Dance Reel | മതവികാരം വ്രണപ്പെടുത്തിയെന്ന് പരാതി; സരയു നദിയില്‍ നൃത്തം ചെയ്ത് റീല്‍ ചിത്രീകരിച്ച യുവതിക്കെതിരെ കേസ്

ലക്‌നൗ: (KVARTHA) ഉത്തര്‍പ്രദേശിലെ സരയു നദിയിലിറങ്ങി നൃത്തം ചെയ്ത് റീല്‍ ചിത്രീകരിച്ച യുവതിക്കെതിരെ പൊലീസ് കേസെടുത്തു. പുണ്യ നദിയായ സരയുവിനെ അനാദരിച്ചുവെന്നും മതവികാരം വ്രണപ്പെടുത്തിയെന്നും തീര്‍ഥാടകര്‍ സമൂഹ മാധ്യമങ്ങളിലൂടെ വിമര്‍ശിച്ചിരുന്നു. ഇതിന് പിന്നാലെയാണ് അയോധ്യ പൊലീസ് കേസെടുത്തത്.

'ജീവന്‍ മേ ജാനേ ജാനാ' എന്ന ബോളിവുഡ് ഗാനത്തിനൊപ്പം ചുവട് വയ്ക്കുന്ന വീഡിയോയാണ് സമൂഹമാധ്യമങ്ങളില്‍ വ്യാപകമായി പ്രചരിച്ചത്. ഇതിന് പിന്നാലെ തീര്‍ഥാടകരും മതവിശ്വാസികളും യുവതിക്കെതിരെ രംഗത്തെത്തുകയായിരുന്നു.

ഇത് മതവികാരം വ്രണപ്പെടുത്തുന്ന പ്രവൃത്തിയാണെന്നും ആരാധനാലയങ്ങളില്‍ ഇത്തരം രീതികള്‍ അനുവദിക്കരുതെന്നും ഇവര്‍ ആവശ്യപ്പെട്ടു. തുടര്‍ന്ന് യുപി പൊലീസ് കേസെടുത്ത് അന്വേഷണം ആരംഭിക്കുകയായിരുന്നു.