വാഷിംഗ്ടൺ: (KVARTHA) ഇന്ത്യ ഉൾപ്പെടെ നിരവധി രാജ്യങ്ങൾക്കുള്ള ദശലക്ഷക്കണക്കിന് ഡോളർ ധനസഹായം അമേരിക്ക റദ്ദാക്കി. ഇലോൺ മസ്‌കിൻ്റെ നേതൃത്വത്തിലുള്ള ഗവൺമെൻ്റ് എഫിഷ്യൻസി ഡിപ്പാർട്ട്‌മെൻ്റാണ് (ഡിഒജിഇ) ഞായറാഴ്ച ഇത് സംബന്ധിച്ച പ്രഖ്യാപനം നടത്തിയത്. ഇന്ത്യയിൽ വോട്ട് ചെയ്യുന്നവരുടെ എണ്ണം വർധിപ്പിക്കുന്നതിനായി രൂപകൽപ്പന ചെയ്ത 21 മില്യൺ ഡോളറിൻ്റെ പദ്ധതിയും ബംഗ്ലാദേശിൻ്റെ രാഷ്ട്രീയ പശ്ചാത്തലം ശക്തിപ്പെടുത്താൻ ലക്ഷ്യമിട്ടുള്ള 29 മില്യൺ ഡോളറിൻ്റെ സംരംഭവും റദ്ദാക്കിയ പദ്ധതികളിൽപ്പെടുന്നു.  അന്താരാഷ്‌ട്ര സഹായങ്ങൾ വെട്ടിക്കുറക്കുന്നതിൻ്റെ ഭാഗമായാണ് തീരുമാനം.

അമേരിക്കൻ നികുതിദായകരുടെ പണം വിദേശ തിരഞ്ഞെടുപ്പ് പ്രക്രിയയിൽ ഉപയോഗിക്കുന്നതിനെക്കുറിച്ചുള്ള സംവാദത്തിന് ഈ നീക്കം തിരികൊളുത്തിയിരിക്കുകയാണ്. കൂടാതെ എച്ച്ഐവി പകരുന്നത് കുറയ്ക്കുന്നതിന് ലക്ഷ്യമിട്ടുള്ള മൊസാമ്പിക്കിലെ പുരുഷന്മാരുടെ ചേലാകർമത്തിനുള്ള 10 ദശലക്ഷം ഡോളർ, കംബോഡിയയിലെ യുവജനങ്ങളെ സംരംഭകത്വ നൈപുണ്യത്തോടെ വളർത്തുന്നതിനായുള്ള യുസി ബെർക്ക്‌ലിയിലെ 9.7 ദശലക്ഷം ഡോളർ എന്നിവയും റദ്ദാക്കിയിട്ടുണ്ട്.

കംബോഡിയയിലെ സ്വതന്ത്ര ശബ്ദങ്ങളെ ശക്തിപ്പെടുത്തുന്നതിനുള്ള 2.3 ദശലക്ഷം ഡോളർ, പ്രാഗ് സിവിൽ സൊസൈറ്റി സെൻ്ററിലേക്കുള്ള 32 ദശലക്ഷം ഡോളർ, ലിംഗസമത്വത്തിനും വനിതാ ശാക്തീകരണത്തിനുമുള്ള 40 ദശലക്ഷം ഡോളർ, സെർബിയയിലെ പൊതുവിപണി മെച്ചപ്പെടുത്തുന്നതിനുള്ള 14 ദശലക്ഷം ഡോളർ, മൊൾഡോവയിലെ 22 ദശലക്ഷം ഡോളർ ഉൾപ്പെടെ തിരഞ്ഞെടുപ്പുകൾക്കും രാഷ്ട്രീയ പ്രക്രിയ ശക്തിപ്പെടുത്തുന്നതിനുമുള്ള കൺസോർഷ്യത്തിനായുള്ള 486 ദശലക്ഷം ഡോളർ എന്നിവയും വെട്ടിച്ചുരുക്കിയവയിൽ ഉൾപ്പെടുന്നു.

ഡൊണാൾഡ് ട്രംപും ഇന്ത്യൻ പ്രധാനമന്ത്രി നരേന്ദ്ര മോദിയും തമ്മിൽ വൈറ്റ്ഹൗസിൽ നടന്ന കൂടിക്കാഴ്ചയ്ക്ക് പിന്നാലെ ഇന്ത്യ-അമേരിക്ക വ്യാപാര ബന്ധം ശക്തിപ്പെടുത്തുന്നതിനുള്ള സുപ്രധാന പ്രഖ്യാപനങ്ങൾ നടത്തിയിരുന്നു. ഇതിന് പിന്നാലെയാണ് സഹായം വെട്ടിക്കുറയ്ക്കാനുള്ള ഡിഒജിഇയുടെ പ്രഖ്യാപനം വന്നിരിക്കുന്നത്. ഈ വെട്ടിച്ചുരുത്തൽ ഇന്ത്യ-അമേരിക്ക ബന്ധത്തിൽ പുതിയ വഴിത്തിരിവിന് കാരണമാകുമോ എന്ന് ഉറ്റുനോക്കുകയാണ് രാഷ്ട്രീയ നിരീക്ഷകർ.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

The U.S. has canceled foreign aid, including $21 million to India for increasing voter participation and $29 million for Bangladesh’s political empowerment.

#IndiaUSRelations #ForeignAidCuts #USNews #PoliticalFunding #InternationalRelations #ElectionAid