Bilkis Bano | എന്താണ് 19-ാം വയസിൽ ബിൽകീസ് ബാനുവിന്റെ ജീവിതത്തിൽ സംഭവിച്ചത്? ക്രൂരതയുടെയും നീതിക്കായുള്ള വർഷങ്ങളുടെ പോരാട്ടത്തിന്റെയും കഥ ഇങ്ങനെ

  എന്താണ് ബിൽക്കീസ് ബാനുവിന്റെ ജീവിതത്തിൽ സംഭവിച്ചത്?

2002 ഫെബ്രുവരി 27-ന് ഗോധ്രയിൽ സബർമതി ട്രെയിൻ തീവയ്പ്പിന് ശേഷം ഗുജറാത്ത് സംഘർഷഭരിതമായ കാലഘട്ടമാണ് അനുഭവിച്ചത്. അന്ന് ട്രെയിൻ ദുരന്തത്തിൽ 59 കർസേവകർക്ക് ജീവൻ നഷ്ടപ്പെട്ടു. ഇതേത്തുടർന്നാണ് ഗുജറാത്തിൽ കലാപം പൊട്ടിപ്പുറപ്പെട്ടത്. കലാപകാരികളുടെ ആക്രമണത്തിൽ നിന്ന് രക്ഷപ്പെടാൻ, ബിൽക്കീസ് ബാനു എന്ന യുവതി തന്റെ മൂന്നര വയസുള്ള മകളോടും ഭർത്താവിനോടും മറ്റ് 15 കുടുംബാംഗങ്ങളോടും ഒപ്പം സുരക്ഷിതമായ ഇടം കണ്ടെത്തുന്നതിനായി രൺധിക്പൂർ ഗ്രാമത്തിലെ വീട്ടിൽ നിന്ന് പലായനം ചെയ്തു. അഞ്ച് മാസം പ്രായമുള്ള ഗർഭിണിയായിരുന്നു അന്ന് 19 വയസുണ്ടായിരുന്ന ബിൽകീസ് ബാനു.

ബക്രീദ് ദിനത്തിൽ ദഹോദിലും പരിസര പ്രദേശങ്ങളിലും കലാപകാരികൾ നിരവധി വീടുകൾ കത്തിച്ചിരുന്നു. ഛപർവാദ് ജില്ലയിലാണ് ബൽകീസിന്റെ കുടുംബം സുരക്ഷ തേടിയത്. 2002 മാർച്ച് മൂന്നിന് ഛപർവാദ് ഗ്രാമത്തിലെത്തി വയലിൽ ഒളിച്ചു. നിർഭാഗ്യവശാൽ, അരിവാളുകളും വാളുകളും വടികളുമായി 20 മുതൽ 30 വരെ വ്യക്തികളുള്ള ഒരു സംഘം ബിൽകീസിനെയും കുടുംബത്തെയും ആക്രമിച്ചു. ഈ അക്രമികളിൽ 11 പേരും ബിൽകീസിനെ കൂട്ടബലാത്സംഗം ചെയ്തു. ഏഴ് കുടുംബാംഗങ്ങളെ കൊലപ്പെടുത്തി. ജീവിത്തിനും മരണത്തിനും ഇടയിലായ ബിൽകീസിനെ പിന്നീട് ഗോധ്ര ദുരിതാശ്വാസ ക്യാമ്പിലേക്ക് മാറ്റി. അവിടെ നിന്ന് വൈദ്യപരിശോധനയ്ക്കായി ആശുപത്രിയിലേക്ക് കൊണ്ടുപോയി.

കേസിന്റെ നാൾവഴികൾ

പരാതി പൊലീസ് സ്റ്റേഷനിൽ രജിസ്റ്റർ ചെയ്തതിനെ തുടർന്ന് അന്വേഷണം ആരംഭിച്ചെങ്കിലും തെളിവുകളുടെ അഭാവത്തിൽ പൊലീസ് കേസ് തള്ളുകയായിരുന്നു. ഇതിന് പിന്നാലെയാണ് ബിൽകീസ് മനുഷ്യാവകാശ കമ്മീഷനെ സമീപിക്കുകയും സുപ്രീം കോടതിയിൽ ഹർജി നൽകുകയും ചെയ്തത്. കേസ് അന്വേഷിക്കാൻ സിബിഐയോട് ഉത്തരവിട്ടു. 18 പേർ കുറ്റക്കാരാണെന്ന് സിബിഐ കണ്ടെത്തി. പ്രതികളെ സഹായിക്കാൻ തെളിവ് നശിപ്പിച്ചുവെന്നാരോപിച്ച് അഞ്ച് പൊലീസുകാരും രണ്ട് ഡോക്ടർമാരും ഇവരിൽ ഉൾപ്പെടുന്നു.