Died | ഊട്ടിയിൽ നിർമാണ ജോലിക്കിടെ മണ്ണിടിഞ്ഞ് വീണ് ജീവനോടെ മണ്ണിനടിയിലായി; 2 പേർക്ക് ദാരുണാന്ത്യം

കോയമ്പത്തൂർ: (www.kvatha.com) നീലഗിരിയിലെ മഞ്ഞൻകൊരൈക്ക് സമീപം നിർമാണ സ്ഥലത്ത് മണ്ണിടിഞ്ഞ് വീണ് രണ്ട് തൊഴിലാളികൾക്ക് ദാരുണാന്ത്യം. ചെന്നൈ സ്വദേശി കുമരേശന്റെ ഉടമസ്ഥതയിലുള്ള സ്ഥലത്താണ് നിർമാണ പ്രവർത്തനങ്ങൾ നടന്നിരുന്നതെന്ന് പൊലീസ് പറഞ്ഞു.
                                              
മതിലിനായി നാല് തൊഴിലാളികൾ സ്ഥലത്ത് കുഴിയെടുക്കുന്നതിനിടെയാണ് മണ്ണിടിഞ്ഞത്. രണ്ട് തൊഴിലാളികൾ രക്ഷപ്പെട്ടെങ്കിലും മറ്റ് രണ്ട് പേർ 15 അടിയിലായി മണ്ണിനടിയിൽ കുടുങ്ങുകയായിരുന്നു. സേലം ജില്ലയിലെ ഓമല്ലൂർ സ്വദേശികളായ സഈദ് (55), വേലു (28) എന്നിവരാണ് മരിച്ചത്.

ഊട്ടിയിൽ നിന്ന് ഫയർ ആൻഡ് റെസ്‌ക്യൂ സർവീസ് ഉദ്യോഗസ്ഥർ മൃതദേഹം പുറത്തെടുത്ത് പോസ്റ്റ്‌മോർടത്തിനായി സർകാർ ആശുപത്രിയിലേക്ക് മാറ്റി. ജില്ലാ കലക്ടർ എസ്പി അമൃത്, പൊലീസ്, റവന്യൂ ഉദ്യോഗസ്ഥർ എന്നിവർ സംഭവസ്ഥലം സന്ദർശിച്ചു. ഊട്ടി ടൗൺ വെസ്റ്റ് പൊലീസ് കേസെടുത്തു.