കാസര്‍കോട്: കണ്ണിന് കാന്‍സര്‍ ബാധിച്ച് തിരുവനന്തപുരം റീജ്യണല്‍ കാന്‍സര്‍ സെന്ററില്‍ ചികിത്സതേടിയിരുന്ന അഡൂര്‍ പാണ്ടി ബെള്ളച്ചേരിയിലെ അബ്ദുല്‍ ഖാദര്‍-ആമിന ദമ്പതികളുടെ മകള്‍ തബ്‌സീറ (നാല്) വേദനയില്ലാത്ത ലോകത്തേക്ക് യാത്രയായി.
വ്യാഴാഴ്ച പുലര്‍ച്ചെ അഡൂര്‍ പാണ്ടിയിലെ വീട്ടില്‍ വെച്ചായിരുന്നു തബ്‌സീറ മരിച്ചത്.
ഇടത് കണ്ണിന് കാന്‍സര്‍ ബാധിച്ച് കഴിഞ്ഞ ജനുവരിയോടെ കണ്ണിന്റെ കാഴ്ച നഷ്ടപ്പെട്ടപെടുകയും അസഹ്യമായ വേദന അനുഭവപ്പെടുകയും ചെയ്തതിനെ തുടര്‍ന്ന് കോയമ്പത്തൂര്‍ അരവിന്ദ് കണ്ണാശുപത്രിയില്‍ പരിശോധിക്കുകയും കണ്ണിന് കാന്‍സര്‍ ബാധിച്ചതായി ഡോക്ടര്‍മാര്‍ കണ്ടെത്തുകയുമായിരുന്നു. മൊഗ്രാല്‍ ദേശീയവേദി പ്രവര്‍ത്തകരും, സാമൂഹ്യ പ്രവര്‍ത്തകരും ചേര്‍ന്ന് തിരുവനന്തപുരം റീജ്യണല്‍ കാന്‍സര്‍ സെന്ററിലെത്തിച്ച് ചികിത്സ നല്‍കിയിരുന്നു. വലത് കണ്ണിനായിരുന്നു ആദ്യം അസുഖം കണ്ടിരുന്നത്. പിന്നീടാണ് ഇടത് കണ്ണിന് ഗുരുതരമായി സുഖം ബാധിച്ചത്. ചികിത്സയ്ക്ക് വേണ്ടുന്ന പണം കണ്ടെത്താന്‍ കഴിയാത്തതിനെ തുടര്‍ന്നാണ് ചികിത്സ വൈകിയത്. അസുഖം കുറച്ച് ഭേദമായപ്പോഴാണ് വീട്ടിലേക്ക് മാറ്റിയത്. ഇതിനിടയില്‍ ശരീരം ശോഷിക്കുകയും പരിശോധിച്ചപ്പോള്‍ രക്തത്തിലെ തകരാണെന്നും കണ്ടെത്തിയതിനെ തുടര്‍ന്ന് മംഗലാപുരം ആശുപത്രിയില്‍ ചികിത്സ നടത്തിയിരുന്നു. ഇതിനിടയില്‍ സംസാരശേഷി നഷ്ടമാകുകയും ചെയ്തു. തബ്‌സീറയുടെ ജീവന്‍ രക്ഷിക്കാന്‍ ഡോക്ടര്‍മാരും ഉദാരമതികളും എല്ലാ ശ്രമങ്ങളും നടത്തിയെങ്കിലും എല്ലരേയും തനിച്ചാക്കി തബ്‌സീറ വേദനയില്ലാത്ത ലോകത്തേക്ക് യാത്രയാവുകയായിരുന്നു.
അബ്ദുല്‍ ഖാദര്‍ആമിനാ ദമ്പതികളുടെ എട്ടുമക്കളില്‍ ഏഴാമത്തെ മകളാണ് നാലുവയസ്സുകാരി തബ്‌സീറ. സഹോദരങ്ങള്‍: സുഹൈമ, സൂഫിയ, സൗദ, സാജിദ, സഫ്വാന, സുനീസ്, ഖൈറുന്നിസ.
ഖബറടക്കം അഡൂര്‍ സഞ്ചിക്കാടവ് ജുമാമസ്ജിദ് ഖബര്‍സ്ഥാനില്‍ നടന്നു.