ബെംഗളൂരു: (KVARTHA) ബാങ്കിംഗ് പിഴവിലൂടെ ഒരു പെൺകുട്ടിയുടെ ജീവിതത്തിൽ അത്ഭുതകരമായ വഴിത്തിരിവുണ്ടായ കഥ സോഷ്യൽ മീഡിയയിൽ വൈറലാകുന്നു. ബെംഗളൂരു ആസ്ഥാനമായ സംരംഭകനും കായികതാരവുമായ ചിന്മയ് ഹെഗ്ഡെയാണ് ഈ ഹൃദയസ്പർശിയായ അനുഭവം പങ്കുവെച്ചത്.

ഏകദേശം രണ്ടു വർഷം മുൻപ് ചിന്മയ് ഹെഗ്ഡെയുടെ അക്കൗണ്ടിലേക്ക് അപ്രതീക്ഷിതമായി 50,000 രൂപ എത്തി. എവിടെ നിന്ന്, എന്തിനാണ് ഇത്ര വലിയ തുക വന്നതെന്ന് അറിയാതെ അമ്പരന്ന അദ്ദേഹം ഉടൻ ബാങ്കിൽ അന്വേഷിച്ചു. സൗദി അറേബ്യയിലെ റിസ്വാൻ എന്ന വ്യക്തിയുടെ അക്കൗണ്ടിൽ നിന്നാണ് പണം വന്നതെന്ന് അറിഞ്ഞപ്പോൾ ചിന്മയ് ഞെട്ടി.

തൻ്റെ എക്സ് പോസ്റ്റിൽ ചിന്മയ് കുറിച്ചത് ഇങ്ങനെ : അക്കൗണ്ട് നമ്പറിലെ ചെറിയ തെറ്റ് കാരണം പണം എൻ്റെ അക്കൗണ്ടിലെത്തി. ഞാൻ ഉടൻ അദ്ദേഹത്തെ വിളിച്ചു. അങ്ങേത്തലയ്ക്കൽ നിന്ന് കരച്ചിലായിരുന്നു മറുപടി. ദയവായി, ഇത് എൻ്റെ കുടുംബത്തിനുള്ളതാണ്. ഞാൻ നിങ്ങളോട് അപേക്ഷിക്കുന്നു, അത് അവർക്ക് തിരികെ നൽകണമെന്ന് അദ്ദേഹം കേണപേക്ഷിച്ചു. ഞാൻ അദ്ദേഹത്തിന് തിരിച്ചുനൽകുമെന്ന് ഉറപ്പ് നൽകി.

പണം ഉടമസ്ഥന് തന്നെ ലഭിക്കണം എന്ന ഉറച്ച തീരുമാനത്തിൽ ചിന്മയ് റിസ്വാൻ്റെ കുടുംബത്തെ നേരിട്ട് പോയി കണ്ടു. അവിടെ കണ്ട കാഴ്ച അദ്ദേഹത്തെ വല്ലാതെ ഉലച്ചു. അവരുടെ വീട് വളരെ ദയനീയമായ അവസ്ഥയിലായിരുന്നു - എപ്പോൾ വേണമെങ്കിലും നിലംപൊത്താവുന്ന സ്ഥിതി. വീൽചെയറിൽ ഇരിക്കുന്ന റിസ്വാൻ്റെ പിതാവ് തൻ്റെ ദുരിത കഥ പറഞ്ഞു. അദ്ദേഹം മുൻപ് നിർമ്മാണ തൊഴിലാളിയായിരുന്നുവെന്നും മൂന്നാം നിലയിൽ നിന്ന് വീണ് കാലുകൾ തളർന്നുപോയെന്നും അദ്ദേഹം ദുഃഖത്തോടെ പറഞ്ഞു. ചിന്മയ് തൻ്റെ പോസ്റ്റിൽ കുറിച്ചു.

Two years ago, I received ₹50,000 from an international account. I wasn’t expecting any money, so I went to the bank to check. It turned out the transfer was from a man named Rizwan, working in Saudi. Due to a small error in the account number, the money had landed in my…

— Chinmay Hegde (@Chinmay16206171) May 2, 2025

റിസ്വാൻ 92% മാർക്കോടെ ബി.കോം പൂർത്തിയാക്കിയ ശേഷം കുടുംബം പോറ്റാൻ വിദേശത്തേക്ക് പോയതായിരുന്നു. അദ്ദേഹത്തിൻ്റെ ഇളയ സഹോദരിക്ക് സാമ്പത്തിക ബുദ്ധിമുട്ടുകൾ കാരണം നല്ലൊരു സ്വകാര്യ സ്കൂളിൽ നിന്ന് സർക്കാർ സ്കൂളിലേക്ക് മാറേണ്ടി വന്നു.

കുടുംബത്തിൻ്റെ ഈ ദുരവസ്ഥ ചിന്മയ് തൻ്റെ പിതാവിനോട് പറഞ്ഞപ്പോൾ അത് അദ്ദേഹത്തിൻ്റെ മനസ്സിനെ സ്പർശിച്ചു. അടുത്ത ദിവസം തന്നെ എൻ്റെ അച്ഛൻ എന്നോട് പറഞ്ഞു, നമുക്ക് അവിടെ പോകാം. ഞങ്ങൾ വീണ്ടും അവരെ പോയി കണ്ടു. എൻ്റെ അച്ഛൻ അവരോട് പറഞ്ഞു, നിങ്ങളുടെ മകളുടെ മുഴുവൻ വിദ്യാഭ്യാസ ചിലവും ഞങ്ങൾ ഏറ്റെടുക്കാം. അവൾക്ക് എവിടെ പഠിക്കാനാണ് ആഗ്രഹമവിടെ പഠിക്കട്ടെ. എൻ്റെ അച്ഛൻ ആ വർഷത്തെ ഫീസ് അടച്ചു, എല്ലാ മാസവും അവരെ വിളിച്ചന്വേഷിക്കാൻ എന്നോട് ആവശ്യപ്പെട്ടു എന്ന് ചിന്മയ് എഴുതി.

കഴിഞ്ഞ വെള്ളിയാഴ്ച കർണാടക സ്കൂൾ എക്സാമിനേഷൻ ആൻഡ് അസ്സസ്മെൻ്റ് ബോർഡ് പത്താം ക്ലാസ് പരീക്ഷാ ഫലം പുറത്തിറക്കിയപ്പോൾ റിസ്വാൻ്റെ സഹോദരി 97% മാർക്കോടെ 625 ൽ 606 മാർക്ക് നേടി ഉന്നത വിജയം കരസ്ഥമാക്കി.

വിജയവാർത്ത അറിഞ്ഞ ഉടൻതന്നെ അവൾ ചിന്മയിയെ വിളിച്ചു പറഞ്ഞു: എൻ്റെ സ്വന്തം സഹോദരനെ പോലും വിളിക്കുന്നതിന് മുൻപ് ഞാൻ നിങ്ങളെ വിളിച്ചു. നിങ്ങൾ എനിക്ക് ഒരു യഥാർത്ഥ സഹോദരനെപ്പോലെയാണ്. അത് എന്നെ എത്രമാത്രം വികാരധീനനാക്കിയെന്ന് എനിക്ക് വാക്കുകളിൽ വിവരിക്കാൻ കഴിയില്ല. ഒരു തെറ്റ് ഒരു അനുഗ്രഹമായി മാറിയ അത്ഭുതം എന്ന് ചിന്മയ് കൂട്ടിച്ചേർത്തു.

ഈ പ്രചോദനാത്മകമായ കഥ സോഷ്യൽ മീഡിയയിൽ അതിവേഗം വൈറലായി. ഇതിനോടകം അഞ്ച് ലക്ഷത്തിലധികം ആളുകൾ ഇത് കണ്ടുകഴിഞ്ഞു. നിരവധി പേരാണ് ചിന്മയിയുടെ ദയയെയും മനുഷ്യത്വത്തെയും പ്രശംസിച്ച് ഹൃദയസ്പർശിയായ കമൻ്റുകൾ രേഖപ്പെടുത്തുന്നത്.

ഒരു സോഷ്യൽ മീഡിയ ഉപയോക്താവ് കുറിച്ചു, എത്ര മനോഹരമായ പോസ്റ്റ്! ചിന്മയ്, ഇത് നിങ്ങൾ തുടർന്നും ചെയ്യുക. മറ്റൊരാൾ എഴുതി, ഇത് സത്യമാണെങ്കിൽ ഹൃദയസ്പർശിയാണ്. ബ്രോ, നിങ്ങളോട് വലിയ ബഹുമാനം എന്ന് മൂന്നാമതൊരാൾ അഭിപ്രായപ്പെട്ടു. വൗ ഭായ്, നിങ്ങളെക്കുറിച്ച് ഞാൻ വളരെയധികം അഭിമാനിക്കുന്നു എന്ന് മറ്റൊരു ഉപയോക്താവ് എഴുതി.

ഈ നല്ല വാർത്ത നിങ്ങളുടെ സുഹൃത്തുക്കളുമായി പങ്കുവെക്കൂ! നിങ്ങളുടെ അഭിപ്രായങ്ങൾ താഴെ രേഖപ്പെടുത്തുക. 

Article Summary: A banking error led to ₹50,000 reaching a businessman's account, who traced the owner in Saudi Arabia. Learning about the family's hardship, he and his father funded the education of the owner's sister, who then scored 97% in her 10th-grade exams.

#HumanKindness, #GoodDeeds, #InspirationalStory, #EducationSupport, #ViralNews, #Bengaluru