ന്യൂഡൽഹി: (KVARTHA) ധനമന്ത്രി നിർമ്മല സീതാരാമന്റെ അധ്യക്ഷതയിൽ ജയ്സാൽമീറിൽ നടന്ന 55-ാമത് ജിഎസ്ടി കൗൺസിൽ യോഗം വിവിധ ഉത്പന്നങ്ങളുടെയും സേവനങ്ങളുടെയും വിലയിൽ മാറ്റങ്ങൾ വരുത്തി. ഏതൊക്കെ ഉത്പന്നങ്ങൾക്കാണ് വില കൂടുന്നതെന്നും കുറയുന്നതെന്നും ഏതൊക്കെ തീരുമാനങ്ങളാണ് മാറ്റിവെച്ചതെന്നും അറിയാം.

വിലകൂടുന്നവ 

പുതിയ ഇലക്ട്രിക് വാഹനങ്ങളുടെ വില്പന പ്രോത്സാഹിപ്പിക്കുന്നതിന്റെ ഭാഗമായി, ഉപയോഗിച്ച കാറുകളുടെ, ഇലക്ട്രിക് വാഹനങ്ങൾ ഉൾപ്പെടെ, ജിഎസ്ടി നിരക്ക് നിലവിലെ 12% ൽ നിന്ന് 18% ആയി ഉയർത്താൻ കൗൺസിൽ തീരുമാനിച്ചു. എന്നാൽ, വ്യക്തിഗത ആവശ്യത്തിന് ഉപയോഗിച്ച കാറുകൾ വില്ക്കുന്നതിന് ഈ ജിഎസ്ടി ബാധകമല്ല. 

കച്ചവട സ്ഥാപനങ്ങൾ വില്ക്കുന്ന സെക്കൻഡ് ഹാൻഡ് കാറുകൾക്കാണ് ഇത് ബാധകം. കാരമലൈസ്ഡ് പോപ്‌കോണിന് 18% ജിഎസ്ടി ഈടാക്കും. ഉപ്പും മസാലയും ചേർത്ത റെഡി-ടു-ഈറ്റ് പോപ്‌കോണിന് നിലവിൽ 5% ജിഎസ്ടി ഈടാക്കും. പാക്ക് ചെയ്ത പോപ്‌കോണിന് 12% ജിഎസ്ടി ഈടാക്കും.

വില കുറയുന്നവ 

ചില ഉത്പന്നങ്ങളുടെ ജിഎസ്ടി നിരക്ക് കുറച്ചിട്ടുണ്ട്. ജീൻ തെറാപ്പിക്ക് ജിഎസ്ടി പൂർണമായും ഒഴിവാക്കി. സർഫേസ്-ടു-എയർ മിസൈലുകളുടെ ഐജിഎസ്ടി ഒഴിവാക്കാനുള്ള തീരുമാനം നീട്ടി. പൊതുവിതരണത്തിനുള്ള ഫോർട്ടിഫൈഡ് അരിയുടെ ജിഎസ്ടി 18% ൽ നിന്ന് 5% ആയി കുറച്ചു. 50% ഫ്ലൈ ആഷുള്ള (ചാരം) എഎസി ബ്ലോക്കുകൾക്ക് 12% ജിഎസ്ടി നിരക്ക് ഉണ്ടാകും. കർഷകർ നേരിട്ട് വിതരണം ചെയ്യുന്ന കുരുമുളക്, ഉണക്കമുന്തിരി എന്നിവയ്ക്ക് ജിഎസ്ടി ഒഴിവാക്കിയിട്ടുണ്ട്. 

ലോൺ വ്യവസ്ഥകൾ പാലിക്കാത്തതിന് ബാങ്കുകളും എൻ‌ബി‌എഫ്‌സികളും ഉപഭോക്താക്കളിൽ നിന്ന് ഈടാക്കുന്ന പിഴയ്ക്ക് ജിഎസ്ടി ഈടാക്കില്ല. 2,000 രൂപയിൽ താഴെയുള്ള പേയ്‌മെന്റുകൾ കൈകാര്യം ചെയ്യുന്ന പേയ്‌മെന്റ് അഗ്രഗേറ്റർമാർക്ക് ജിഎസ്ടി ഇളവ് ലഭിക്കും. എന്നാൽ ഇത് പേയ്‌മെന്റ് ഗേറ്റ്‌വേകൾക്കോ ഫിൻ‌ടെക് കമ്പനികൾക്കോ ബാധകമല്ല. മെർച്ചന്റ് എക്സ്പോർട്ടേഴ്സിനുള്ള കോമ്പൻസേഷൻ സെസ്സ് 0.1% ആയി കുറച്ചു. ഇത് അത്തരം വിതരണങ്ങളുടെ ജിഎസ്ടി നിരക്കിന് തുല്യമാണ്. ചെറിയ കമ്പനികളുടെ രജിസ്ട്രേഷൻ എളുപ്പമാക്കുന്നതിനുള്ള ഭേദഗതികൾ ജിഎസ്ടി നിയമത്തിൽ വരുത്തും.

മാറ്റിവെച്ചവ 

ചില സുപ്രധാന തീരുമാനങ്ങൾ കൗൺസിൽ മാറ്റിവെച്ചു. പല സംസ്ഥാനങ്ങളും ഏവിയേഷൻ ടർബൈൻ ഫ്യൂവലിനെ ജിഎസ്ടി പരിധിയിൽ കൊണ്ടുവരുന്നതിനോട് യോജിക്കാത്തതിനാൽ തൽക്കാലം ഈ തീരുമാനം മാറ്റി വെച്ചു. ഫ്ലോർ സ്പേസ് ഇൻഡെക്സുമായി ബന്ധപ്പെട്ട നികുതിയെക്കുറിച്ചും തീരുമാനമായില്ല. പ്രകൃതിദുരന്തങ്ങൾക്ക് ശേഷം സംസ്ഥാനങ്ങൾക്ക് സാമ്പത്തിക ബുദ്ധിമുട്ടുകൾ തരണം ചെയ്യാൻ ജിഎസ്ടിക്ക് കീഴിൽ സെസ് ഈടാക്കാൻ അനുവദിക്കുന്നതിനെക്കുറിച്ച് പഠിക്കാൻ ഒരു മന്ത്രിതല ഉപസമിതിയെ നിയമിക്കാൻ തീരുമാനിച്ചു. 

ക്വിക്ക് കൊമേഴ്‌സ് സേവനങ്ങൾ, ഇ-കൊമേഴ്‌സ്, ഫുഡ് ഡെലിവറി പ്ലാറ്റ്‌ഫോമുകൾ എന്നിവയുടെ ജിഎസ്ടി തീരുമാനവും മാറ്റിവെച്ചു. ഇൻഷുറൻസ് പ്രീമിയത്തിന്റെ ജിഎസ്ടി നിരക്ക് കുറയ്ക്കുന്നതിനുള്ള തീരുമാനവും തൽക്കാലം മാറ്റി. 148 ഉത്പന്നങ്ങളുടെ നിരക്ക് പുനർനിർണയിക്കുന്ന റിപ്പോർട്ട് ഇതുവരെ പൂർത്തിയായിട്ടില്ലെന്നും അതിനാൽ കൂടുതൽ സമയം അനുവദിക്കുമെന്നും ധനമന്ത്രി അറിയിച്ചു.

 #GST #PriceChanges #ElectricVehicles #IndiaEconomy #Taxation #Finance