അശ്ലീലച്ചുവയുള്ള പോസ്റ്ററുകള്‍; തെലുങ്ക് നടന്‍ രാം ചരണ്‍ തേജയ്‌ക്കെതിരെ കേസ്

ഹൈദരാബാദ്: പ്രശസ്ത തെലുങ്ക് യുവതാരം രാം ചരണ്‍ തേജയ്ക്കും മറ്റ് ഒന്‍പത് പേര്‍ക്കുമെതിരെ ഹൈദരാബാദ് പോലീസ് കേസെടുത്തു. രാംചരണിന്റെ പുതിയ സിനിമയായ 'യേവാഡു'വിന്റെ പോസ്റ്ററുകള്‍ മുഴുവനും  അശ്ലീലച്ചുവയുള്ളവയാണെന്ന് ആരോപിച്ചാണ് കേസ്.

 ജനുവരി 12 ന് റിലീസ് ചെയ്ത 'യേവാഡു'വിന്റെ പോസ്റ്ററുകളില്‍ ആന്ധ്രപ്രദേശിലെ കുര്‍ണൂല്‍ ജില്ലയില്‍ പതിച്ചവയെല്ലാം അശ്ലീലം നിറഞ്ഞതാണെന്നുള്ള ആരോപണം ഉയര്‍ന്നിരുന്നു.

 ഇതിനെതിരെ സാമൂഹ്യപ്രവര്‍ത്തകനായ കെ. നാഗേന്ദ്ര പ്രസാദ് നല്‍കിയ  പരാതിയിലാണ് ഇന്ത്യന്‍ ശിക്ഷാ നിയമപ്രകാരം പോലീസ് കേസെടുത്തത്. പ്രശസ്ത തെലുങ്ക് സൂപ്പര്‍താരവും രാഷ്ട്രീയ നേതാവുമായ ചിരഞ്ജീവിയുടെ മകനാണ് രാം ചരണ്‍.

രാം ചരണിനെ കൂടാതെ യേവാഡുവിന്റെ സംവിധായകന്‍ വംശി പൈഡിപ്പള്ളി, നിര്‍മ്മാതാവ് എന്നിവരടക്കമുള്ള ഒന്‍പത് സിനിമാ പ്രവര്‍ത്തകര്‍ക്കെതിരെയാണ് കേസെടുത്തത്. എമി ജാക്‌സണും ശ്രുതി ഹസനും നായികമാരായി തിളങ്ങിയ ചിത്രത്തിലുടനീളം അശ്ലീലമാണെന്നും പരാതിയില്‍ പറയുന്നു.

ഒരുപാട് നല്ല സിനിമകളില്‍ അഭിനയിച്ച് തെലുങ്കരുടെ  പ്രീതി സമ്പാദിച്ച രാം ചരണ്‍ യുവാക്കളുടെ ആരാധകന്‍ കൂടിയാണ്. അതുകൊണ്ടുതന്നെ അശ്ലീല പോസ്റ്ററുകള്‍ പതിച്ചതു കാരണം യുവാക്കള്‍ വഴിതെറ്റുമെന്നാണ് പരാതിക്കാരന്‍ പറയുന്നത്.

രാം ചരണിന്റെ നായക്, മഗധീര എന്നീ  സിനിമകള്‍ മലയാളത്തിലും റീമേക്ക്ചെയ്തിരുന്നു. മലയാളത്തിലും ഒരുപാട് ആരാധകരെ സമ്പാദിക്കാന്‍ രാംചരണിന് കഴിഞ്ഞിട്ടുണ്ട്.
പട്ടാള വേഷം ഇസ്ലാമിനോടുള്ള വെല്ലുവിളി; നടപടി സ്വീകരിക്കണമെന്ന് ബി.ജെ.പി