Stalin | 'പ്രധാനമന്ത്രി നരേന്ദ്ര മോദിയോട് എന്തിനാണ് ദേഷ്യം'; അമിത് ഷായോട് മുഖ്യമന്ത്രി സ്റ്റാലിന്‍

ചെന്നൈ: (www.kvartha.com) ഭാവിയില്‍ തമിഴ് നാട്ടില്‍ നിന്ന് പ്രധാനമന്ത്രിയുണ്ടാകുമെന്ന കേന്ദ്ര ആഭ്യന്തര മന്ത്രി അമിത് ഷായുടെ പരാമര്‍ശത്തെ പരിഹസിച്ച് തമിഴ്‌നാട് മുഖ്യമന്ത്രി എംകെ സ്റ്റാലിന്‍. 'ബിജെപി നേതാവിന് പ്രധാനമന്ത്രി നരേന്ദ്ര മോദിയോട് എന്തിനാണ് ദേഷ്യമെന്ന്' ആയിരുന്നു സ്റ്റാലിന്റെ ചോദ്യം.

സ്റ്റാലിന്റെ വാക്കുകള്‍:

അദ്ദേഹത്തിന്റെ നിര്‍ദേശം ഞാന്‍ സ്വാഗതം ചെയ്യുന്നു. പക്ഷേ മോദിയോടുള്ള അദ്ദേഹത്തിന്റെ ദേഷ്യം എന്താണെന്ന് എനിക്കറിയില്ല. തമിഴന്‍ പ്രധാനമന്ത്രിയാകണം എന്ന ആശയം ബിജെപിക്കുണ്ടെങ്കില്‍, തെലങ്കാന ഗവര്‍ണര്‍ തമിഴിസൈ സൗന്ദരരാജനും കേന്ദ്രമന്ത്രി എല്‍ മുരുകനും ഉണ്ട്. അവര്‍ക്കു പ്രധാനമന്ത്രിയാകാനുള്ള അവസരം ലഭിക്കുമെന്ന് ഞാന്‍ കരുതുന്നു- എന്നും സ്റ്റാലിന്‍ പറഞ്ഞു.

ഞായറാഴ്ച ബിജെപി ഭാരവാഹി യോഗത്തില്‍ ഭാവിയില്‍ തമിഴ്‌നാട്ടില്‍ നിന്നൊരു പ്രധാനമന്ത്രി വരുമെന്ന് അമിത് ഷാ പറഞ്ഞിരുന്നു. അത് ഉറപ്പാക്കാന്‍ കഠിനാധ്വാനം ചെയ്യണമെന്നും തമിഴ്നാട്ടിലെ പാര്‍ടി പ്രവര്‍ത്തകരോട് അമിത് ഷാ ആവശ്യപ്പെട്ടിരുന്നു. ഈ പരാമര്‍ശത്തോട് പ്രതികരിക്കുകയായിരുന്നു സ്റ്റാലിന്‍.

പാര്‍ടി പ്രവര്‍ത്തകരുമായി നടത്തിയ രഹസ്യ ചര്‍ചയില്‍ തമിഴ്‌നാട്ടില്‍ നിന്നുള്ള മുതിര്‍ന്ന നേതാക്കളായ കെ കാമരാജിനെയും ജികെ മൂപ്പനാറിനെയും പ്രധാനമന്ത്രിയാകുന്നതില്‍ നിന്ന് ഡിഎംകെ തടഞ്ഞുവെന്നും അമിത് ഷാ ആരോപിച്ചിരുന്നു. ഈ അവകാശവാദം നിരാകരിച്ച എംകെ സ്റ്റാലിന്‍ പ്രസ്താവന പരസ്യമാക്കാന്‍ അമിത് ഷായെ വെല്ലുവിളിക്കുകയും ചെയ്തു.

Keywords:  'Why Are You Angry With PM Modi?': Stalin's Jibe At Amit Shah, Chennai, News, Politics, Criticism, Prime Minister Post, Statement, BJP, Amit Shah, National.