Naresh Kuppili | വിജയ് ചിത്രം ദ ഗോട്ടില്‍ വിവാദത്തിലേക്കോ? പരാതിയുമായി പാഗലെന്ന ഹിറ്റ് സിനിമയുടെ തെലുങ്ക് സംവിധായകന്‍

ചെന്നൈ: (KVARTHA) ദളപതി വിജയ് ചിത്രം ദ ഗോട്ടില്‍ വിവാദത്തിലായിരിക്കുകയാണ്. ചിത്രത്തിന്റെ പേരിനെതിരെ പരാതിയുമായി രംഗത്തെത്തിയിരിക്കുകയാണ് തെലുങ്ക് സംവിധായകന്‍. തെലുങ്കിലെ ഹിറ്റ് സിനിമയായ പാഗലിന്റെ സംവിധായകനായി ശ്രദ്ധയാകര്‍ഷിച്ച നരേഷ് കുപ്പിളിയാണ് വിജയ്‌യുടെ ഗോട്ടിനെതിരെ പരാതിയുമായി എത്തിയിരിക്കുകയാണ്.

സംവിധായകന്‍ നരേഷ് കുപ്പിളി രണ്ടാം സിനിമയുടെ തിരക്കിലാണ്. ആ പുതിയ ചിത്രത്തിന് 'ഗോട്ട്' എന്നാണ് പേര് നല്‍കിയിരിക്കുന്നത്. ഈ ചിത്രത്തിന്റെ പ്രമോഷണ്‍ നടക്കുകയാണെന്നും ചുരുങ്ങിയ സമയത്തില്‍ സിനിമയുടെ പേര് മാറ്റാനാകില്ലെന്നുമാണ് വിജയ് നായകനായി ഗോട്ട് ഒരുങ്ങുമ്പോള്‍ നരേഷ് കുപ്പിളി പരാതിപ്പെടുന്നത്.

വിജയ് യെ നായകനാക്കി വെങ്കട് പ്രഭു സംവിധാനം ചെയ്യുന്ന 'ദ ഗ്രേറ്റസ്റ്റ് ഓഫ് ഓള്‍ ടൈം അഥവാ ദ ഗോട്ട്' എന്ന പേരിലാണ് സിനിമ എടുക്കുന്നത്. ദളപതി വിജയ്‌യുടെ ഓരോ സിനിമയും ആഘോഷമാക്കാന്‍ ശ്രമിക്കുന്ന ആരാധകര്‍ പുതിയ ചിത്രത്തിന്റെ പേര് അറിഞ്ഞതുമുതല്‍ ആവേശത്തിലാണ്. അതിനിടെയാണ് ഈ പേരും വിവാദത്തിലായിരിക്കുന്നത്.

ദ ഗോട്ടില്‍ വിജയ് ഇരട്ട കഥാപാത്രമായിരിക്കും എന്നാണ് പുറത്തുവരുന്ന റിപോര്‍ടുകള്‍. ഡി എജിംഗ് സാങ്കേതിക വിദ്യയുപയോഗിച്ചാണ് താരത്തെ ചെറുപ്പമാക്കുന്നതെന്ന് നേരത്തെ റിപോര്‍ടുകളുണ്ടായിരുന്നു. ചിത്രത്തിന്റെ ഫസ്റ്റ് ലുക് അടക്കം വലിയ ചര്‍ച്ചയായിരുന്നു.