിവരാണ് മരിച്ചത്. ബംഗളൂരു ബോര്‍ വെല്‍ റോഡിലെ നെല്ലുരുഹള്ളിയിലെ സുമധുര ആനന്ദം അപ്പാര്‍ട് മെന്റിലെ താമസക്കാരാണ് മരിച്ച അമ്മയും മകനും. വെള്ളിയാഴ്ച ഉച്ചകഴിഞ്ഞ് അപ്പാര്‍ട്‌മെന്റിലെ പാര്‍ക്കിംഗ് ഏരിയയില്‍ വെച്ചാണ് സംഭവം.

ബെലഗാവി സ്വദേശി രാജേഷ് കുമാറാണ് നേഹയുടെ ഭര്‍ത്താവ്. അപ്പാര്‍ട്‌മെന്റില്‍ പാര്‍ക്ക് ചെയ്തിരുന്ന ഇവരുടെ മാരുതി റിട്‌സ് കാറിന് തീപിടിച്ചാണ് അപകടം. വെള്ളിയാഴ്ച ഉച്ചയ്ക്ക് കാറിന് തീപിടിച്ചതുകണ്ട് അപ്പാര്‍ട്‌മെന്റിലെ സെക്യൂരിറ്റി ജീവനക്കാരന്‍ ഓടിയെത്തുകയും തീകെടുത്താന്‍ ശ്രമിക്കുകയും ചെയ്തു. വിവരം ഉടന്‍തന്നെ ഫയര്‍‌സ്റ്റേഷനിലും പോലീസ് സ്‌റ്റേഷനിലും അറിയിച്ചു. വിവരമറിഞ്ഞ് പോലീസ് ഉടന്‍ തന്നെ സ്ഥലത്തെത്തി. ഫയര്‍ഫോഴ്‌സ് നാലുമണിയോടെ സ്ഥലത്തെത്തി തീകെടുത്തിയെങ്കിലും അപ്പോഴേക്കും അമ്മയും മകനും കാറിനുള്ളില്‍ വെന്തുമരിച്ചിരുന്നു.


ഷോര്‍ട് സര്‍ക്യൂട്ട് കാരണം എഞ്ചിന് തീപിടിച്ചതാകാം അപകട കാരണമെന്നാണ് സംശയിക്കുന്നത്. പോലീസ് കേസെടുത്ത് അന്വേഷണം ആരംഭിച്ചു.