ശാന്തകുമാരി അമ്മ വിടവാങ്ങി; സിനിമാ ലോകം മോഹൻലാലിന്റെ വീട്ടിലേക്ക്

കൊച്ചി: (KVARTHA) പ്രമുഖ ചലച്ചിത്ര നടൻ മോഹൻലാലിന്റെ മാതാവ് ശാന്തകുമാരി അമ്മ (90) അന്തരിച്ചു. കൊച്ചി എളമക്കരയിലുള്ള വസതിയിലായിരുന്നു അന്ത്യം. പക്ഷാഘാതത്തെ തുടർന്ന് ദീർഘനാളായി ചികിത്സയിലായിരുന്നു. പരേതനായ വിശ്വനാഥൻ നായരാണ് ഭർത്താവ്. മോഹൻലാലിന്റെ സഹോദരൻ പ്യാരിലാലും നേരത്തെ അന്തരിച്ചിരുന്നു.

വാർത്തയറിഞ്ഞ് സിനിമാ സാംസ്‌കാരിക രംഗത്തെ നിരവധി പ്രമുഖർ മോഹൻലാലിന്റെ വസതിയിലെത്തി. നടൻ മമ്മൂട്ടി ഉൾപ്പെടെയുള്ളവർ വീട്ടിലെത്തി അന്ത്യോപചാരം അർപ്പിച്ചു. കൊച്ചിയിലെ നടപടികൾക്ക് ശേഷം മൃതദേഹം തിരുവനന്തപുരം മുടവൻമുഗളിലെ കുടുംബവീട്ടിലേക്ക് കൊണ്ടുപോകുമെന്നാണ് ലഭ്യമായ വിവരം. സംസ്കാരം ബുധനാഴ്ച നടക്കും.

ഭർത്താവ് വിശ്വനാഥൻ നായരുടെയും മകൻ പ്യാരിലാലിന്റെയും വേർപാടിന് ശേഷം ശാന്തകുമാരി അമ്മ മോഹൻലാലിനൊപ്പമായിരുന്നു താമസം. അമ്മയുമായി വളരെ അടുത്ത ആത്മബന്ധമാണ് മോഹൻലാൽ പുലർത്തിയിരുന്നത്. പല വേദികളിലും ബ്ലോഗുകളിലും തന്റെ വളർച്ചയിൽ അമ്മ ചെലുത്തിയ വലിയ സ്വാധീനത്തെക്കുറിച്ച് മോഹൻലാൽ വികാരാധീനനായി സംസാരിച്ചിട്ടുണ്ട്.

കഴിഞ്ഞ വർഷം അമ്മയുടെ 89-ാം പിറന്നാൾ മോഹൻലാലിന്റെ നേതൃത്വത്തിൽ ബന്ധുക്കളും സുഹൃത്തുക്കളും ചേർന്ന് ആഘോഷിച്ചിരുന്നു. ഇതിന്റെ ചിത്രങ്ങൾ സോഷ്യൽ മീഡിയയിൽ ശ്രദ്ധ നേടിയിരുന്നു. തന്റെ സിനിമാ ജീവിതത്തിലെ ഏറ്റവും വലിയ അംഗീകാരങ്ങളിൽ ഒന്നായ ദാദാ സാഹേബ് ഫാൽക്കേ പുരസ്‌കാരം ലഭിച്ചപ്പോൾ ആ വിവരം താരം ആദ്യം പങ്കുവെച്ചതും അമ്മയോടൊപ്പമായിരുന്നു.

പുരസ്‌കാര വിവരം അറിഞ്ഞയുടൻ മോഹൻലാൽ അമ്മയെ കാണാനാണ് എത്തിയത്. ആ നേട്ടം അമ്മയ്ക്കൊപ്പം പങ്കിടാൻ കഴിഞ്ഞത് തന്റെ ജീവിതത്തിലെ വലിയ ഭാഗ്യമാണെന്ന് അദ്ദേഹം അന്ന് പ്രതികരിച്ചിരുന്നു. തന്റെ വ്യക്തിജീവിതത്തിലും കരിയറിലും അമ്മ നൽകിയ പിന്തുണയും പ്രാർത്ഥനയും എടുത്തുപറയാൻ താരം എന്നും ശ്രദ്ധിച്ചിരുന്നു.

ഈ വാർത്ത ഷെയർ ചെയ്യൂ.

Article Summary: Actor Mohanlal's mother Santhakumari Amma passed away at the age of 90.

#Mohanlal #SanthakumariAmma #Obituary #MalayalamCinema #Kochi #Trivandrum