വിയറ്റ്നാമിലെ ബോട്ട് അപകടം; മരിച്ചവരിൽ കൊട്ടാരക്കര സ്വദേശികളും, കൂടുതൽ വിവരങ്ങൾ പുറത്തുവിട്ട് എംബസി

ഫു ക്വോക്: (KVARTHA) വിയറ്റ്നാമിലുണ്ടായ ബോട്ട് അപകടത്തിൽ മരിച്ചവരിൽ രണ്ട് മലയാളികളും. കൊട്ടാരക്കര സ്വദേശികളായ വിക്ടറി വ്യവസായ ഗ്രൂപ്പ് ഉടമ എ വി തോമസ്, ഭാര്യ ലൗനി എന്നിവരാണ് മരിച്ചത്. ഇരുവരുടെയും മരണം കൊടിക്കുന്നിൽ സുരേഷ് എംപി സ്ഥിരീകരിച്ചിട്ടുണ്ട്. വിയറ്റ്നാമിലെ ഫു ക്വോക് ദ്വീപിന് സമീപത്തുവെച്ചാണ് ഇന്ത്യൻ വിനോദസഞ്ചാരികളുമായി പോയ സ്പീഡ് ബോട്ട് മറിഞ്ഞത്. 

15 ഇന്ത്യൻ വിനോദസഞ്ചാരികൾ മരിച്ചതായാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. 32 ഇന്ത്യൻ പൗരന്മാരും നാല് ജീവനക്കാരും അപകട സമയം ബോട്ടിലുണ്ടായിരുന്നു. അപകടത്തിൽപ്പെട്ട 21 പേരെ രക്ഷപ്പെടുത്തിയിട്ടുണ്ട്. രക്ഷപ്പെടുത്തിയവരിൽ രണ്ട് പേരുടെ നില ഗുരുതരമാണെന്നാണ് വിവരം.

അപകട കാരണം ശക്തമായ കാറ്റ്

ഫു ക്വോക്കിന് സമീപമുള്ള ജനപ്രിയ ദ്വീപ് സഞ്ചാര കേന്ദ്രമായ ഹോൻ മേ റട്ട് ന്ഗോയ് ദ്വീപിന് സമീപം, തീരത്തുനിന്ന് ഏകദേശം 400 മീറ്റർ അകലെയാണ് ബോട്ട് അപകടത്തിൽപ്പെട്ടത്. ശക്തമായ തിരമാലകളും കാറ്റുമാണ് അപകടത്തിന് കാരണമായതെന്നാണ് വിയറ്റ്നാം അധികൃതരുടെ പ്രാഥമിക വിലയിരുത്തൽ. എന്നാൽ, അപകടമുണ്ടാകാനുള്ള കൃത്യമായ കാരണം അധികൃതർ അന്വേഷിച്ചുവരികയാണ്.

As per information received from official sources, the following 32 Indian tourists were onboard the boat which capsized near Phu Quoc Island in Vietnam a few hours ago.

We are ascertaining further details of casualties and would update soon.@cghcm pic.twitter.com/geddttdpWB

— India in Vietnam (@AmbHanoi) July 11, 2026

അടിയന്തര ഇടപെടലുമായി എംബസി

അപകടത്തെ തുടർന്ന് വിയറ്റ്നാമിലെ ഇന്ത്യൻ നയതന്ത്ര മിഷനുകൾ അടിയന്തര നടപടികൾ ആരംഭിച്ചു. ഇന്ത്യക്കാരുടെ മരണത്തിൽ പ്രധാനമന്ത്രി നരേന്ദ്ര മോദി അനുശോചനം രേഖപ്പെടുത്തി. വിയറ്റ്നാം അധികൃതരുമായി ഉദ്യോഗസ്ഥർ നിരന്തരം ബന്ധപ്പെടുന്നുണ്ടെന്ന് അദ്ദേഹം അറിയിച്ചു. മരിച്ചവരിൽ ഏറെയും ദക്ഷിണേന്ത്യക്കാരാണെന്നാണ് സൂചന. 

ആന്ധ്രപ്രദേശിൽ നിന്നുള്ള രണ്ട് പേർ മരിച്ചതായും മൂന്ന് പേർ ആശുപത്രിയിൽ ചികിത്സയിലാണെന്നും സംസ്ഥാന സർക്കാർ വൃത്തങ്ങളെ ഉദ്ധരിച്ച് പിടിഐ റിപ്പോർട്ട് ചെയ്തു. ബോട്ടിലുണ്ടായിരുന്ന 32 ഇന്ത്യൻ വിനോദസഞ്ചാരികളുടെ പേരുകൾ ഹനോയിയിലെ ഇന്ത്യൻ എംബസി പുറത്തുവിട്ടു.

പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: 15 Indian tourists, including two Malayalis, died when a speed boat capsized near Phu Quoc island in Vietnam. The deceased Malayalis have been identified as A V Thomas and his wife Louni from Kottarakkara.

#VietnamBoatAccident #PhuQuoc #MalayaliCasualties #IndianTourists #VietnamNews #AccidentNews #AmmuNews