Weight Loss | ഒന്നും ചെയ്യാതെ അവിചാരിതമായി ശരീരഭാരം കുറയുന്നുണ്ടോ? ശ്രദ്ധിക്കണം, ഡോക്ടറെ കാണാനുള്ള മുന്നറിയിപ്പാണ്, കാരണമുണ്ട്!

ഒരു വശത്ത് ആളുകൾ കഠിനാധ്വാനം കൊണ്ട് ശരീരഭാരം കുറയ്ക്കുമ്പോൾ, മറുവശത്ത്, ചില ആളുകളിൽ ഒന്നും ചെയ്യാതെ വേഗത്തിൽ ശരീരഭാരം കുറയുന്നു. എന്നാൽ ഇത് സന്തോഷിക്കാൻ വകയുള്ളതല്ല, കാരണം വേഗത്തിലുള്ള ഭാരം കുറയുന്നത് അപകടകരമായ രോഗങ്ങളെ സൂചിപ്പിക്കുന്നു. ശരീരഭാരം കുറയ്ക്കുന്നത് അപകടകരമാകുന്നത് എന്തുകൊണ്ടാണെന്ന് വെളിപ്പെടുത്തിയിരിക്കുകയാണ് പുതിയൊരു പഠനം.

ഉദ്ദേശിക്കാത്ത ശരീരഭാരം കുറയ്ക്കുന്നത് അടുത്ത വർഷത്തിൽ കാൻസർ കണ്ടെത്താനുള്ള സാധ്യത വർധിപ്പിക്കുന്നുവെന്ന് ഡാന-ഫാർബർ കാൻസർ ഇൻസ്റ്റിറ്റ്യൂട്ട് പഠനം വ്യക്തമാക്കി. കാൻസർ കാരണം പെട്ടെന്ന് ശരീരഭാരം കുറയുന്നു എന്ന് നേരത്തെ തന്നെ ആരോഗ്യ വിദഗ്ധർ ചൂണ്ടിക്കാണിച്ചിരുന്നു. കരൾ അർബുദം, പാൻക്രിയാസ് കാൻസർ, വയറ്റിലെ അർബുദം അല്ലെങ്കിൽ അണ്ഡാശയ അർബുദം എന്നിവയിൽ രോഗിയുടെ ശരീരഭാരം അതിവേഗം കുറയാൻ തുടങ്ങുന്നു. ഇതുമൂലം രോഗിയുടെ ശരീരത്തിൻ്റെ പ്രതിരോധശേഷിയും ദുർബലമാകുന്നു.
   
അവിചാരിതമായി ശരീരഭാരം കുറയ്ക്കുന്നത് ഡോക്ടറെ കാണാനുള്ള മുന്നറിയിപ്പാണ് എന്നാണ് പുതിയ പഠനം സൂചിപ്പിക്കുന്നത്. 'നിങ്ങളുടെ വ്യായാമ മുറയിലോ ഭക്ഷണക്രമത്തിലോ മാറ്റങ്ങൾ വരുത്തി ശരീരഭാരം കുറയ്ക്കാൻ ശ്രമിക്കാതെ തന്നെ ശരീരഭാരം കുറയുന്നുണ്ടെങ്കിൽ കാരണങ്ങൾ കണ്ടെത്താൻ ഡോക്ടറെ കാണണം', പഠനത്തിന്റെ മേധാവി ബ്രയാൻ വോൾപിൻ പറഞ്ഞു. അപ്രതീക്ഷിതമായ ഭാരം കുറയുന്നത് കാൻസർ കൊണ്ടോ മറ്റ് പല അവസ്ഥകൾ കൊണ്ടോ ആവാമെന്ന് വോൾപിൻ വ്യക്തമാക്കി. അമേരിക്കൻ മെഡിക്കൽ അസോസിയേഷൻ്റെ ജേണലിലാണ് കണ്ടെത്തലുകൾ പ്രസിദ്ധീകരിച്ചത്.