ചൂടന്‍ ചര്‍ച്ചകള്‍ക്കുമുമ്പ് സെല്‍ഫിയെടുത്തും അതിഥിക്ക് ഇഷ്ടവിഭവമൊരുക്കിയും ആതിഥേയന്‍

പ്രധാനമന്ത്രി നേരിട്ടത്തെിയാണ് ന്യൂഡല്‍ഹിയിലെ വിമാനത്താവളത്തില്‍ നിന്ന് ഒബാമയെ സ്വീകരിച്ചത്. സ്വീകരണവേള ഹൃദ്യമാക്കാന്‍ രണ്ടുപേരും ആലിംഗനം ചെയ്യുകയും സെല്‍ഫികളെടുത്ത് ആ നിമിഷങ്ങള്‍ ഒന്നു കൂടി മനോഹരമാക്കുകയും ചെയ്തു

രാഷ്ട്രപതി ഭവനിലെ ചൂടേറിയ സ്വീകരണത്തിനു ശേഷം അതിനേക്കാള്‍ ചൂടേറിയ ഉഭയകക്ഷിചര്‍ച്ചകള്‍ക്ക് മുമ്പായി ഡല്‍ഹിയിലെ പ്രമുഖ ഹോട്ടലായ കരിം ഹോട്ടലിലാണ് ഒബാമയ്ക്കുവേണ്ടി ഉച്ചഭക്ഷണം തയ്യാറാക്കിയിരിക്കുന്നത്.

ചരിത്രത്തിലേക്കൊരു സന്ദര്‍ശനം. അതാണ് ഒബാമയുടെ ഇന്ത്യാ സന്ദര്‍ശനത്തെക്കുറിച്ച് പലരും വിശേഷിപ്പിച്ചിരിക്കുന്നത്. അതുകൊണ്ടുത്തന്നെ ഇന്ത്യയില്‍ ഒബാമയ്ക്കു ലഭിക്കുന്ന ഭക്ഷണവും മുന്‍പെങ്ങും അദ്ദേഹം കഴിച്ചിട്ടില്ലാത്തവിധം രുചികരമായിരിക്കണമെന്ന നിര്‍ബന്ധം ആതിഥേയര്‍ക്കുണ്ട്.

ഞായര്‍, തിങ്കള്‍ ദിവസങ്ങളില്‍ ഒബാമയ്ക്കുവേണ്ട മല്‍സ്യ മാംസാദികള്‍ ഒരുക്കാനാണ് ആതിഥേയരുടെ തീരുമാനം. എന്നാല്‍ സന്ദര്‍ശനത്തിന്റെ അവസാനദിവസമായ ചൊവ്വാഴ്ച വെജിറ്റേറിയന്‍ വിഭവങ്ങള്‍ മാത്രമായിരിക്കും ഒബാമയ്ക്കുവേണ്ടി തയ്യാറാക്കുക. പ്രധാനമന്ത്രിയുടെ ഓഫീസില്‍ നിന്ന് മാധ്യമഉപദേഷ്ടാവ് അറിയിച്ചു.