വന്ദേമാതരം ചർച്ച പാർലമെന്റിൽ: നെഹ്റു ലീഗിന് വഴങ്ങിയെന്ന് മോദി; ശ്രദ്ധ തിരിക്കാനുള്ള നാടകമെന്ന് പ്രിയങ്ക

ന്യൂഡൽഹി: (KVARTHA) ദേശീയഗീതമായ വന്ദേമാതരത്തിൻ്റെ 150-ാം വാർഷികത്തോടനുബന്ധിച്ച് ലോക്സഭയിൽ നടന്ന ചർച്ചയിൽ കോൺഗ്രസിനെതിരെ രൂക്ഷവിമർശനവുമായി പ്രധാനമന്ത്രി നരേന്ദ്ര മോദി. വന്ദേമാതരത്തെ തകർക്കാൻ ശ്രമം നടന്നുവെന്നും വലിയ നീതികേട് കാട്ടിയെന്നും മോദി ആരോപിച്ചു. വന്ദേമാതരത്തെ ഗാന്ധിജി ദേശീയ ഗീതമായി കണ്ടപ്പോൾ മുൻ പ്രധാനമന്ത്രി ജവഹർലാൽ നെഹ്റുവിൻ്റെ സമീപനം മറ്റൊന്നായിരുന്നു. മുസ്ലീം ലീഗിൻ്റെ സമ്മർദ്ദത്തിന് വഴങ്ങി നെഹ്റു വന്ദേമാതരത്തെ വെട്ടിമുറിച്ചു, പിന്നാലെ ഇന്ത്യയേയും വെട്ടിമുറിച്ചു എന്നതായിരുന്നു പ്രധാനമന്ത്രിയുടെ പ്രധാന ആരോപണം.

നെഹ്റുവിനെതിരെ മോദിയുടെ ആരോപണങ്ങൾ

വന്ദേമാതരത്തെ രാഷ്ട്രീയമായി എതിർക്കുകയെന്നത് മുഹമ്മദ് അലി ജിന്നയുടെ ലീഗിൻ്റെ അജണ്ടയായിരുന്നുവെന്ന് മോദി പറഞ്ഞു. നെഹ്റു ആ സമ്മർദ്ദത്തിൽ വീണുപോയി. ജിന്നയെ എതിർക്കുന്നതിന് പകരം വന്ദേമാതരത്തിൻ്റെ പശ്ചാത്തലം പഠിക്കാനാണ് നെഹ്റു ശ്രമിച്ചത്. നെഹ്‌റു ജിന്നയെ എതിർക്കണമായിരുന്നു. പകരം പ്രീണനത്തിനായി വന്ദേമാതരത്തെ വെട്ടിമുറിച്ചുവെന്നും, അതിനുശേഷമാണ് ഇന്ത്യയെ വെട്ടിമുറിച്ചതെന്നും പ്രധാനമന്ത്രി ആരോപിച്ചു. വന്ദേമാതരത്തെ ഗാന്ധിജി ദേശീയ ഗീതമായി കണ്ടിട്ടും നെഹ്റു അതിനെ എതിർക്കുന്ന സമീപനമാണ് സ്വീകരിച്ചത്. കോൺഗ്രസ് വന്ദേമാതരത്തെ അപമാനിച്ചു. കോൺഗ്രസ് ഇപ്പോഴും വന്ദേമാതരത്തെ വെറുക്കുന്നുവെന്നും മോദി പറഞ്ഞു.

വന്ദേമാതരത്തിൻ്റെ 100-ാം വാർഷികം ആഘോഷിച്ചപ്പോൾ രാജ്യം അടിയന്തരാവസ്ഥയിൽ കുരുങ്ങിക്കിടക്കുകയായിരുന്നുവെന്നും രാജ്യത്തെ ഭരണഘടന അടിച്ചമർത്തപ്പെടുകയായിരുന്നുവെന്നും പ്രധാനമന്ത്രി വിമർശിച്ചു. 1947-ൽ സ്വാതന്ത്ര്യം നേടിത്തന്ന ആ ഗാനത്തിൻ്റെ പ്രതാപം വീണ്ടെടുക്കാനായുള്ള നല്ല അവസരമാണ് വന്ദേമാതരത്തിൻ്റെ 150-ാം വാർഷികമെന്നും മോദി കൂട്ടിച്ചേർത്തു.

ചരിത്രത്തെ വളച്ചൊടിക്കലെന്ന് കോൺഗ്രസ്

പ്രധാനമന്ത്രിയുടെ ആരോപണങ്ങൾക്കെതിരെ കോൺഗ്രസ് നേതാക്കൾ രൂക്ഷമായ മറുപടിയാണ് നൽകിയത്. വന്ദേ മാതരം ചർച്ച ചെയ്യുന്നതിൻ്റെ യഥാർത്ഥ ആവശ്യകതയെ കോൺഗ്രസ് നേതാവ് പ്രിയങ്കാ ഗാന്ധി പ്രിയങ്ക ചോദ്യം ചെയ്തു. ഈ ചർച്ചയ്ക്ക് പിന്നിൽ കേന്ദ്ര സർക്കാരിന് രണ്ട് പ്രധാന ലക്ഷ്യങ്ങളാണുള്ളതെന്ന് അവർ ആരോപിച്ചു. ഒന്ന്, വരാനിരിക്കുന്ന പശ്ചിമ ബംഗാൾ തിരഞ്ഞെടുപ്പ് ലക്ഷ്യമിട്ട് പ്രധാനമന്ത്രി തൻ്റെ രാഷ്ട്രീയ റോൾ ഉറപ്പിക്കാൻ ശ്രമിക്കുന്നു. രണ്ട്, രാജ്യത്തെ ജനങ്ങൾ നേരിടുന്ന വിലക്കയറ്റം, തൊഴിലില്ലായ്മ, ചോദ്യപേപ്പർ ചോർച്ച, മന്ത്രിമാർക്കെതിരായ ആരോപണങ്ങൾ തുടങ്ങിയ യഥാർത്ഥ പ്രശ്‌നങ്ങളിൽ നിന്ന് ശ്രദ്ധ തിരിക്കാനാണ് സർക്കാർ ആഗ്രഹിക്കുന്നത്. നിങ്ങൾ തിരഞ്ഞെടുപ്പുകൾക്കായും ഞങ്ങൾ രാജ്യത്തിനായുമാണ് നിലകൊള്ളുന്നത് എന്നും പ്രിയങ്ക പ്രസ്താവിച്ചു.

വന്ദേമാതരത്തിലെ പ്രധാന വരികൾ ഒഴിവാക്കിയത് മുസ്ലീം ലീഗിൻ്റെ സമ്മർദ്ദത്തിനു വഴങ്ങി നെഹ്റു എടുത്ത തീരുമാനമാണ് എന്ന മോദിയുടെ ആരോപണത്തെ പ്രിയങ്ക തള്ളിക്കളഞ്ഞു. ഇത് വർഗീയവാദികൾ പിന്നീട് നിർമിച്ച നുണയാണെന്നും അവർ മറുപടി നൽകി. നെഹ്റു സുഭാഷ് ചന്ദ്രബോസിന് എഴുതിയ കത്ത് ചൂണ്ടിക്കാട്ടിയായിരുന്നു പ്രിയങ്കയുടെ പ്രതികരണം. കൂടാതെ, നെഹ്റുവിൻ്റെ രാജ്യത്തോടുള്ള സംഭാവനകളെ പ്രിയങ്ക ഉയർത്തിക്കാട്ടി. 

നെഹ്റു ജീവിച്ചത് ഈ രാജ്യത്തിന് വേണ്ടിയാണ്. മോദി പ്രധാനമന്ത്രിയായത്രയും വർഷത്തോളം നെഹ്റു സ്വാതന്ത്ര്യത്തിനുവേണ്ടി ജയിലിൽ കിടന്നിട്ടുണ്ട് എന്നും, അതിനുശേഷം 17 വർഷം പ്രധാനമന്ത്രിയായി രാജ്യത്തെ സേവിച്ചെന്നും പ്രിയങ്ക പറഞ്ഞു. അദ്ദേഹം സ്ഥാപിച്ച ഐ എസ് ആർ ഒ, ഡി ആർ ഡി ഒ, ഐ ഐ ടി, എ ഐ ഐ എം തുടങ്ങിയ സ്ഥാപനങ്ങളാണ് ഇന്ത്യയുടെ വളർച്ചയ്ക്ക് അടിസ്ഥാനമായതെന്നും കൊവിഡിനെ മറികടക്കാൻ വരെ സഹായിച്ചതെന്നും പ്രിയങ്ക ചൂണ്ടിക്കാട്ടി. തങ്ങൾ രാജ്യത്തിനു വേണ്ടിയാണ് നിലകൊള്ളുന്നതെന്നും എത്ര തിരഞ്ഞെടുപ്പുകൾ തോറ്റുവെന്നത് കാര്യമാക്കുന്നില്ലെന്നും പ്രിയങ്ക വ്യക്തമാക്കി.

വന്ദേമാതരം 150 വർഷമായി ഇന്ത്യക്കാരുടെ മനസ്സിൽ ജീവിക്കുന്നു എന്ന് പ്രിയങ്ക പറഞ്ഞു. 1905 മുതൽ കോൺഗ്രസിൻ്റെ എല്ലാ സമ്മേളനങ്ങളിലും വന്ദേമാതരം ആലപിച്ചിട്ടുണ്ട്. രവീന്ദ്രനാഥ ടാഗോർ ഈ ഗാനം ആദ്യമായി പാടിയത് ഹിന്ദു മഹാസഭയുടെ പരിപാടിയിലല്ല, കോൺഗ്രസ് പരിപാടിയിലാണെന്നും പ്രിയങ്ക ചൂണ്ടിക്കാട്ടി. അടിസ്ഥാനമില്ലാത്ത ആരോപണങ്ങളിലൂടെ ഭരണഘടനാ ശില്പികളെ അപമാനിക്കരുതെന്നും, ആദ്യം തൊഴിലില്ലായ്മയും വിലക്കയറ്റവും പോലുള്ള ജനകീയ പ്രശ്നങ്ങൾ ചർച്ച ചെയ്യാനുള്ള ധൈര്യം സർക്കാർ കാണിക്കണമെന്നും പ്രിയങ്ക ആവശ്യപ്പെട്ടു.

പ്രധാനമന്ത്രി നടത്തുന്നത് ചരിത്രത്തെ വളച്ചൊടിക്കലാണെന്ന് കെ സി വേണുഗോപാൽ തിരിച്ചടിച്ചു. വന്ദേമാതരത്തോടുള്ള മോദിയുടെ സ്നേഹം ഇപ്പോഴെങ്ങനെ വന്നുവെന്നും അദ്ദേഹം ചോദിച്ചു. വന്ദേ മാതരം ചർച്ചക്ക് ഗൂഢരാഷ്‌ട്രീയ ലക്ഷ്യമുണ്ട്. നെഹ്‌റുവിനെ അപമാനിക്കുയെന്ന മോദിയുടെ സ്ഥിരം അജണ്ടയാണ് ഇതിന് പിന്നിലെന്നും കെ സി വേണുഗോപാൽ പറഞ്ഞു.

രാഹുൽ ഗാന്ധിയുടെ അഭാവം

പ്രധാനമന്ത്രി നരേന്ദ്ര മോദി വന്ദേമാതരത്തെക്കുറിച്ച് പ്രസംഗിക്കുന്നതിനിടെ ലോക്‌സഭയിൽ നിന്ന് വിട്ടുനിന്ന പ്രതിപക്ഷ നേതാവ് രാഹുൽ ഗാന്ധിയെ ബിജെപി വിമർശിച്ചു. രാഹുൽ ഗാന്ധിയുടെ അഭാവത്തെ "ദേശീയ നാണക്കേട്" എന്നാണ് വാർത്താ വിതരണ പ്രക്ഷേപണ മന്ത്രാലയ ഉപദേഷ്ടാവ് കാഞ്ചൻ ഗുപ്ത വിശേഷിപ്പിച്ചത്. രാഹുൽ ഗാന്ധി ഉത്തരവാദിത്തത്തിൽ നിന്ന് ഒഴിഞ്ഞുമാറുകയാണെന്നും അദ്ദേഹം ആരോപിച്ചു. വന്ദേമാതരത്തോടുള്ള കോൺഗ്രസ് പാർട്ടിയുടെ വഞ്ചന പ്രധാനമന്ത്രി മോദി തുറന്നുകാട്ടിയെന്ന് ബിജെപി എംപി സംബിത് പത്ര പറഞ്ഞു. കോൺഗ്രസിൻ്റെ ചരിത്രപരമായ നിലപാടിൽ വേരൂന്നിയ കുറ്റബോധം മൂലമാണ് രാഹുൽ ഗാന്ധി വിട്ടുനിന്നതെന്നും പത്ര അവകാശപ്പെട്ടു.

ചർച്ചയുടെ പശ്ചാത്തലം

1875 നവംബറിൽ ബങ്കിം ചന്ദ്ര ചാറ്റർജി എഴുതിയ വന്ദേമാതരം എന്ന കവിത സ്വാതന്ത്ര്യസമര സേനാനികൾക്ക് പ്രചോദനമായ ഗാനമായി മാറിയിരുന്നു. ഇതിൽ ഹിന്ദു ദേവതമാരായ ദുർഗ്ഗ, കമല (ലക്ഷ്മി), സരസ്വതി എന്നിവരെ പരാമർശിക്കുന്ന ആറ് ശ്ലോകങ്ങളാണുള്ളത്. 1937-ൽ മുൻ പ്രധാനമന്ത്രി ജവഹർലാൽ നെഹ്റു നയിച്ച കോൺഗ്രസ്, ദേശീയ സമ്മേളനങ്ങളിൽ ആദ്യ രണ്ട് ശ്ലോകങ്ങൾ മാത്രം ഉപയോഗിക്കാൻ തീരുമാനിച്ചുവെന്നാണ് ബിജെപിയുടെ ആരോപണം. ഹിന്ദു ദേവതകളെക്കുറിച്ചുള്ള പരാമർശങ്ങൾ മുസ്ലീം സമൂഹത്തിലെ ചിലർക്ക് സ്വീകാര്യമല്ലാത്തതിനാലാണ് ശ്ലോകങ്ങൾ ഒഴിവാക്കിയതെന്നാണ് ബിജെപി കുറ്റപ്പെടുത്തുന്നത്.

വന്ദേമാതരം ചർച്ചയിലെ രാഷ്ട്രീയ ഏറ്റുമുട്ടലിനെക്കുറിച്ച് നിങ്ങളുടെ അഭിപ്രായം എന്താണ്?

Article Summary: Vande Mataram debate in Parliament; Modi attacks Nehru, Priyanka alleges misdirection.

#VandeMataram #ModiVsCongress #LokSabhaDebate #Nehru #PriyankaGandhi #IndianPolitics