സോളി കെ ജോസഫ്

(KVARTHA) പാലക്കാട് കഞ്ചിക്കോട്ട് പുതിയതായി ആരംഭിക്കാൻ പോകുന്ന മദ്യനിർമ്മാണ യൂണിറ്റുമായി ബന്ധപ്പെട്ട് ഇപ്പോൾ സംസ്ഥാത്ത് വാദപ്രതിവാദങ്ങൾ കൊഴുക്കുന്ന കാഴ്ചയാണ് കാണുന്നത്. ജനകീയ സമരത്തെത്തുടർന്ന് കോളക്കമ്പനി പൂട്ടിയ പാലക്കാട് ജില്ലയിൽ പുതിയ മദ്യനിർമ്മാണ യൂണിറ്റ് വരുന്നതിനെതിരെ പ്രതിപക്ഷവും വിവിധ രാഷ്ട്രിയ കക്ഷികളും സാമുദായിക സംഘടനകളും ഒക്കെ രംഗത്ത് വന്നിട്ടുണ്ട്. 

എന്നാൽ സംസ്ഥാന സർക്കാർ ഇതുമായി മുന്നോട്ട് പോകാനുള്ള നീക്കമാണ് നടത്തുന്നതെന്നുള്ള കാര്യം വ്യക്തമാണ്. മദ്യക്കമ്പനിക്ക് ആവശ്യമായ വെള്ളം സർക്കാർ തന്നെ നൽകുമെന്നുള്ള റിപ്പോർട്ടുകളാണ് ഇപ്പോൾ പുറത്തുവന്നിരിക്കുന്നത്. ഈ അവസരത്തിൽ  ബ്രുവറിയെക്കുറിച്ചും ബ്രുവറിയിലെ പ്രധാന പ്രക്രിയകൾ എന്തൊക്കെയാണെന്നുമുള്ളതിനെക്കുറിച്ചുമുള്ള ഒരു വിവരണമാണ് ഇവിടെ നൽകുന്നത്. 

എന്താണ് ബ്രൂവിംഗ് കമ്പനി അല്ലെങ്കിൽ  ബ്രുവറി?

മദ്യം പ്രത്യേകിച്ച് ബിയർ നിർമ്മിക്കുന്ന ഒരു സ്ഥാപനമാണ് ബ്രുവറി (Brewery) അഥവാ ബ്രൂവിംഗ് കമ്പനി. ഇവിടെ മാള്‍ട്ട് ചെയ്ത ധാന്യങ്ങൾ, യീസ്റ്റ്, വെള്ളം എന്നിവ ചേർത്ത് പ്രത്യേക പ്രക്രിയകളിലൂടെ ബിയർ ഉത്പാദിപ്പിക്കുന്നു. ബ്രുവറി എന്ന പദം പലപ്പോഴും ബിയർ ഉത്പാദിപ്പിക്കുന്ന സ്ഥാപനത്തെ സൂചിപ്പിക്കുന്നുണ്ടെങ്കിലും, ചിലപ്പോൾ സൈഡർ, മീഡ് തുടങ്ങിയ മറ്റ് മദ്യപാനീയങ്ങൾ ഉത്പാദിപ്പിക്കുന്ന സ്ഥാപനങ്ങളെയും ഇങ്ങനെ വിളിക്കാറുണ്ട്. 

ബ്രുവറിയിലെ പ്രധാന പ്രക്രിയകൾ

ബ്രുവറിയിൽ ബിയർ ഉത്പാദനത്തിന് അഞ്ച് പ്രധാന ഘട്ടങ്ങളുണ്ട്. ആദ്യത്തേത് മാഷിംഗ് ആണ്. മാൾട്ട് ചെയ്ത ധാന്യങ്ങളെ ചൂടാക്കിയ വെള്ളത്തിൽ കലർത്തി പഞ്ചസാര ഉണ്ടാക്കുന്ന പ്രക്രിയയാണിത്. രണ്ടാമതായി, ലാറ്ററിംഗ് എന്ന പ്രക്രിയയിലൂടെ പഞ്ചസാരയുള്ള ദ്രാവകം (വോർട്ട്) മാഷിൽ നിന്ന് വേർതിരിക്കുന്നു. മൂന്നാമത്തെ ഘട്ടമായ ബോയിലിംഗിൽ, വേർതിരിച്ചെടുത്ത വോർട്ട് തിളപ്പിച്ച് അതിലെ അനാവശ്യ പദാർത്ഥങ്ങൾ നീക്കം ചെയ്യുന്നു. തുടർന്ന്, ഫെർമെന്റേഷൻ എന്ന നാലാമത്തെ ഘട്ടത്തിൽ, യീസ്റ്റ് ചേർത്ത് വോർട്ട് പുളിപ്പിച്ച് ആൽക്കഹോൾ ഉത്പാദിപ്പിക്കുന്നു. അവസാനമായി, കണ്ടീഷനിംഗ് എന്ന പ്രക്രിയയിലൂടെ ബിയറിന്റെ ഗുണമേന്മയും രുചിയും വർദ്ധിപ്പിക്കുന്നു.

വിവിധതരം ബ്രുവറികൾ

ഉത്പാദനത്തിന്റെ അളവനുസരിച്ച് ബ്രുവറികളെ പ്രധാനമായി മൂന്നായി തരം തിരിക്കാം. ചെറിയ തോതിൽ ബിയർ ഉത്പാദിപ്പിക്കുന്ന ബ്രുവറികളാണ് മൈക്രോബ്രുവറികൾ. നാനോബ്രുവറികൾ മൈക്രോബ്രുവറികളേക്കാൾ ചെറിയ യൂണിറ്റുകളാണ്. വൻതോതിൽ ബിയർ ഉത്പാദിപ്പിക്കുന്ന വലിയ ബ്രുവറികളാണ് മെഗാബ്രുവറികൾ.

ബിയറിന്റെ രുചി പ്രധാനമായും ഉപയോഗിക്കുന്ന ധാന്യങ്ങൾ, ഹോപ്സ്, യീസ്റ്റ്, വെള്ളം, ഫെർമെന്റേഷൻ പ്രക്രിയ എന്നിവയെ ആശ്രയിച്ചിരിക്കും. ചില പഠനങ്ങൾ സൂചിപ്പിക്കുന്നത് മിതമായ അളവിൽ ബിയർ കുടിക്കുന്നത് ആരോഗ്യത്തിന് നല്ലതാണെന്നാണ്. എന്നാൽ മദ്യപാനം ആരോഗ്യത്തിന് ഹാനികരമാണ് എന്നത് ഓർക്കേണ്ടതാണ്.

പാലക്കാട് ആരംഭിക്കാൻ പോകുന്ന മദ്യനിർമ്മാണ യൂണിറ്റുമായി ബന്ധപ്പെട്ട് വിവാദങ്ങൾ ശക്തമായി നിലനിൽക്കുമ്പോൾ, ബ്രുവറിയെക്കുറിച്ചും മദ്യനിർമ്മാണത്തെക്കുറിച്ചുമുള്ള ഈ അറിവ് നല്ലതാണ്. മദ്യം സമൂഹത്തിന് ഒരിക്കലും നന്മ വരുത്തുകയില്ലെന്നും മനസ്സിലാക്കുക.

#BrewingProcess #Brewery #BeerProduction #AlcoholIndustry #PalakkadNews #Brewing