E-cycle | ലോകത്തിലെ ഏറ്റവും വലിയ ഇ-സൈക്കിൾ ജിഗാഫാക്‌ടറി ഇന്ത്യയിൽ വരുന്നു; പണം നിക്ഷേപിച്ചവരിൽ ധോണിയും; സവിശേഷതകൾ

നാല് ഘട്ടങ്ങളിലായി തങ്ങളുടെ നിർമാണ പ്ലാൻ്റ് സജ്ജമാകുമെന്ന് ഇമോട്ടോറാഡ് പറയുന്നു. പ്ലാൻ്റിൻ്റെ വലുപ്പം കണക്കിലെടുത്ത് ഇതിനെ ജിഗാഫാക്‌ടറി എന്ന് വിളിക്കുന്നു. നാല് ഘട്ടങ്ങളും പൂർത്തിയാകുമ്പോൾ, ലോകത്തിലെ ഏറ്റവും വലിയ ഇ-സൈക്കിൾ ജിഗാഫാക്‌ടറിയായി മാറുമെന്ന് കമ്പനി അവകാശപ്പെടുന്നു. ഓഗസ്റ്റ് 15 മുതൽ ഫാക്ടറിയുടെ പ്രവർത്തനം ആരംഭിക്കും.

ഓരോ വർഷവും അഞ്ച് ലക്ഷം ഇ-സൈക്കിളുകൾ നിർമ്മിക്കുമെന്ന് കമ്പനി പറയുന്നു. ഇ-സൈക്കിളുകളിൽ ഉപയോഗിക്കുന്ന പല ഘടകങ്ങളും ഈ പ്ലാൻ്റിൽ കമ്പനി നിർമ്മിക്കുകയും കൂട്ടിച്ചേർക്കുകയും ചെയ്യും. പ്ലാൻ്റിൽ ബാറ്ററികൾ, മോട്ടോറുകൾ, ഡിസ്‌പ്ലേകൾ, ചാർജറുകൾ എന്നിവ നിർമ്മിക്കാനാണ് കമ്പനി പദ്ധതിയിടുന്നത്. വരും ദിവസങ്ങളിൽ, പുതിയ ഇലക്ട്രിക് സൈക്കിളുകൾക്കൊപ്പം പുതിയ നൂതന ഉൽപ്പന്നങ്ങളും ഇമോട്ടോറാഡ് പുറത്തിറക്കിയേക്കും.

നിലവിൽ 250 ജീവനക്കാരാണ് കമ്പനിക്കുള്ളത്. 300 പുതിയ ജീവനക്കാരെ റിക്രൂട്ട് ചെയ്യാനാണ് കമ്പനി പദ്ധതിയിടുന്നത്. ഇലക്ട്രിക് സൈക്കിളുകളുടെ വിപണി വളരെ വലുതാണെന്ന് ഇമോട്ടോറാഡിൻ്റെ സഹസ്ഥാപകനും സിഇഒയുമായ കുനാൽ ഗുപ്ത ചൂണ്ടിക്കാട്ടുന്നു. ആഗോളതലത്തിൽ ഇ-സൈക്കിളിൻ്റെ ആവശ്യം വർധിച്ചുകൊണ്ടിരിക്കുകയാണ്. 2022ൽ ആഗോള ഇ-സൈക്കിൾ വിപണി 40 ബില്യൺ ഡോളറായിരുന്നു, അത് തുടർച്ചയായി കുതിക്കുകയാണ്. ഇലക്ട്രിക് സൈക്കിൾ മേഖലയിൽ ലോകം മുഴുവൻ ചൈനയെയാണ് ആശ്രയിക്കുന്നത്. ചൈനയെക്കാൾ ഇന്ത്യയെ മുന്നിലെത്തിക്കാനാണ് കമ്പനി ലക്ഷ്യമിടുന്നത്.